《艾莉菲斯物語》（異世界穿越）: 第三十三章、聖殿之約
第二日早上，迷夢城陽光燦爛，空氣清新。星光小隊記得甘霖嘅邀請，一行人來到聖殿門口。眼前嘅建築莊嚴而神聖——一棟白色石樓，門前矗立住兩根高大石柱，柱上刻滿神聖符文，單靠氣場就令人肅然起敬。門口依舊有兩名身穿白甲、手持長矛嘅守衛嚴肅站崗。
幾人剛到，聖殿大門就緩緩打開，一陣溫暖聖光由內照出。一位銀白長髮與長鬚垂胸、身穿白袍、拎住木杖嘅長者慢慢步出。法杖杖頭鑲住一顆白色寶石，隱隱發光；佢眼神溫和，笑容慈祥，正係七聖賢之一——甘霖。
「你哋返嚟啦？」佢嘅聲音溫厚而緩慢，帶住長輩特有嘅慈愛語氣，「老夫想同樂希單獨傾下計。抱歉星光小隊嘅其他冒險者，你哋都知道，只有聖職系嘅人先可進入內殿。」
其他人點頭表示理解。
甘霖微笑補充：「不如你哋趁今日各自返自己職業工會，試驗下成長程度，學下新技能，搵工會導師練習下。日落前再返嚟聖殿門口集合，老夫會搵間餐廳請大家食晚飯，當作答謝你哋。」
永誠笑住話：「知道，我都想學下新技能。」
曉峰推眼鏡：「嗯......的確我哋都應該更新下啲技能。」
阿偉拍拍樂希膊頭，語帶不捨：「咁......你自己小心啲，晏啲見啦。」
樂希微笑點頭，和阿偉輕輕擁抱道別，然後和眾人簡單道別，轉身分頭離去。
樂希跟住甘霖步入聖殿，厚重嘅大門在背後徐徐關上，將城中喧囂阻隔，換來一片寧靜。聖殿正殿莊嚴宏偉，高大白石柱撐起拱形天花板，天頂係女神加爾安娜絲嘅巨大壁畫。地板由白色大理石鋪成，刻滿細緻金色符文，中央係金色聖杯祭壇，空氣似乎都充滿聖潔與安寧。
甘霖冇行入正殿，而係轉入一條側廊，帶住樂希進入一間會議室。牆壁以白石砌成，刻有簡單金紋，中央一張木質長桌，幾張高背椅整齊排列，天花板懸有淡藍光環照明，整體空間簡潔莊嚴，帶住神聖卻唔浮誇嘅氛圍。
「坐啦樂希。」甘霖微笑指住樂希面前張椅，自己亦在對面坐下。
「老夫聽聞你哋最近完成咗唔少冒險任務，表現唔錯。」佢語氣溫和，神情帶著長者特有嘅欣慰。甘霖微笑望住樂希，語氣溫厚：「老夫仲記得嗰日……聖彩之願親自揀選咗你，真係老夫活到今日都難得一見嘅深刻場面。」
樂希點頭，語氣帶住一絲謙虛：「嗯……但……我有時都會擔心自己配唔配咁勁嘅法杖。」
甘霖望住佢，語氣不改溫厚：「唔需要擔心。聖彩之願係加爾安娜絲女神親自製作，根據聖書記載，佢雖然唔係專屬聖職者使用，但只會揀內心純潔、意志堅定嘅人作為主人。老夫相信，你值得佢認可，加爾安娜絲女神都唔會睇錯人。」
佢輕輕撫過枱面嘅一本古書，指住其中幾頁：「記載中，聖彩之願擁有四項明確被動效果：
一、提升所有法術強度。
二、增加魔力量。
三、加快魔力自然回復。
四、當主人生命受到重大威脅時，自動釋放『加爾安娜絲聖域』，產生絕對防禦，短時間內免疫一切傷害。此技能冷卻時間為七日。」
樂希專注聽住，不時輕輕點頭。
甘霖補充道：「而根據某啲古老記錄……聖彩之願仲有可能存在未被發現嘅隱藏能力，會因主人成長與經歷而覺醒。你唔需要刻意追求，到時自然會知道。」
樂希凝望法杖，眼神明亮：「知道、甘霖大人……我會好好使用佢。」
甘霖微笑，望住佢：「樂希，你而家擁有強大裝備，戰力亦穩定提升……老夫想問，你參與冒險……係為咗咩？」
樂希一愣，臉微微泛紅，語氣帶著一絲羞怯：「我……我想成為聖賢。」
甘霖聞言，先是一怔，繼而朗聲笑起：「哈哈哈，有志氣！有遠大目標係好事，老夫鍾意你咁坦白！」
樂希鼓起勇氣發問：「甘霖大人，請問點先可以成為聖賢？」
甘霖語氣轉為較認真：「成為聖賢唔係靠晉升或推舉，而係由加爾安娜絲女神親自揀選，冇人知道確切條件，只知道女神只會選擇真正對艾莉菲斯有貢獻之人。當你夠資格果日，你心入面自然會收到佢嘅呼喚，佢會指引你去一個地方。」
樂希靜靜點頭，語氣堅定咁講：「我明白……我會努力到有一日……可以得到呢份召喚。」
甘霖摸了摸樂希的頭，笑說祝福佢：「願加爾安娜絲女神與你同在。」
會議結束後，甘霖微笑望住樂希話：「老夫睇你啲技能應該好耐冇更新過，不如老夫帶你去訓練場實地學習吓？今日咁啱溫妮放假，老夫親自教你。」
樂希聞言一怔：「……可以咩？」
「當然。」甘霖起身，神情輕鬆。
樂希眼神一亮，連忙起身跟上。
兩人沿著石質走廊行入聖殿側殿，穿過一道厚重鐵門，來到一處開闊而寧靜嘅地下空間，同之前溫妮教樂希嗰個場地唔同。呢個訓練場四周牆壁鑲有防魔結界，地面係平整嘅白石地板，中央擺放數個靶子與標準訓練陣列，牆角設有冷卻水晶與魔力補給裝置，一切設計都簡潔實用。
甘霖面對住樂希，然後語氣溫和而沉穩，開始一項又一項法術嘅講解與示範。
樂希全神貫注，每個細節都力求做到最好。在甘霖細緻指導下，佢接連掌握咗好幾項新法術。雖然身心都有啲疲累，但獲益良多，成就感滿滿。
一輪練習後，兩人坐喺訓練場邊緣長椅上休息，空氣中只剩下微弱魔力波動。
樂希抹咗抹額角，語氣誠懇：「多謝你，甘霖大人……你教咗我好多。」
甘霖搖搖頭，笑得溫和：「唔使客氣。教導有潛質嘅後輩，係老夫應盡嘅責任。」佢望住樂希，眼中閃過一絲欣慰：「老夫教過咁多學生，天賦最強嘅，有兩個人。你，樂希，係其中之一。另一個……係夢仔。」
「夢仔？」樂希微紅住臉問。
「係呀，死靈法師阿夢。話說，老夫都可以叫你希仔嗎？」
「嗯......」樂希害羞地點點頭。
甘霖哈哈一笑，摸住鬍鬚點頭：「好，咁老夫以後就叫你希仔啦。」
樂希遲疑咗一下，忍唔住問：「但係甘霖大人……阿夢好似唔係聖職系喎？」
甘霖笑容未改，語氣卻多咗一分幽遠：「唔，問得好，你想唔想聽少少故事？雖然……老夫可能有啲長氣，呵呵。」
樂希雙眼發亮，毫不猶豫地點頭：「想呀。」