《艾莉菲斯物語》（異世界穿越）: 第十八章、臨時隊友

第二朝，陽光一如既往咁灑入光影旅館201號房嘅大窗戶，星光小隊食咗卡娜準備好嘅早餐後，坐喺圓形木桌上傾計。

樂希話：「琴晚打安邦尼斯用咗好多魔力，我而家都覺得有啲攰...…如果之後再有咁激烈嘅戰鬥，我怕魔力唔夠用……」

阿偉攬住佢講：「傻豬，咁我哋一陣去藥水鋪幫你買定啲魔力藥水備用啦！有藥水喺手，你就唔使咁擔心！」

永誠點頭：「好主意！藥水係好重要嘅補給品，我哋隊伍好需要你嘅回復，魔力藥水點都要儲備啲！」

曉峰推咗推眼鏡，低聲講：「嗯，之前同魔源組一齊，米亞都有畀一支魔力藥水樂希，效果幾好。我哋一陣去搵間藥水鋪，買兩支備用。」





食完早餐，四人收拾好裝備，出發去馬利安城嘅藥水鋪。根據曉峰喺地圖上搵到嘅位置，藥水鋪喺馬利安城嘅東邊，離光影旅館唔算遠，行咗大概五分鐘就到。

藥水鋪係一間細細嘅木屋，外牆漆咗藍色，門口掛咗一塊木牌，上面寫住「藍瓶」，門前仲放咗幾盆小花，幾有情調。

佢哋推門入去，藥水鋪入面好整潔，木架上擺滿咗唔同顏色嘅藥水，紅色嘅回復藥水、藍色嘅魔力藥水、綠色嘅解毒藥水，仲有一啲五顏六色嘅藥水，標籤寫住「增強力量」、「提升速度」之類嘅效果。

櫃檯後面有一個年輕女店員，佢有一頭金色長髮，扎成一個馬尾，見到樂希身上嘅白光，佢即刻露出驚喜嘅表情，深深鞠咗一躬，講：「聖職大人！歡迎蒞臨藍瓶藥水鋪！我係店員希雅，能夠為您服務係我嘅榮幸！請問您需要啲咩藥水？」

樂希有啲唔好意思咁講：「唔使咁叫我，我係樂希。我想買兩支魔力藥水備用…」





希雅點頭：「當然可以，樂希大人！魔力藥水一支係150卡索，兩支就係300卡索！呢啲藥水係用加卜里嘅毒囊同星輝果整成，品質好高，可以即刻幫您回復大半魔力！不過原諒我唔可以送俾你招待......因為我只係店員。」

阿偉一聽即刻瞪大眼，講：「吓？一支要150卡索？咁貴！我哋之前一個任務先攞100卡索報酬……」永誠亦喺一邊細聲講：「係呀...…真係好貴...…」曉峰低聲講：「但魔力藥水對樂希好重要，300卡索雖然貴，但值得。」

於是阿偉從小布袋拎出300卡索，畀咗希雅。希雅笑住拎出兩支藍色嘅魔力藥水，瓶身散發出一陣微弱嘅藍光，交畀樂希，講：「樂希大人，呢兩支藥水請收好！願加爾安娜絲女神與你同在。」樂希接過藥水，細聲講：「多謝你，希雅...…」四人同希雅道別，離開藥水鋪，向冒險者公會嘅方向行去。

喺去冒險者公會嘅路上，佢哋行到一條比較靜嘅街道，突然見到一個熟悉嘅身影。係洛希娜！佢一如既往咁著住綠色短袍，手持長弓，箭筒掛喺腰間，佢嘅金色長髮喺陽光下閃閃發光，但佢嘅藍色眼睛依然帶有一絲憂傷。

洛希娜一見到星光小隊，特別係樂希身上嘅白光，佢即刻停下腳步，露出一個溫暖但勉強嘅笑容，講：「樂希……你哋好！咁啱，見到你哋！」樂希見到洛希娜，眼仔即刻亮咗起來，細聲講：「洛希娜！你好！真係好開心又見到你！」阿偉亦笑住講：「洛希娜，上次多謝你救我哋！今次終於又見到你！」永誠同曉峰都同佢打招呼，永誠笑住講：「洛希娜，你一個人？一齊去冒險者公會接任務啦！」曉峰話：「係呀，洛希娜，一齊行動會安全啲。」





樂希望住洛希娜，鼓起勇氣細聲講：「洛希娜，我有個提議……你可唔可以加入我哋星光小隊？我覺得你一個人冒險好孤單，而且你咁厲害，箭術咁好，如果有你喺隊入面，我哋一定會更加強！你......你會唔會考慮吓？」

阿偉喺一邊幫口：「係呀！洛希娜，我哋好需要你嘅遠程輸出！有你喺到，我哋隊伍就完美啦！」

洛希娜聽完，笑容僵咗一僵，佢低咗頭，沉默咗一陣，然後輕聲講：「多謝你哋嘅好意。我好感動你哋會關心我，但我而家唔想加入任何隊伍，對唔住……」佢嘅聲音有啲顫抖，藍色眼睛閃過一絲悲傷。

樂希見洛希娜咁講，唔想勉強佢，於是退咗一步，細聲講：「我明白，洛希娜，我唔會勉強你。但如果你唔介意嘅話，可唔可以暫時同我哋一齊接個任務？我覺得，有你喺身邊，我哋都會好安心，就算係一齊行動一次都好。」

永邊亦講：「係呀！洛希娜，試吓同我哋一齊做一個任務啦！如果唔適合，你隨時可以走，我哋唔會強留你！」

洛希娜望住樂希真誠嘅大眼睛，終於點咗點頭，講：「好啦……樂希，睇你咁真誠嘅份上，我就同你哋一齊接一個任務試吓。」

樂希即刻露出一個開心嘅笑容，笑住講：「多謝你，洛希娜！我會好努力支援你嘅！」永誠笑住講：「好！咁我哋一齊去冒險者公會接任務啦！」

五人一齊沿住街道行去冒險者公會。馬利安城嘅冒險者公會一如既往咁熱鬧，大堂入面嘅冒險者喺告示板前挑選任務，櫃檯後嘅職員忙碌咁處理登記。樂希一入公會，身上嘅白光即刻吸引咗所有人嘅注意，冒險者紛紛向佢敬禮，佢哋行到櫃檯前，職員一見到樂希嘅白光，又係好尊敬咁鞠躬，講：「聖職大人！歡迎您同您嘅同伴返來！請問您今日想接咩任務？」





曉峰話：「我哋都係想接啲簡單嘅任務，適合新手練習戰鬥。」職員點頭，從牆上嘅告示板拎咗一張任務單，笑住講：「呢個任務好適合星光小隊！任務係去馬利安城西邊嘅萊茵沙漠，討伐10隻流沙蟹，報酬係每隻流沙蟹10卡索，總共100卡索。流沙蟹係低階魔物，對新手嚟講係一個好好嘅練習對手！」

由係我出場嘅時候解說嘅時候，各位讀者，流沙蟹係低階魔物，一隻大約有一個成年人咁大，動作唔快，主要用巨鉗攻擊，仲識得用少量嘅水魔法，例如射啲細細嘅水彈。佢哋嘅危險性唔大，而且唔會團體行動，單打獨鬥嘅話，對新手嚟講係一個好好嘅練習對手！

職員繼續同星光小隊講：「雖然流沙蟹唔係好危險，但我要提醒你哋，萊茵沙漠好特別！近城嗰邊係黃沙，流沙蟹多數喺黃沙範圍活動，呢啲黃沙基本上冇咩危險。但沙漠中間位置會好突兀咁有一條白色粗線，另一邊就係湖水藍色沙。湖水藍色沙雖然好靚，但好危險，入面有唔少中階甚至高階魔物，千祈唔好走近嗰邊！如果你哋唔小心過咗白色粗線，可能會遇到好危險嘅魔物，到時就麻煩啦！」

永誠點咗頭，笑住講：「明白！我哋會小心，留喺黃沙範圍打流沙蟹，唔會過白色粗線！」

職員笑住講：「好！咁我幫你哋登記任務！星光小隊..…咦，呢位小姐係新隊友？要唔要幫佢登記入隊？」

洛希娜即刻搖頭，講：「我係洛希娜，只係同佢哋一齊接一個任務，唔係正式隊員...…」樂希細聲講：「洛希娜，但如果唔登記入隊，公會唔會俾你同我哋一齊行動，不如你暫時加入星光小隊，最多等完成任務再退出啦？」

洛希娜猶豫咗一陣，終於點頭講：「好啦……」永誠笑住講：「好！咁幫洛希娜暫時註冊入星光小隊啦！」職員喺登記簿上寫咗「星光小隊隊員：洛希娜（弓手）」，然後笑住講：「登記完成！星光小隊，祝你哋任務順利！記住，千祈唔好過白色粗線！」





星光小隊同洛希娜一齊離開冒險者公會，沿住馬利安城西邊嘅小路向萊茵沙漠出發。萊茵沙漠離馬利安城唔遠，行咗大約十五分鐘，佢哋就到咗沙漠嘅邊緣。眼前係一片廣闊嘅黃沙，陽光照喺沙面上，熱氣撲面而來，遠處隱約見到一條白色粗線，白色粗線另一邊係湖水藍色嘅沙，喺陽光下閃閃發光，靚到不得了，但空氣中隱隱散發出一陣危險嘅氣息。

永誠望住沙漠，笑住講：「好！流沙蟹，我哋嚟啦！今次有洛希娜幫手，我哋一定好快完成任務！」

洛希娜喺一邊低聲笑說：「我會盡力……」

星光小隊同洛希娜一齊踏入萊茵沙漠嘅黃沙範圍，準備開始討伐流沙蟹嘅任務。

佢哋會點樣應付流沙蟹？洛希娜會唔會因為今次任務改變主意，正式加入星光小隊？下章再同你哋講！