《艾莉菲斯物語》（異世界穿越）: 第二十一章、大戰龍王
大戰開始！冥帝利修斯一聲咆哮，隨即向龍王瑪爾艾路進攻，佢嘅巨大身形喺濃霧中好似一座移動嘅山，血紅色雙眼散發兇光，紫色鎖鏈喺空中揮舞，直衝龍王！阿夢完全冇停手，佢揮舞魔杖，一連召喚出三隻死靈召喚物，組成一支恐怖嘅死靈大軍。
首先係胤鬼，一團紫色霧氣構成嘅幽靈，佢嘅雙手散發出一陣詭異嘅綠光，遠程射出一波波毒霧攻擊，毒霧喺空中化作箭矢，擊中龍王嘅鱗片時可以造成中毒、混亂、麻痺等異常狀態。跟住係骷髏貓，雖然體形好似真貓咁細小，但佢嘅爪子鋒利得嚇人，連環爪擊嘅近戰輸出極高，動作異常敏捷，喺龍王腳邊四處竄動，爪子喺鱗片上劃出「嗤嗤」嘅火花。最後係鬼巫師，一個披住破爛斗篷嘅骷髏法師，佢拎住一根骨杖，幫阿夢同死靈隊友上buff，仲可以抗異常狀態，最勁係能令附近隊友持續回魔，確保阿夢同死靈大軍嘅魔力源源不絕。
所有單位向龍王猛攻！冥帝利修斯近戰同魔法光波一波接一波，巨大嘅拳頭同黑色光波瘋狂砸向龍王嘅鱗片，發出「轟轟」嘅巨響。胤鬼喺遠處射出毒霧箭矢，骷髏貓喺龍王腳邊連環爪擊，鬼巫師喺後方幫隊友上buff，濃霧中嘅戰場變得異常混亂。
影喺一邊完全冇掛住食花生，佢用咗最高階嘅分身術，瞬間變出38個分身，每個分身都同真身一模一樣，手持匕首，綠色眼睛散發寒光。38個影一齊圍攻龍王，匕首喺空中劃出無數寒光，瘋狂刺向龍王嘅鱗片，雖然好多攻擊被鱗片擋住，但影嘅分身數量太多，龍王一時間應接不暇。龍王張開巨口，噴出一道熾熱嘅龍炎還擊，赤紅色火焰席捲戰場，瞬間消滅咗十幾個影嘅分身，但影嘅分身可以一直出現，消失再補充，繼續圍攻，逼得龍王左閃右避。
睇落，龍王好似處於下風咁，阿夢嘅死靈大軍同影嘅分身攻勢太猛，佢嘅鱗片上已經出現咗好多裂痕，毒霧令佢動作變得有啲遲緩。但龍王突然低吼一聲，血紅色雙眼閃過一絲怒意，佢張開巨口，一道龍息直噴向阿夢嘅位置！阿夢完全冇慌張，佢舉起魔杖，施展死靈屏障，一層黑色光幕喺佢面前升起，龍息擊中屏障，發出「轟」嘅一聲巨響，屏障勉強擋住，但濃霧被龍息嘅熱力燒散咗大半。
戰鬥好似一面倒，但其實龍王只係儲緊氣！佢突然一聲咆哮，巨大嘅身軀猛地震動，鱗片散發出一陣耀眼嘅紫光，佢張開巨口，一發龍神烈焰射出！紫紅色嘅火焰好似一道洪流，席捲整個戰場，影嘅分身慌忙走避，但好多分身都來不及逃，被火焰吞噬，瞬間化作黑煙。阿夢反應極快，佢緊急施展傳送術，身形一閃，傳送到範圍外，避開咗龍神烈焰。但佢嘅死靈大軍就冇咁好彩，胤鬼被燒成黑霧，骷髏貓同鬼巫師直接化作灰燼，連冥帝利修斯都被烈焰擊中，巨大嘅身軀轟然倒地，發出一聲哀鳴，鎖鏈斷裂，血紅色雙眼失去光芒。
阿夢望住死靈大軍死傷慘重，深紫色嘅眼睛終於閃過一絲冷意。佢明白死靈大軍對龍王作用唔大，決定自己輸出。佢揮動魔杖，濃霧中突然傳來一陣低沉嘅嗡鳴聲，一大範圍嘅黑色魔法箭雨好似暴雨咁瀉落龍王頭上！每支箭都散發紫光，喺空中劃出無數軌跡，密密麻麻咁擊中龍王嘅鱗片，發出「砰砰砰」嘅連環爆炸聲。影喺近戰位置見狀，慌忙走避，佢嘅分身喺箭雨中四處閃躲，差啲被誤傷。
龍王避唔到咁大範圍嘅招，只能用身體硬接，佢嘅鱗片喺箭雨中裂開更多，發出一聲怒吼。阿夢完全冇停手，佢接連射出幾發大招：死靈光波，一道巨大嘅黑色光波直衝龍王，擊中佢嘅胸口，發出「轟」嘅一聲巨響；冥神旋渦，一個紫色旋渦喺龍王腳下升起，試圖將佢吞噬；夢魘術，一陣紫色霧氣籠罩龍王，除咗持續扣減佢生命值，仲試圖令佢陷入混亂。
龍王吃痛，血紅色雙眼燃燒怒火，佢張開巨口，用龍息還擊，赤紅色火焰直噴向阿夢！冥帝利修斯喺呢一刻竟然起返身，佢跳到阿夢面前，硬接龍息，巨大嘅身軀被燒得冒出黑煙，但勉強幫阿夢擋住咗呢一擊。
龍王心中暗暗驚嘆，阿夢嘅魔力量同施法速度遠超佢嘅想像，佢覺得阿夢嘅實力完全超越咗半精靈杜爾。佢一邊頂住阿夢嘅瘋狂輸出，一邊提防住影嘅分身，影喺阿夢嘅招式中不停閃避，試圖用匕首斬向龍王嘅要害——龍頭。
龍王覺得再咁落去可能真係打唔贏，決定速戰速決。佢頂住阿夢嘅輸出，拍動巨翼飛起，巨大嘅身軀喺濃霧中盤旋，佢張開巨口，開始吸收月光嘅力量，鱗片散發出一陣銀白色光芒。影見狀，大聲提醒：「佢想用月龍吐息！」
阿夢冷靜咁回應：「我知呀，利修斯，阻止佢。」冥帝利修斯低吼一聲，跳向空中嘅龍王，巨大嘅拳頭同光波瘋狂輸出，試圖打斷龍王嘅施法。但龍王一個翻身，重重將利修斯摔落地上，泥沼被砸出一個巨坑，利修斯再一次倒地不起。阿夢又再努力向龍王射出好幾個法術，但都中斷唔到龍王。
阿夢見阻止唔到龍王，立即施法蓋起幾層冥神結界，係死靈屏障嘅進階版，黑色光幕一層接一層升起，打算硬擋呢一招。影跳到阿夢身邊，無奈咁講：「呢招你一個擋唔到。」佢完全冇防禦手段可以幫到阿夢。月龍吐息嘅範圍太大，二人根本無可能走避，亦遠超阿夢傳送術嘅範圍。
阿夢望住龍王，平靜咁講：「嗯，始終打唔贏，係我輕敵。」佢將魔杖放下，平靜咁等待死亡。
影喺佢身邊，綠色眼睛毫無波動，淡淡咁講：「嗯。」佢亦好似看破生死咁，企喺阿夢旁邊，等待結局。
龍王集氣完畢，血紅色雙眼散發出刺眼嘅嘅光芒，佢張開巨口，一道毀滅性嘅月龍吐息向住二人射來，銀白色光芒席捲整個死亡沼澤，濃霧被徹底撕裂，地面嘅泥沼喺吐息嘅熱力下瞬間蒸發！