《艾莉菲斯物語》（異世界穿越）: 第二十九章、封印洞穴

星光小隊跟隨阿夢，踏入聖果森林北邊嘅封印洞穴。洞口嘅藍色魔法結界喺佢哋通過後緩緩閉合，發出一陣低沉嘅嗡鳴聲，隔絕咗外界嘅陽光同果香。

洞內唔似一般洞穴嘅黑暗，反而充滿一陣柔和嘅黃光。呢陣光源來自洞壁同地面生長嘅放光石——一啲拳頭大小嘅礦石，表面光滑，散發著溫暖嘅金黃光芒，宛如無數小太陽鑲嵌喺岩石間，將洞內照得通透。

洞穴內嘅空間遠超外界嘅想像，唔係狹窄嘅通道，而是一個廣闊嘅平原，受空間魔法影響，地形開闊得似一片地下草原。地面鋪滿細碎嘅放光石屑，踩上去發出輕微嘅「沙沙」聲，遠處嘅洞壁隱約可見，高聳得似山脈，頂部籠罩著一層淡淡嘅藍色霧氣，彷彿星空倒掛。空氣中瀰漫著一股清涼嘅魔力氣息，混雜著一絲難以捉摸嘅不安。

視野所及之處，魔物數量唔多。右邊遠方，兩隻綠色史萊姆喺平原上懶洋洋地彈跳，發出「咕嘰咕嘰」嘅聲音，體型同普通史萊姆無異，睇落毫無威脅。

阿夢瞥咗一眼，冇停留，佢細聲話：「往左邊行。」佢帶頭前行，黑色長袍喺黃光下拖曳出一道陰影，身後嘅骷髏拎著紫光魔杖，關節發出「咔咔」聲，跟隨佢嘅步伐。





星光小隊緊跟其後，樂希握著聖彩之願，粉藍色長袍嘅白色條紋喺放光石嘅映照下微微閃爍，加上聖彩之願嘅七彩光芒，畫面繽紛燦爛。

阿夢望著右邊嘅史萊姆，好奇問：「阿夢……點解呢度會有史萊姆？呢啲低階魔物喺封印洞穴好似有啲怪……」

阿夢步伐未停，平淡解釋：「啱啱嗰兩隻唔係史萊姆，係變形獸。高階魔物，可以變形成唔同魔物，佢哋最鐘意變成弱小嘅魔物，例如史萊姆，引誘唔知情嘅冒險者掉以輕心。」

阿偉插嘴，略帶緊張問：「好難打㗎？」

阿夢冷聲回應：「又唔係，但佢魔法抗性同回復能力好高，有啲麻煩。」佢嘅語氣帶著一絲不屑，彷彿變形獸喺佢眼中毫無威脅。





話音剛落，阿夢突然停步，毫無預兆地向後方射出一發黑暗彈。黑色能量喺空中劃過一道弧線，精準擊中一隻隱形嘅細小魔物。魔物發出一聲尖銳嘅哀鳴，身形顯露——一個僅半個人高嘅綠色生物，雙眼淡紫色，手中握著一把生鏽匕首，瞬間倒地，化作一團黑霧消散。

阿夢頭也不回，繼續前行，彷彿剛剛嘅一擊從冇發生過。星光小隊呆愣一瞬，永誠話：「嘩，阿夢，你點知有怪偷襲？好勁！」

樂希望著地上嘅黑霧，好奇問：「阿夢，啱啱嗰隻係咩魔物？不如你講解吓，等我哋認識多啲魔物。」

阿夢嘅步伐微微一頓，深紫色眼睛瞥咗樂希一眼，似有啲唔情願。但考慮到全靠星光小隊嘅任務烙印佢先入到封印洞穴，佢都係有解說：「高階魔物，低地精。擅長隱形偷襲，但通常冒險者唔係死於佢嘅匕首，而係因為佢全身帶劇毒。佢靠近你嘅一瞬，即使未有擊中，你都會立即中毒。不過佢弱點係防禦力算低。」

永誠瞪大眼，忍唔住話：「嘩，咁真係好危險！如果唔係你，我哋可能已經中毒！」阿夢冇理會永誠嘅誇讚，繼續帶路，黑色長袍喺放光石嘅黃光下顯得越發陰沉。





星光小隊交換咗個眼神，後方嘅曉峰低聲對洛希娜耳語：「阿夢嘅感知力好恐怖……我已經好專注周圍警戒，但完全冇察覺低地精。」洛希娜點頭，握緊長弓，低聲回應：「佢真係好恐怖……」

一行人繼續向左邊深入平原，洞內嘅空間魔法令距離感同時間感都變得模糊，佢哋都唔知自己行咗幾耐，平原景觀依然開闊，放光石嘅黃光映照著遠處嘅藍色霧氣，宛如夢境。

就喺呢一刻，樂希突然停下腳步，指著前方細聲說：「嗰邊……有個細路女？」星光小隊同阿夢齊齊望去，只見平原前方，一個小女孩孤零零地企喺放光石嘅黃光中，擋住去路。

女孩睇落只有六、七歲，著住一條白色連身裙，紫色雙馬尾喺微風中輕晃，藍色眼睛閃爍著天真嘅光芒，但係，佢有三隻眼，而且膚色係血紅色，睇落十分詭異。

佢嘅身影喺廣闊嘅洞穴平原顯得格外突兀，但又同封印洞穴嘅危險氣氛相襯。