《艾莉菲斯物語》（異世界穿越）: 第二章、結界迷路

露營第二朝一早，我同阿偉、永誠同曉峰喺帳篷陸續醒咗。

太陽光透入帳篷，暖笠笠嘅，我伸咗個懶腰，阿偉同永誠又再訓返，我望住阿偉，訓著咗嘅佢都好型，我忍唔住偷偷錫咗佢面一啖，但唔小心俾曉峰見到，尷尬死。

我同曉峰出咗去幫大家準備早餐，係啲好簡單嘅炒蛋、三文治咁。

等佢兩個都醒埋，我哋食完早餐，就收拾好，出發行山，我哋計劃好要行去大藍湖方向，聽講沿途風景都好靚。

曉峰拎住地圖同手機帶路，佢話沿住蠔涌路行，應該一個鐘左右就到大藍湖。我哋沿住一條小路行，兩邊都係樹同草，空氣好清新，仲有啲雀仔叫聲，好舒服。





但係，行咗半個鐘左右，我開始覺得有啲奇怪，因為我好似覺得我哋一直重複行返去同一個地方，我認得同一棵樹、上面綁住一條紅繩。

我問佢哋覺唔覺得有啲怪，曉峰話都覺得係，因為由五分鐘前開始，電話已經完全冇信號，明明一直都收到兩格，同埋佢都覺得棵樹見過。

我心入面開始驚，我聽過西貢結界嘅傳說，話係一入咗去會分唔清方向，成日兜圈，電話會冇信號，有人話係磁場問題，有人話係靈異現象，入咗去好似就有入無出…

我一諗起，心跳得好快，我主動拖住阿偉，再同佢哋講咗我嘅憂慮。阿偉、永誠同曉峰聽到我講，都靜咗一靜。

然後曉峰喺棵樹到用樹枝做咗個記號，然後帶我哋回頭行，行咗一陣，我哋又返到去嗰棵有紅繩、做咗記號嘅樹。我哋都好驚，因為真係好奇怪，同埋我哋覺得個氣溫好似愈來愈低，明明係夏天，我哋竟然覺得有啲凍。





天色都唔知點解好快變黑，我哋商量過後，決定報警，但連999都打唔通。

冇辦法之下，曉峰提議我哋原地紮營休息先，佢話就算真係入咗結界，都要抖夠保留體力，而新聞都有報過有人會過幾日就出返嚟。

我哋都好驚、心入面好壓抑，阿偉雖然都好驚，但佢都冇表現出嚟，佢仲一直攬住我安慰我，不知不覺間，我就訓咗。