《艾莉菲斯物語》（異世界穿越）: 第二十六章、魔法之城

迷夢城，艾莉菲斯大陸嘅魔法核心，坐落喺紫霧山脈嘅山腳，四周籠罩著淡紫色嘅霧氣，陽光穿透霧氣，折射出七彩光暈，宛如夢境嘅畫卷。城牆由月光石砌成，表面流轉銀光，高聳嘅尖塔頂端懸浮住魔法水晶，散發柔和嘅藍色光芒。

街道上，魔法師嘅長袍隨風飄動，魔力驅動嘅懸浮馬車無聲滑過，路邊嘅燈柱會自己點亮，發出溫暖嘅橙光。空氣中瀰漫著薰衣草同魔法藥水嘅清甜氣味，令人心曠神怡。

星光小隊一行五人——樂希、阿偉、永誠、曉峰同洛希娜——喺完成聖果森林嘅古樹妖任務後，終於踏入呢座傳說中嘅魔法之都。佢哋揹著行裝，腳步輕快，沿著月光石鋪成嘅主街前行，永誠手上拎住古樹妖嘅樹皮，準備去迷夢城冒險者公會交任務。

「嘩，呢度真係好靚！」樂希瞪大雙眼，望著街邊一間魔法書店，書本喺櫥窗內自己翻頁，仲有幾本懸浮喺半空，散發金色光芒。

「同馬利安城完全唔同，感覺好似行入咗童話故事！」樂希繼續講。阿偉笑著拍咗拍樂希嘅肩，佢嘅騎士鐵甲喺陽光下反射暗紅色光澤。「傻豬，你唔係成日話想見識魔法世界咩？而家見到啦，仲唔開心到飛起？」





「係呀......」樂希紅咗紅臉，細聲回應。

永誠望向洛希娜：「洛希娜，你之前有冇嚟過迷夢城？」

洛希娜微微一笑，金色長髮喺微風中搖曳，藍色眼眸映著紫霧山脈嘅倒影。

「嚟過幾次，但每次都覺得好新奇。呢度嘅魔法氣氛真係獨特，連空氣都好似有魔力咁。」她指咗指街角一間噴泉，泉水喺半空化成一隻水晶鳳凰，展翅飛翔後又散落回水池，引來佢哋一行人嘅讚嘆。

永誠揹住鐵火龍骨大劍，雙手插袋，忍不住吹咗聲口哨。「真係誇張，連噴泉都會變魔法表演！話說，呢度嘅人好似冇咁尊敬樂希喎？」





洛希娜輕笑，解釋道：「因為迷夢城嘅人見慣咗法系職業，普通法師，甚至法師二轉嘅職業到處都係，祭司喺呢度仍然罕見，所以佢哋見到樂希會有啲尊重，通常會點頭示意。不過，唔似馬利安城嗰啲人咁誇張。」

如洛希娜所言，路過嘅冒險者同居民見到樂希時，多數會停下腳步，微微點頭，眼神帶著幾分敬意，但無馬利安城居民嗰種近乎跪拜嘅熱情。

樂希身穿白色聖職長袍，袖口繡著金色聖紋，外披飛兔毛斗篷，袍角隨風輕揚，隱隱散發白光，確實顯眼。佢有啲唔好意思，低頭細聲話：「但點解我仲係覺得有啲尷尬……」

「哈哈，你仲未習慣咩！」永誠拍咗拍樂希嘅背，隨即轉頭望向冒險者公會嘅大樓。「好啦，要交任務，搵到公會先！」

冒險者公會位於迷夢城中心，係一座由紫水晶同白玉砌成嘅宏偉建築，門口嘅魔法陣閃爍藍光，自動為來客開門。





星光小隊交任務嘅過程好順利，公會職員——一位紫髮女元素使——核對咗古樹妖樹皮後，微笑住遞上獎酬：300卡索。職員仲特意對樂希點咗點頭，說：「聖職者大人，感謝你哋幫諾籮村除害，歡迎經常嚟迷夢城！」

離開公會後，天色已近黃昏，紫霧山脈嘅餘暉灑喺城內，將月光石街道染成一片金紫交織嘅夢幻色彩。

洛希娜提議：「好似之前咁講，我哋今晚喺呢度留一晚，休息吓再計劃下一步啦。迷夢城有間好出名嘅旅館，叫甜夢旅館，環境好特別，有嘢玩㗎，你哋應該好鐘意。」

「旅館有嘢玩？聽落好有趣！」樂希雙眼一亮，興奮咁拉咗拉阿偉嘅手臂。「走啦走啦，我想睇吓係點樣嘅！」

甜夢旅館位於迷夢城嘅靜謐街角，建築外觀似一座小型城堡，牆身由淡藍色水晶石砌成，屋頂懸浮著幾顆發光寶石，散發柔和嘅光芒。

旅館門口嘅招牌上寫著「甜夢旅館——莫耶大人嘅魔法傑作」，字跡閃爍金色光芒，令人忍唔住想一探究竟。旅館老闆加里係一個中年男人，留著整齊嘅棕色鬍子，身穿深綠色長袍，袖口繡有魔法符文。佢見到星光小隊入來，熱情地揮手招呼：「歡迎光臨甜夢旅館！幾位冒險者，係咪搵地方休息？」

「係呀，我想問吓今晚有冇房？」永誠作為隊長，率先開口，順便打量旅館大堂。大堂空蕩蕩，只有一張木桌同幾把椅子，牆上掛著一幅莫耶嘅畫像，畫中嘅莫耶黑色長髮飄逸，眼神銳利，散發一股神秘氣場。

加里笑咗笑，點頭說：「有房呀！你哋係第一次住？同你哋講解下，我哋嘅房間好特別，係七聖賢莫耶大人親手設計嘅魔法空間。入去望落乜都冇，但你想要咩傢俱，只要講出來，房間就會用魔力變出嚟。唔要嘅時候，叫佢走就得，所有房入面嘅嘢一離開房間就會消失。同埋當然，要講啲合理嘅要求啦，不過房間會自己判斷合唔合理㗎啦，哈哈！」





「真嘅？咁神奇？」樂希瞪大雙眼，興奮到差啲跳起來。「可以變床、桌子、櫃，咁樣？」「呢啲完全冇問題啦！」加里遞上一把銀色鑰匙。「你哋嘅房喺三樓。試吓你哋嘅想像力，保證滿意！」

星光小隊迫不及待上到三樓，魔法鎖匙自動飛往303號房嘅門，門自動打開，果然如加里所言，房間空無一物，只有一片潔白嘅地板同牆壁，連窗戶都無，卻莫名散發一股溫暖嘅魔力氣息。

樂希入到房，即刻試探性咁說：「我要一張大床！」話音剛落，地板中央泛起一陣藍色魔光，一張雕花木床憑空出現，床上鋪著柔軟嘅天藍色被褥，仲有兩個羽毛枕頭。

阿偉見狀，忍唔住話：「真係誇張！我要一個衣櫃！」一陣魔光閃過，一個雙門衣櫃出現在床邊，櫃門上雕刻著星辰圖案。

永誠興奮地到忘記現時嘅身分：「我要一個籃球架！」房間沉默咗一秒，隨即地板上泛起藍光，只出現一個藍色嘅圓形球，彈咗兩下，滾到永誠腳邊。永誠呆咗呆，撿起球，眾人哭笑不得。

洛希娜好奇咁望著永誠手上嘅藍色球，眨咗眨藍色眼眸，問：「永誠，『籃球架』係咩呀？係某種武器定係裝備？」她嘅語氣充滿疑惑，顯然從未聽過呢個詞。永誠一愣，尷尬咁撓咗撓頭，笑著掩飾：「哈哈，冇啦！我亂講嘅！我想要個波玩啫！」他隨手拋咗拋個藍色波，尷尬咁笑。阿偉都喺一邊偷笑。

曉峰即刻幫佢轉移話題：「我要一張書桌同一個書架，上面放魔法書。」書桌同書架應聲出現，書架上擺滿厚重嘅魔法書，封面閃爍微光，彷彿真有魔力。





洛希娜則說：「我要一扇窗，望得到紫霧山脈！」牆壁上隨即出現一扇圓形窗戶，窗外嘅紫霧山脈喺夕陽下若隱若現，景色壯麗。

星光小隊喺房間內玩得不亦樂乎，試著變出各種傢俱：樂希要咗個小茶几放零食，阿偉要咗面全身鏡，永誠要咗個竹籃，佢抱著藍色波，將佢投入去，逗得大家哈哈大笑。

樂希忍唔住驚嘆：「莫耶大人真係好勁，呢間房好似有自己嘅意識咁，仲識得判斷要求合唔合理！」

「係呀，七聖賢真係好勁。」洛希娜點頭。

曉峰見洛希娜提起七聖賢，隨即諗起佢哋嘅目標，佢問：「係呢洛希娜，好奇問下，點先做到聖賢㗎？」

「唔......聽講係要對艾莉菲斯好有貢獻先做到，實際點做我都唔知。」洛希娜回應。

曉峰點頭回應。

「呀，係喎，樂希，你嘅裝備好似仲係最基本，連法杖都無。不如趁喺迷夢城，幫你買啲好啲嘅魔法裝備？」洛希娜又話。





「幫我買裝備？」樂希一愣，指咗指自己嘅白色長袍。「但我覺得呢件袍都幾好呀……」

「傻豬，你係我哋嘅核心治療，裝備點都要升級吓！」阿偉笑住揉咗揉樂希嘅頭髮。

「走啦，趁天色未完全黑，去搵間魔法用品店！」永誠話。