《艾莉菲斯物語》（異世界穿越）: 第三十四章、成長之路
甘霖點點頭，深吸一口氣，緩緩講到：
「老夫記得……大概係一年零多前嘅事。
嗰時，夢仔只係個初到馬利安城嘅細路，話想成為冒險者，年紀好細，身形瘦削，佢天真爛漫、活潑好動，乖巧得嚟又有禮貌，第一眼望見，就覺得係個好得人鍾意嘅小朋友。
佢話自己喺鄉村有個師父，教咗佢一啲簡單劍術，原本打算走戰士路線。嗰陣，佢日頭練劍、晚晚複習技巧，一心諗住轉職成為戰士。
老夫因為一啲原因好早就認識佢，當時望住佢，心裡都笑咗出嚟，覺得佢好天真可愛。
但好快，一切都變咗。
夢仔照規矩去法師職業工會做下魔力潛能測試，佢諗住都係走個流程，反正冇乜人有魔法天賦。嗰日，喺法師公會當值嘅少有地係莫耶，你喺迷夢城都見過佢啦。嗰粒水晶球係佢親自設計，會因應測試者嘅魔力屬性散發唔同顏色嘅光芒，你當時就係純淨白光。但當夢仔雙手放上水晶球之後，成個水晶球，發出嘅，係濃郁而凝實嘅——黑色光。
真正嘅黑光，靜靜流動，連場內光線都好似被吸走。
莫耶被通知落樓後，當場面色劇變，甚至即刻將水晶球收起，吩咐封鎖場地。冇過幾多分鐘，佢就傳送過嚟，然後帶埋老夫一齊傳送，去到馬利安城法師工會嘅會議室，現場仲有另一位七聖賢——巫師加莉安娜。
黑色光芒，代表死靈天賦。
死靈法師已經好多年喺艾莉菲斯出現過。第一位死靈法師係古力格斯，但佢係半神，只係傳說入面提及過。第二位係杜爾，佢係一個半精靈。換言之，夢仔當時有機會係史上第一個人類死靈法師。
而且有樣好特別嘅事，一般人、甚至好多冒險者都唔知，死靈法師其實係由『祭司』進階而來，本來屬於聖職系二轉。但因為佢所操縱嘅係死者之力，違背常人對神聖嘅想像，所以長年以嚟，多數人都以為死靈法師係法師系轉職，甚至視之為邪惡存在。
嗰次會議，原本只係商討，點樣照顧一個擁有罕見天賦嘅小朋友，畢竟根本冇人類死靈法師出現過。但加莉安娜……就有自己嘅諗法。
佢係個對所有魔法都極度好奇、充滿執念嘅人。夢仔未講晒自己身世，加莉安娜已經主動提出要將佢接走，帶返去自己嘅塔樓，好好培育同研究。
老夫未出聲，莫耶已經黑晒面：『你講咩呀？點研究法？你想拎個細路去解剖定點？』
加莉安娜皺眉：『我有研究過死靈咒文，我最合適教佢，你都係專注返研究下魔物、分下級、整下水晶球啦，關你咩事！』
莫耶反擊：『我係負責管理艾莉菲師所有魔法，當然關我事。你成日亂嚟，又捉啲安琪亞嚟養，奇奇怪怪，如果出事，邊個收科？』
加莉安娜怒吼：『咁我養咩又關你咩事！』
講咗兩句，佢哋就開始動手。
加莉安娜率先放出一個火球直飛莫那，佢施法速度快得離譜，完全係半秒間嘅事。
莫耶反應都好快，瞬間發動傳送術避開，然後還擊一發魔導彈，一團白色、幾乎透明嘅能量球瞬間射出，速度快得肉眼難以捕捉，直撲加莉安娜面前。加莉安娜只係一抬手，一道火牆升起，將能量彈生生擋下，爆開出一圈炙熱氣浪。
老夫本來以為完咗，點知加莉安娜又再旋即反擊，一連三發雷矢同冰柱交錯擊出，空氣都發出劈啪聲。莫耶不慌不忙，用魔法結界遮擋，然後反手再發兩團魔導彈。
一時間，會議室變成魔法戰場，火花、氣浪、結界、煙霧……唔使十秒，半邊牆已經塌咗。老夫急忙架起聖盾術保護夢仔，怕佢被流彈所傷。
當然，老夫可以睇得出，兩個人都冇出全力，但即使只係小試牛刀，場面已經驚心動魄。
老夫唯有跳出嚟，使出命令術命令二人停下，強行中斷戰鬥。當然啦，佢哋想嘅話當然可以避開，但由老夫中止戰鬥，兩個都有個下台階。
最後，夢仔理所當然就交俾老夫照顧，兩人都算默認。
從嗰日起，夢仔就開始跟老夫喺聖殿修習，接受正規祭司訓練。」
甘霖飲咗啖水，眼神柔和，繼續：
「夢仔天賦極高，對聖術學得好快，幾個月內就掌握晒大部分治療同輔助技能。佢勤力、虛心、從來唔嫌辛苦，係老夫遇過最乖巧嘅學生之一。
佢都一直有出去冒險，記得佢當時好似有個半魔朋友，成日一齊玩。
好快佢就成長到可以二轉嘅時候。
我哋唯有坦白同佢講，佢唔可以轉做二轉聖職系職業，因為佢體內天生具有死靈魔力——只可以二轉成為死靈法師。
夢仔聽完，個人呆咗。
佢一向信奉女神、信光明，佢覺得死靈係邪惡，係冒犯信仰，係唔應該存在嘅東西。佢一度堅持唔二轉，甚至想退出冒險生涯。
加莉安娜日日嚟勸佢，有時哄，有時鬧，有時用故事講佢係天命之人；但夢仔……完全冇理過佢。
加莉安娜搵老夫幫手，而事實上佢雖然係有啲跳脫，的確無可否認係最適合教導夢仔嘅人，佢幾乎對所有魔法都有涉獵。更重要嘅係，你都知老夫可以探測人嘅內心，加莉安娜心入面，都係一片善念。
於是老夫親自坐低，同夢仔傾咗一整晚。
老夫講咗好多嘢，唔記得咁多，但好記得一段係咁講：『夢仔，死靈之力並非代表邪惡，魔力本身係中性。你係點樣使用佢，先決定你係咩人。你唔一定要放棄信仰，只要你願意守護人、幫助世界，咁你就係善良，加爾安娜絲女神都會祝福你。』
最後，佢終於點頭，願意轉職做死靈法師。
之後夢仔轉職做咗死靈法師。但代價……就係唔可以再入聖殿，所有聖職系技能消失。老夫當日送佢走出聖殿大門，佢攬住老夫喊得好淒涼，老夫心入面都好唔舒服。
佢後來去咗加莉安娜身邊學法術，過咗段日子，我哋聯絡少咗。
中間老夫都唔知發生過咩事，加莉安娜失蹤之後，夢仔變得冷淡、沉默。再見到佢嘅時候，樣同身形呢啲其實冇乜點變，仲係咁可愛，但眼神……比以前陰沉咗好多，都冇再見過佢笑。
老夫有試過問佢發生咗咩事。
但佢每次都淨係話：『冇事……』
再之後，佢就連應都唔應。」
甘霖講完，凝視住遠方若有所思。
樂希之後將星光小隊同阿夢一齊去封印洞穴嘅事一五一十同甘霖講。
甘霖聽完冇講咩，但神色好像變得有啲凝重。
「甘霖大人，我......我都覺得阿夢好孤單，之後見到佢嘅話，我會繼續鼓勵佢，同埋陪佢一齊冒險，如果佢願意嘅話。」樂希認真咁同甘霖講。
「希仔，你呢份善意真係難能可貴，加爾安娜絲女神果然唔會揀錯人。不過如果有咩事，真係隨時可以搵老夫傾訴或者幫忙。」甘霖感動地回應，然後將樂希輕輕攬住。
「好啦希啦，都差唔多日落，我哋去聖殿門口等你啲同伴啦。」
甘霖帶住樂希，慢慢行返出聖殿門口。
星光小隊嘅其他成員未見，但就遇到一個意想不到嘅人。