《艾莉菲斯物語》（異世界穿越）: 第二十八章、意外組隊

迷夢城嘅夜晚星光燦爛，月光石街道映照著微弱嘅燈光，星光小隊從聖安德泰隆魔法用品店離開，帶著戰利品粉藍色長袍同傳說級法杖「聖彩之願」返回甜夢旅館。

樂希緊握聖彩之願，法杖前端嘅七彩迷夢鑽喺夜色下閃爍，散發出一陣強大嘅魔力波動，引來街上唔少路人嘅注目。幾個法師模樣嘅冒險者停下腳步，低聲議論：「嗰把法杖……好似聖彩之願？」「冇可能啦！聖彩之願百年無揀過主人！」「但你睇嗰粒七彩迷夢鑽，仲有嗰陣魔力，絕對係傳說級！」

樂希感受到路人嘅目光，低頭細聲講：「好似好多人望住我……我哋係咪有啲太觸目……」佢嘅粉藍色長袍喺夜風中輕揚，白色條紋流光溢彩，配上聖彩之願嘅七彩光芒，確實顯眼得過分。

曉峰低聲提議：「聖彩之願太過注目，容易引來麻煩。樂希，不如用塊舊布遮蓋住法杖前端嘅迷夢鑽，費事太顯眼。」

永誠點頭贊成：「好主意！雖然法杖好靚，但太誇張真係唔好。」





阿偉亦笑著說：「咪係囉，傻豬，你而家好似個行走的魔法燈塔咁，遮一遮安全啲！」

樂希正想點頭，但喺呢一刻，聖彩之願好似聽得明佢哋嘅對話，法杖微微顫動，七彩迷夢鑽嘅光芒突然收斂，變得暗淡無光。法杖表面嘅魔力波動亦瞬間消失，望落只係一把普通嘅白色木杖，毫無特別之處，再無引人注目嘅氣場。

星光小隊呆咗一呆，洛希娜驚嘆：「聖彩之願……好似有靈性咁，竟然自己隱藏咗光芒！」

樂希低頭望著法杖：「多謝你，聖彩之願……你真聰明。」法杖喺佢手中輕輕震動一下，彷彿喺回應佢嘅感謝。樂希露出一個溫暖嘅笑容，隊友見狀都忍唔住笑起來，阿偉揉咗揉樂希嘅頭髮，笑住講：「傻豬，你仲會同法杖傾計！真可愛！」

有聖彩之願嘅「配合」，星光小隊順利避開路人嘅目光，返回甜夢旅館。喺旅館303號房嘅魔法空間內，佢哋再次玩起變傢俱嘅遊戲，樂希變出一個星空吊燈，洛希娜變出一張軟綿綿嘅地毯，永誠又一時太興奮想變出「Switch two」，結果房間諗咗一陣，變咗一隻「雪兔」公仔俾佢，洛希娜仲笑永誠原來都鐘意呢啲可愛嘅嘢，講錯嘢嘅永誠只好臉紅承認。





夜晚喺歡聲笑語中度過，星光小隊沉浸喺獲得新裝備同法杖嘅喜悅中，甜夢旅館嘅溫暖氣氛讓佢哋暫時忘卻冒險嘅壓力，度過一個開心嘅夜晚。

第二朝，陽光透過紫霧山脈灑入迷夢城，星光小隊喺旅館食完簡單早餐，收拾好裝備，準備啟程返回馬利安城。曉峰喺圓形木桌上攤開地圖，提議：「既然我哋要返馬利安城，不如去冒險者公會睇吓有冇啲可以喺迷夢城接、順路做、最後喺馬利安城交嘅任務。咁可以賺多啲卡索，又善用回程嘅時間！」

永誠點頭：「好主意呀曉峰，不愧係我哋軍師。」樂希都話：「嗯……希望有啲唔太難嘅任務……」洛希娜笑著講：「你而家有聖彩之願同新長袍，你嘅支援一定更強，我哋應該應付得到難少少嘅任務！」

星光小隊來到迷夢城冒險者公會，唔似馬利安城，呢度嘅公會大堂人唔多，只有寧星冒險者。樂希佢哋入到公會，喺告示板揀任務，卻突然聽到櫃檯傳來一陣爭執聲。

「連我都接唔到呢個任務？」一把冷漠嘅童聲響起，帶著一絲不滿。





星光小隊循聲望去，只見一個10歲左右嘅男孩站在櫃檯前，佢係死靈法師阿夢！

阿夢一身黑色長袍，袍上嘅紫色符文散發微光，灰白色短髮下嘅深紫色眼睛冷得像冰，身後跟著一隻骷髏，骷髏幫佢拎住一把散發不祥紫光嘅魔杖。佢嘅氣場陰暗而強大，連周圍嘅冒險者都下意識避開，櫃檯嘅職員滿臉為難，甚至有啲害怕。

職員結結巴巴回應：「阿夢大人……我當然聽過您嘅實力……但呢個任務只可以隊伍接，您……您冇隊伍……」

阿夢冷冷地講：「我一個夠打。」

職員擦咗擦汗，聲音顫抖：「我當然知……阿夢大人……但係規矩上……」

正喺呢個時候，阿夢轉頭見到星光小隊入嚟，佢嘅深紫色眼睛掃過樂希，認出佢係上次喺馬利安城公會見過嘅祭司。佢即刻同職員講：「咁我加入佢哋隊，應該可以接呢個任務啦？」

星光小隊完全唔知咩事，個個呆住。樂希一臉茫然，指咗指自己：「吓……我？」阿夢以為樂希係隊長，冷聲說：「係，我喺馬利安城見過你，加我入隊，然後接呢個任務。」

樂希慌忙擺手，然後指咗指永誠：「但……但永誠先係隊長……」，永誠被阿夢嘅目光盯住，頓時感到一股無形嘅壓力。阿夢身後嘅骷髏關節發出「咔咔」聲，紫光魔杖散發嘅陰冷氣息令星光小隊心頭一緊。阿偉低聲嘀咕：「呢個細路……氣場好恐怖……」洛希娜亦緊張地握緊長弓，曉峰警惕咁暗暗觀察阿夢。





永誠吞咗吞口水，硬著頭皮話：「呃……哦……好呀，如果你想加入，當然可以。」佢心諗：呢個細路係死靈法師，聽講好勁，應該唔會害我哋……係咪？

阿夢點咗點頭，毫無表情地轉向職員：「咁而家可以接任務啦？」職員如釋重負，連忙點頭：「可以！阿夢大人同星光小隊，請稍等！」佢喺登記簿上寫下「星光小隊臨時隊員：阿夢（死靈法師）」，然後遞上一張任務單，解釋道：「呢個任務係討伐聖果森林北邊封印洞穴嘅高階魔物死靈法老，任務完成後要喺馬利安城冒險者公會交任務。請各位伸出手臂，我幫你哋施放任務烙印。」

職員舉起一顆水晶球，施展法術，五道隱形嘅魔力烙印分別出現在樂希、阿偉、永誠、曉峰同洛希娜嘅手臂上，烙印無形無色，但隱隱散發一陣溫熱感。阿夢嘅手臂上亦出現烙印，佢冷淡地掃了一眼，冇講任何嘢。

職員好似仲有嘢未講完：「封印洞穴入面有好多中高階同高階魔物......阿我未講任務報酬，阿夢大人......」

星光小隊一頭霧水，但見阿夢已經轉身走向公會大門，連解說都未聽完，只好跟上去。出到公會外，迷夢城嘅晨光灑喺月光石街道上，阿夢停下腳步，轉身望向星光小隊解釋：「封印洞穴唔係隨便入得，必須有公會嘅任務烙印，先可以通過洞口嘅魔法結界。而且結界要求整隊人一齊入去，所以我需要你哋幫手。」

樂希問：「阿夢……點解你要接呢個任務？你好似連報酬都冇聽職員講……」

阿夢嘅深紫色眼睛瞥咗樂希一眼，冇正面回答，只冷淡地說：「我唔在乎報酬。到時我會好快殺完死靈法老，你哋自己返馬利安城交任務就得。報酬你哋收就得。」





永誠糾貼喺聽到「高階魔物死靈法老」，心頭一緊，佢擔心問阿夢：「封印洞穴會唔會好危險？死靈法老係咪好難打？」

阿夢面無表情，語氣平淡：「有我喺到，唔使驚。」佢身後嘅骷髏拎著魔杖，關節又發出「咔咔」聲，彷彿喺附和主人嘅自信。星光小隊面面相覷，雖然對阿夢嘅實力有所耳聞，但佢嘅陰暗氣場同孤僻態度都係令大家有啲不安。

一行六人沿著迷夢城西邊嘅小路出發，朝聖果森林北邊嘅封印洞穴進發。路上，樂希望著阿夢孤單嘅背影，忍唔住關心問：「阿夢……你點解成日一個人冒險？一個人會唔會好孤單？」

阿夢嘅步伐微微一頓，但佢冇轉頭，只冷淡地回應：「習慣咗。」佢嘅聲音毫無波動，卻隱隱帶著一絲難以捉摸嘅情緒。樂希想再問，但見阿夢嘅背影散發出一股拒人千里嘅氣息，只好閉嘴，低頭握緊聖彩之願。

聖果森林嘅樹影喺晨光下搖曳，空氣中瀰漫著清新嘅果香。星光小隊同阿夢一路都冇講嘢，氣氛略為尷尬。永誠試著打破沉默，問：「阿夢，死靈法老係點樣嘅魔物？有咩要準備？」

阿夢頭也不回咁回答：「高階魔物，擅長死靈魔法同詛咒術，會召喚骷髏同幽靈。對你哋來講的確有啲危險。但有我喺道，佢唔會有機會出手。」佢嘅語氣充滿自信，卻又好似帶著一絲不屑，彷彿星光小隊只係「累贅」。

喺後方嘅洛希娜低聲對永誠耳語：「我唔太鐘意呢個細路.....」佢身邊嘅曉峰都聽到：「我都覺得佢唔簡單，應該有自己嘅目的，佢講到可以好快殺死死靈法老，然後叫我哋叫交任務就得，咁佢呢？會留喺封印洞穴？」

經過半日趕路，星光小隊同阿夢終於到達聖果森林北邊嘅封印洞穴。洞穴入口隱藏喺一片濃密嘅樹林中，洞口被一層藍色魔法結界覆蓋，結界散發微光，隱隱傳來低沉嘅嗡鳴聲。





就喺準備進入之前，阿夢罕見地主動開口，佢嘅深紫色眼睛望向樂希手中嘅聖彩之願，冷冷咁講：「其實我一早留意到，你呢把法杖……應該係聖彩之願？」

樂希一愣，仲未回應，聖彩之願突然自行回復七彩光芒，迷夢鑽喺陽光下閃爍，七彩光暈流轉，彷彿喺回應阿夢嘅問話。星光小隊齊齊一驚，阿偉不禁吐糟：「法杖仲識自己答人？」

阿夢見到聖彩之願嘅七彩光芒，表情閃過一絲波動，但好快又回復平淡，佢語氣冷靜咁：「果然係，厲害。」佢講完就轉身面向洞口。

阿夢停下腳步，伸出手臂，隱形烙印喺結界前閃爍，結界隨即泛起漣漪，開啟一個可供通過嘅入口。佢回頭叮囑：「要一齊入去，跟緊我就得，記住，入去後唔好攻擊，唔好放任何法術。」佢嘅語氣不容置疑，目光掃過星光小隊，特別喺樂希同聖彩之願上停留一瞬。

星光小隊點頭，跟隨阿夢準備踏入封印洞穴。樂希緊握發光嘅聖彩之願，佢望著洞口，心頭有啲緊張，神秘嘅封印洞穴又會帶俾佢哋咩挑戰呢？