《艾莉菲斯物語》（異世界穿越）: 第二十二章、青春悸動

嗨，讀者們！我係上帝，又返嚟同你哋講故事啦！上章講到阿夢同七聖賢之一嘅影喺死亡沼澤同龍王瑪爾艾路嘅史詩級大戰，戰鬥緊張到極點，阿夢同影正面臨龍王嘅月龍吐息，命懸一線！

Well大家都知我比較跳脫，我而家又想講返星光小隊呢邊，先唔講阿夢同影點樣脫險，等你哋心思思，呵呵。

Oh holy ____！我唔小心劇透咗佢哋會脫險，我鄭重道歉，我下次會小心啲......(作者好嬲咁望住我了)

算啦講返星光小隊，佢哋一齊返到馬利安城冒險者公會交任務。永誠交出流沙蟹嘅十條觸鬚，職員檢查完，笑住講：「任務完成！報酬係100卡索，請收好！」阿偉收咗報酬，笑住講：「今次任務好順利，多得洛希娜幫手！」

交完任務，時間仲係下午，陽光暖笠笠咁照喺馬利安城嘅街道上，氣氛好和平。永誠提議：「洛希娜，你而家正式加入咗星光小隊，不如搬去光影旅館同我哋一齊住啦！旅館有好多房間，應該仲有位！」洛希娜點咗點頭，笑住講：「好呀，我原本住嘅地方都好簡陋，光影旅館聽落好溫馨，我搬過去啦！」





於是佢哋一齊返光影旅館，幫洛希娜搬行李。洛希娜嘅行李好簡單，就一個背囊同幾件換洗衣服，佢之前一個人冒險，過得好節儉。本來佢哋諗住喺201房加張床，但考慮到洛希娜一個女仔同佢哋四個男仔同房可能會唔方便，佢咃都係諗住搵間房俾洛希娜。旅館老闆娘卡娜安排咗一間雙人房畀佢，就喺你哋201號房隔籬嘅202號房。洛希娜細聲講：「卡娜，其實我一個人住就夠，單人房都得。」卡娜笑住講：「唔得！聖職大人嘅隊友，點都要住得好啲！」

洛希娜佢哋搬好行李，喺202號房放低背囊，房間好溫馨，有一張雙人床，床單係淺綠色，仲有一個小窗戶，可以望到馬利安城嘅街道。佢望住房間，露出一個溫暖嘅笑容，細聲講：「真係好舒服，多謝你哋。」

時間仲早，洛希娜望住星光小隊提議：「而家先係下午，仲有好多時間。不如我帶你哋去買啲裝備啦？你哋而家嘅裝備品質都幾低，如果之後要去更危險嘅地方，裝備要好啲先安全。我知道馬利安城有兩間好出名嘅店，一間係武器店『煤堂』，一間係防具店『煌』，我帶你哋去睇吓！」永誠即刻點頭，笑住講：「好！有你帶路，我哋就放心啦！行啦！」

佢哋一行五人離開光影旅館，喺洛希娜嘅帶領下，先去咗武器店「煤堂」。煤堂位於馬利安城嘅西邊，店面好大，外牆油漆係黑色，仲有一個大鐵錘嘅標誌。入面嘅架上擺滿咗唔同武器，長劍、大劍、匕首、弓箭，仲有啲好特別嘅武器，例如用魔物骨頭做嘅直劍同用鱗片鑲嵌嘅戰斧。店老闆係一個滿面鬍鬚嘅大叔，佢見到樂希嘅白光，尊敬咁講：「聖職大人！歡迎蒞臨煤堂！您嘅隊友想買啲咩武器？」

洛希娜幫永誠揀咗一柄用鐵火龍骨造嘅大劍，劍身散發住一陣微弱嘅紅光，重量適中，劈砍時仲會有額外嘅衝擊力，永誠試咗幾下，笑住講：「呢把劍好順手！多謝你，洛希娜！」曉峰亦換咗一對新匕首，匕首用加卜里嘅毒囊浸泡過，刺中敵人時會有輕微毒性效果。洛希娜都幫自己換咗一張新弓，弓弦用飛奇亞嘅筋做成，拉弓時更有彈性，射程同威力都提升咗。





樂希原本都想搵支法杖，佢一直都係就咁用手施法，但老闆搖頭講：「聖職大人，對唔住！法系同聖系職業喺艾莉菲斯太少見，所以我哋店冇賣呢類武器。如果你要買魔杖，您可能要去到迷夢城，嗰邊有法杖或者聖職系嘅裝備賣！」樂希細聲講：「哦，唔緊要……」

跟住佢哋去咗防具店「煌」，煌喺煤堂隔籬，店面外牆係金色，門口有個大盾牌嘅標誌。入面嘅防具五花八門，有皮甲、鐵甲、布甲，仲有啲用魔物素材做嘅輕便斗篷。洛希娜幫阿偉揀咗一塊新盾牌，盾牌用安邦尼斯嘅骨造，非常堅硬，另外仲鑲嵌咗幾個史萊姆核心，防禦時會有少量魔法吸收效果，佢仲換咗一套鐵甲，考慮到阿偉係坦，重甲雖然重咗啲，但防禦力高，保護力更強。

洛希娜又幫永誠揀咗一套新皮甲，係用魔獅獸同火靈狐嘅皮毛造，有魔力加持，會提升穿著者嘅攻擊力，不過就有啲少布，永誠露出咗結實嘅上半身、短褲都係啱啱夠遮住佢嘅屁股，洛希娜揀完都有少少唔好意思，但永誠就冇乜所謂照著。曉峰就自己揀咗一套布甲，布甲更輕便，方便佢活動同暗殺。樂希就睇中一件白色斗篷，斗篷用飛兔嘅毛織成，保暖又輕，仲有少量魔法抗性。

買完裝備，洛希娜見時間仲有，笑住講：「不如我帶你哋去一間隱蔽嘅小食攤，食啲特別嘅甜品！馬利安城有種名小食叫『燒莫利斯』，你哋一定會鍾意！」星光小隊聽到有得食，即刻點頭，永誠笑住講：「燒莫利斯？聽落好正！行啦！」

洛希娜帶佢哋去咗一間隱蔽嘅小食店，店面藏喺一條小巷入面，門口連招牌都冇，但入面坐滿咗人，氣氛好熱鬧。小食店嘅老闆娘佳美見到洛希娜，笑住講：「洛希娜！好耐冇見！你帶咗新朋友來？快啲入座，我幫你哋整燒莫利斯！」燒莫利斯係用之前佢哋喺陽光海岸見過嘅鳥形魔物莫利斯整成。莫利斯嘅肉質好甜，佳美將肉切成薄片，用蜂蜜同星輝果汁醃過，再喺炭火上燒烤，烤到金黃色，香氣四溢。





星光小隊每人拎咗一串，咬落去肉質嫩滑，甜中帶有一絲果香，樂希忍唔住講咗句日文：「餓依斯呢……」洛希娜好奇問：「樂希你講咩？」

「哦，佢話佢餓到啲口水會拉絲呢。」曉峰即刻幫佢兜，但兜完自己都忍唔住笑。

阿偉同永誠都爆笑，洛希娜以為佢哋係笑樂希口水拉絲，都跟住笑。

永誠笑住講：「呢啲甜品真係一流！洛希娜，你真係識揀地方！」

食完燒莫利斯，洛希娜又話：「我哋再去幾個地方玩吓啦！馬利安城有好多有趣嘅地方，你哋一定會鍾意！」於是佢哋喺洛希娜嘅帶領下，渡過咗一個悠閒嘅下午。

佢哋先去咗一間位於城南嘅「魔物素材市場」，市場好熱鬧，攤販賣緊唔同魔物素材，例如史萊姆核心、飛奇亞嘅羽毛、加卜里嘅毒囊，仲有啲稀有嘅晶石，樂希同曉峰都好感興趣，但唔知點用就冇亂買嘢，其實買完裝備佢哋嘅資金都已剩無幾啦。

跟住佢哋去咗一間隱藏喺城北嘅「冒險者酒館」，酒館入面好多冒險者喺傾計，佢哋因樂希嘅身分被招待咗幾杯甘心花茶，坐低聽其他冒險者講最近嘅任務故事，永誠同阿偉聽得好入迷，洛希娜仲同一個熟識嘅冒險者打招呼，氣氛好輕鬆。

到咗傍晚，佢哋仲去咗城中心嘅廣場，廣場有個小型市集，攤販賣緊唔同嘅紀念品，例如用魔物骨頭雕成嘅小飾物、用星輝果汁整嘅糖果，仲有啲畫住馬利安城風景嘅畫卷。





樂希見到一幅畫，畫住一片星空，佢買咗，然後細聲講：「呢幅畫好似曦嵐會鍾意嘅星空…」佢講到呢度，眼眶有啲濕濕，阿偉喺一邊見到，默默咁拖住樂希嘅手，以示安慰，樂希感受到阿偉嘅溫暖，輕輕回握咗一下。

洛希娜見唔到樂希眼濕濕，但佢見到樂希買呢幅畫，佢問樂希：「樂希你好鐘意星空㗎？」

「嗯。」樂希回應。

「遲啲有機會帶你哋去一個地方，夜晚睇星空好靚。」洛希娜笑住講。

「好呀。」佢哋齊聲回應。

夜晚，星光小隊返到光影旅館，各自回房休息。

永誠訓喺自己嘅單人床上，佢望住天花板，突然發現自己有少少在意洛希娜。今日洛希娜帶佢哋四處逛，佢見到洛希娜溫柔嘅笑容同友善嘅態度，心入面有種青春嘅悸動。





佢諗起洛希娜幫佢著上新裝備，見佢咁少布有啲尷尬個樣，覺得佢好可愛。

佢唔知呢啲係咪戀愛嘅感覺，但心跳得有啲快。佢望向雙人床嗰邊，樂希同阿偉甜蜜咁攬住訓，兩人嘅睡臉都好安詳，永誠突然覺得有啲孤單，然後就不知不覺訓咗，但洛希娜嘅笑容仲喺佢腦海中揮之不去。

我望住呢個畫面，心諗咪係囉，永誠快啲溝咗洛希娜啦！永誠作為故事顏值擔當，以佢嘅顏值同健壯身材，如果佢哋唔係讀男校，應該一早名草有主啦！上帝真心支持誠娜CP！呢個故事唔可以得偉希CP！

好啦作者叫我收斂返少少......欲知後事如何，請看下回分解。