《艾莉菲斯物語》（異世界穿越）: 第十九章、雪原之約
上章講到星光小隊同洛希娜一齊踏入萊茵沙漠嘅黃沙範圍，準備討伐10隻流沙蟹嘅任務。
星光小隊同洛希娜喺萊茵沙漠嘅黃沙範圍行咗一陣，陽光猛烈咁照喺沙面上，熱氣撲面而來，遠處嘅白色粗線同湖水藍色沙喺陽光下閃閃發光，巨靚，但大家都記住職員嘅提醒，唔敢走近嗰邊。行唔遠，佢哋就見到咗幾隻流沙蟹喺黃沙上爬動。好似我之前講咁，流沙蟹一隻大約有一個成年人咁大，佢哋嘅殼係灰黃色，上面有啲沙粒黏住，兩隻巨鉗好似大較剪咁，動作唔快，移動時發出「沙沙」嘅聲音。
永誠一見到流沙蟹，即刻大喊：「好！流沙蟹，我哋嚟啦！星光小隊！大家上！」佢一馬當先，拎住大劍衝上前。
洛希娜喺後排拉開長弓，瞄準一隻流沙蟹，俐落咁射出一箭，箭矢精準擊中流沙蟹嘅殼，發出「啪」嘅一聲，流沙蟹被射中，痛得揮動巨鉗，但動作慢吞吞，完全唔夠洛希娜快。阿偉舉起盾牌，擋住一隻流沙蟹嘅巨鉗攻擊，樂希點頭，舉起手連續施展強化術，一陣白光包圍住永誠、阿偉、曉峰同洛希娜，幫佢哋提升力量同防禦。
永誠一劍劈落，流沙蟹嘅殼被劈開一條裂縫，佢大喊：「洛希娜，瞄呢度！」洛希娜即刻射出第二箭，箭矢直中裂縫，流沙蟹發出一聲低鳴，隨即倒地。曉峰喺另一邊用短刀潛行，悄悄繞到一隻流沙蟹嘅側面，佢嘅短刀刺中流沙蟹嘅關節位，流沙蟹痛得揮鉗反擊，但曉峰早一步退開，完全唔畀佢擊中，然後曉峰再加速上前，用短刀刺中流沙蟹頭部，俐落完成擊殺。
另一邊流沙蟹張開巨鉗，射出幾個細細嘅水彈，水彈喺空中劃過，朝樂希飛去。阿偉即刻跳前，用盾牌擋住水彈，水彈擊中盾牌，發出「啪啪」嘅聲音，佢笑住講：「傻豬，唔使驚！有我喺到！」樂希甜蜜咁回應：「阿偉……我幫你補血！」佢施展治癒術，一陣白光包圍阿偉，幫佢癒合咗剛剛被水彈濺到嘅輕微傷口。
戰鬥場面比之前同史萊姆嗰次順暢好多，星光小隊同洛希娜配合得好好，永誠同阿偉負責近戰，曉峰潛行暗殺，洛希娜喺後排遠程輸出同收割，樂希專心支援，幫隊友補血同上buff。
流沙蟹雖然有巨鉗同水魔法，但動作太慢，佢哋單打獨鬥，完全唔係星光小隊嘅對手。幾經努力，佢哋好快就擊敗咗10隻流沙蟹，永誠就拎走咗十條觸鬚作為任務證明，佢哋終於完成咗任務。
打完流沙蟹，星光小隊同洛希娜喺黃沙上搵咗一塊比較平坦嘅地方，攤開一張毛毯坐低休息，準備返去交任務。陽光依然猛烈，但沙漠嘅微風吹過，幾涼爽。佢哋飲咗啲水，食咗啲乾糧補充體力，氣氛好輕鬆。
永誠作為隊長，笑住講：「大家今日好叻！戰鬥好順利，我覺得我哋比之前同史萊姆打嗰次進步咗好多！洛希娜，你嘅箭術真係好勁，幫咗我哋好大忙！阿偉坦哂啲傷，曉峰暗殺愈來愈專業，樂希嘅支援一如既往咁穩定，大家都好有默契！星光小隊，繼續努力，遲早我哋會成為艾莉菲斯最強嘅隊伍！」
永誠講完，本來想鼓勵隊友，但佢突然見到洛希娜低頭，肩膀微微顫抖，竟然喺到流淚。永誠呆咗一呆，慌張咁講：「洛希娜...…做咩喊？係咪我講錯咗啲咩？」阿偉同曉峰都望住洛希娜，樂希細聲講：「洛希娜……你冇事嘛？」
洛希娜抹咗抹眼淚，搖頭講：「冇事…..有沙入眼啫，唔使理我…..」但佢嘅眼淚越流越多，聲音都帶咗啲哽咽。星光小隊見佢咁，大家都好擔心，樂希細聲講：「洛希娜，唔使勉強自己，如果有咩唔開心，同我哋講，我哋會同你分擔。我哋未必幫到你，但我哋會陪住你。」阿偉亦講：「係呀！洛希娜，唔怕㗎。」
喺眾人嘅鼓勵下，洛希娜終於開口，佢低聲講：「永誠…..你冇講錯嘢。只係你剛剛嘅鼓勵，令我諗起咗我之前嘅小隊，水光小隊嘅隊長嘉林哥哥。佢係一個熱血嘅戰士，同你有啲似，佢成日都係咁鼓勵我哋。我加入水光小隊嘅第一個任務，咁啱都係嚟萊茵沙漠，嗰次任務完咗之後，嘉林都係咁同我哋講，話我哋做得好好。我好掛住佢哋，所以先忍唔住喊……」
永誠聽完，鬆咗一口氣，但又有啲唔知點應，佢溫柔咁講：「原來係咁，洛希娜，對唔住，我唔知會勾起你嘅回憶。呀，既然你咁掛住嘉林，我哋陪你一齊去搵佢咪得！」
點知洛希娜一聽，失聲痛哭，佢掩住面，淚水完全止唔住。阿偉見狀，急忙同樂希講：「傻豬，快用安撫術幫洛希娜冷靜吓！佢喊得好傷心……」樂希搖頭：「阿偉……唔好......我覺得唔應該用魔法解決。洛希娜有啲唔開心嘅事，我哋應該同佢傾，唔係用魔法安撫佢。」
永誠見洛希娜喊得咁傷心，自責好似又講錯嘢，佢溫柔咁走近洛希娜，幫佢抹咗抹眼淚：「洛希娜，對唔住，我又講錯咗嘢，我唔知會令你咁傷心……」樂希亦坐近洛希娜，細聲講：「洛希娜，你可以勇敢啲分享你嘅過往。每個人都有過去，我哋都係咁慢慢跨過啲唔開心嘅事......」佢講到呢度，諗起曦嵐，眼眶都有啲濕濕地。
(等等先，我感覺到有讀者唔知道或者唔記得邊個係曦嵐，罰你哋click入作者個profile，睇返一次《星空之願》先。係呀我係植入式廣告sor。)
喺眾人嘅溫柔鼓勵下，洛希娜終於講出佢嘅心結。佢哽咽咁講：「一年前……我係水光小隊嘅一員，隊長嘉林哥哥、騎士阿保哥哥同刺客優兒姐姐都好錫我，當我妹妹咁，我哋有日去瑪利安納雪原做任務，點知遇到雪原嘅傳說級魔物雪魔女。佢哋三個為咗保護我而戰死...…我好彩畀一個神秘嘅死靈法師救走。但自此我就好自責好唔開心，連佢哋嘅屍體都帶到返嚟。呢一年，我每日都唔知為咩生存落去，冇人生目標...…」
永誠聽完，呆咗一呆，好自責咁講：「對唔住，洛希娜.....我唔知發生過啲咁嘅事，我仲話要陪你搵嘉林，真係對唔住...…」洛希娜抹咗抹眼淚，搖頭講：「冇事……你都唔知，而家講咗出黎，我舒服咗啲......」
曉峰靈機一動：「洛希娜，既然永誠話要陪你搵嘉林，我覺得我哋可以實現呢個承諾。不如你加入星光小隊，等我哋一齊成長到足夠強大，之後一齊去瑪利安納雪原，搵返嘉林佢哋嘅遺體帶返城，幫你完成心願！」
洛希娜聽完，猶豫咗一陣，講：「真係……可以？」但佢又隨即拒絕，「唔好啦，瑪利安納雪原好危險，我真係唔想再經歷多次失去隊友......」
「你唔會再失去隊友，我哋會成長到夠強大先去。啱啱話要陪你搵嘉林嘅係我，我應承你，我哋會努力做到！星光小隊會陪你一齊完成心願！」永誠望住洛希娜好認真講。
樂希溫柔咁話：「洛希娜，你已經好努力啦，你唔使再一個人努力啦。」
阿偉亦講：「係呀！有我哋喺到，你唔會再孤單！」
洛希娜聽完，眼淚又流咗出嚟，但今次係感動嘅淚水。佢哽咽咁講：「多謝你哋……」佢抹咗抹眼淚，露出一個真心嘅笑容，雖然仲有啲悲傷，但比之前多咗一絲希望。
「咁你係咪願意加入星光小隊？」永誠向洛希娜伸出手。
「我......願意。」洛希娜伸出手握住永誠的手回應。
星光小隊同洛希娜喺萊茵沙漠嘅黃沙上相擁，陽光照喺佢哋身上，溫暖而明亮。洛希娜正式加入咗星光小隊，佢哋嘅冒險旅程，又多咗一個新嘅夥伴。