《艾莉菲斯物語》（異世界穿越）: 第三十八章、智破門衞
史坦尼斯迷宮嘅深處，昏暗嘅石廊蜿蜒曲折，牆壁泛著灰藍色微光，地面褐色石磚佈滿裂紋，隱隱散發魔力脈動。樂希孤身前行，手中握住阿偉平日用嘅直劍同盾牌，雖然聖彩之願被洛希娜拎住無法使用，但佢嘅聖職法術毋須依賴法杖。佢施放「照明術」，一團柔和白光漂浮喺頭頂，照亮前方狹窄通道，卻無法驅散迷宮帶來嘅壓抑。
通道兩側嘅牆壁刻滿不明文字，空氣中瀰漫淡淡腥味，彷彿魔物隨時會從黑暗中竄出。樂希嘅眼眸警惕地掃視四周，心跳略為加速，細聲自語：「阿偉……永誠……曉峰……洛希娜……希望你哋冇事...…」佢嘅腳步喺石磚上發出輕微「嗒嗒」聲，喺寂靜嘅迷宮中迴盪。
行咗幾步，通道突然變幻，前方嘅灰藍石壁化為深藍色，猶如夜空般深邃，牆面點綴無數細小銀光，宛如星辰閃爍，灑落一地碎光。地面石磚變成光滑黑曜石，反射星光，形成夢幻光景。樂希瞪大眼睛講：「嘩，好靚……好似星空咁……」佢伸手輕觸牆壁，銀光喺指尖跳躍，帶來一陣溫暖魔力，卻又迅速消散。
迷宮嘅美景減輕咗少少樂希嘅不安，佢繼續前行，卻發現前方出現三條分岔路，每條路嘅深藍星光牆壁一模一樣，無任何標記。樂希皺眉心諗：「點揀呀…..迷宮真係好麻煩……」佢隨機選擇左邊嘅路，行咗幾十步，卻發現通道兜回原處，回到分岔路口。佢再試中間嘅路，行咗一陣，通道盡頭係一堵死牆，牆上刻住一張嘲笑嘅石雕臉，彷彿喺譏諷佢嘅選擇。樂希咬唇，無奈咁講：「又錯……唯有慢慢試晒啲路。」
佢第三次選擇右邊嘅路，行咗幾分鐘，通道終於無兜圈，前方出現新嘅分岔路，卻有五條分支。樂希無奈笑說：「點解越嚟越多路？」佢逐一嘗試，每次錯路一係回到原點，一係遇上死牆，甚至有條路嘅星光牆壁突然暗淡，地面裂開小縫，差點絆倒佢。樂希小心翼翼，靠直覺同耐心，終於喺好多次嘗試後，行到一條正確通道，通道盡頭出現一道石門。
石門前嘅空地昏暗，中央魔法陣泛起淺藍光芒，一道身影從陣中浮現。樂希定睛一看，心頭一震——係永誠嘅複製體，手持鐵火龍骨大劍，眼神冷漠，戰意洶湧。喺佢身後，另一道身影出現，係洛希娜嘅複製體，持長弓，藍色眼眸鎖定樂希，準備射擊。兩者外觀與真身無異，只係全身都係淡藍色，卻散發住詭異魔力，宛如迷宮嘅幻影。
永誠複製體率先衝來，大劍劃出凌厲弧線，猛劈向樂希。樂希未及反應，只好急忙舉盾，硬接一擊，「砰」嘅一聲巨響震得佢手臂發麻，腳步後退。洛希娜複製體同時拉弓，數支箭矢破空而來，樂希側身閃避，一支箭擦過肩膀，劃出淺淺血痕。佢迅速施放「聖靈守護」，一層銀白光盾環繞全身，擋住永誠複製體嘅連續斬擊，光盾發出「咔咔」碎裂聲，勉強支撐。
洛希娜複製體喺遠處不停射箭，箭矢精準，迫使樂希左閃右避。永誠複製體趁機猛攻，大劍橫掃，又擊中樂希左臂，鮮血滲出。樂希咬牙，施放治癒術，溫暖白光癒合傷口，恢復氣力，但複製體嘅攻勢無停，佢心想：「唔可以咁落去……再咁落去……我頂唔住……」
樂希冷靜下來，腦海閃過甘霖同溫妮教導過嘅法術。佢暫時拋低直劍同盾牌，空出兩手專心施法，佢施放「安撫術」，一圈柔和金光擴散，籠罩永誠同洛希娜複製體。兩者動作一滯，眼神迷茫，攻擊短暫停止。樂希抓住機會，連續施放「聖束術」，銀白光帶從地面升起，瞬間纏住兩隻複製體，將其牢牢束縛，動彈不得。佢再施「繳械術」，一股無形魔力擊中複製體，大劍同長弓脫手，跌落地面，發出「啪嗒」聲。
樂希喘住氣，衝上前，迅速撿起地上嘅武器仿製品——大劍同長弓摸起來似泥土塑成，散發微弱魔力。佢見摸落係泥土質感，靈機一動，施放「還原術」，通用魔法將仿製武器分解，化為一堆褐色泥土，散落喺石磚上。聖束術效果結束，永誠同洛希娜複製體恢復行動，卻因失去武器，呆立原地，眼神空洞，無再攻擊。
樂希鬆咗口氣，細聲講：「得咗...…終於……」佢冇理會複製體，執返阿偉嘅直劍同盾，走向石門，推開沉重門扉，踏入一間小房間。
房間異常華麗，牆壁鑲嵌藍寶石，散發深藍光芒，猶如星河環繞。天花板懸浮數顆水晶球，緩緩旋轉，灑下七彩光點。地面鋪紅色絨毯，中央幾張雕花紅木大椅，椅背刻加爾安娜絲女神符文，旁邊一張小圓桌，放住銀色水壺同精緻茶杯，散發淡淡花香。房間三面各有一道門，前方金光閃閃，耀眼奪目，另外兩道同樂希入來嘅石門相同，緊閉無光。
樂希正想檢查金色大門，一把沉穩嘅聲音從房間深處傳來，帶著一絲讚賞：「我係史坦尼斯，估唔到你一個祭司，竟然係最快完成，當然都有運氣成分，但你對魔法嘅運用得宜，做得好好。你要喺呢度等埋另外兩組隊友，集齊後前面金色嘅門先會打開，你哋就可以見到我完成任務。你呢邊係打唔開佢哋嘅門，所以唔使諗住幫佢哋啦，好好休息。」
樂希點頭，細聲講：「知道……我會等佢哋。」佢望住金色大門，眼中閃過堅定，隨後坐上紅色大椅，柔軟椅墊讓佢放鬆下來。佢閉上眼，心中默默為隊友打氣：「阿偉、永誠、曉峰、洛希娜，你哋一定要平安。」
————————————————
另一邊箱，永誠同洛希娜並肩前行，永誠手中握住曉峰嘅雙匕首，鋒刃喺微光下閃爍寒光，卻因不慣用而顯得笨拙。洛希娜拎住樂希嘅聖彩之願，銀白法杖毫無反應，宛如普通木杖，毫無魔力波動。兩人嘅腳步喺寂靜通道中發出「嗒嗒」聲，伴隨偶爾嘅呼吸聲，喺迷宮深處顯得格外清晰。
永誠嘅心情複雜無比，心跳時快時慢。迷宮嘅詭異氣氛令佢不安，牆壁上不明文字同隱隱魔力波動彷彿預示未知危險，佢緊握匕首，棕色眼眸掃視四周，警戒住周圍嘅環境。但喺不安背後，佢心底卻竄起一陣莫名興奮——可以同洛希娜獨處，係難得嘅機會。佢偷瞄身旁嘅洛希娜，藍色長髮喺微光下輕晃，沉穩嘅藍色眼眸專注前方，佢心跳加速，暗想：「如果可以同洛希娜一齊過關，佢會唔會覺得我好型呢......」
洛希娜冇察覺永誠嘅目光，語帶緊張咁講：「唔知會唔會有魔物呢.....」永誠臉紅住，細聲講：「放心，我會保護你！」洛希娜輕哼一聲，嘴角微微上揚，似笑非笑，繼續前行。永誠見狀，心頭一暖，暗自為自打氣：「一定要好好表現！唔可以令洛希娜失望！」
兩人沿通道前進，石廊逐漸狹窄，灰藍微光愈發黯淡。行咗一陣，前方通道驟然變樣，原本嘅石壁同石磚消失，化為一片漆黑，猶如墮入無底深淵。黑暗吞噬所有光線，伸手不見五指，空氣變得冰冷，帶著一絲潮濕霉味。洛希娜停下腳步：「點解突然咁黑……完全睇唔到前面嘅路...…」佢皺住眉，藍色眼眸試圖穿透黑暗，卻徒勞無功。
洛希娜低頭望住手中嘅聖彩之願，銀白法杖喺黑暗中毫無光澤，宛如死物。佢想起樂希曾經同聖彩之願對話，於是模仿佢，輕聲對法杖講：「聖彩之願，可唔可以幫我哋，發光照明吓。」佢握緊法杖，閉眼祈求，但法杖毫無反應，連絲毫魔力波動都無。洛希娜嘆氣，平靜講：「果然……聖彩之願只認樂希...…我哋無照明手段。」
永誠拍拍心口：「冇光都好，我哋都要行！洛希娜，你跟住我，我開路！」佢伸手摸向牆壁，試圖靠觸感辨路，卻發現牆面冰冷滑膩，似覆蓋一層黏液，令人不寒而慄。洛希娜點頭，語帶少少驚恐：「嗯......知道。」佢緊跟永誠，兩人喺伸手不見五指嘅通道中緩慢前進，腳步聲喺黑暗中迴盪，格外刺耳。
行咗唔遠，黑暗愈發濃重，空氣中嘅霉味混雜一絲甜膩氣息，令人頭暈。前方突然傳來一陣細微聲音，似小女孩嘅歌聲，清脆而詭異。永誠心跳加速，細聲問：「洛希娜……你聽唔聽到......？」歌聲唱著艾莉菲斯著名童謠《甜夢夜》，音調天真如小朋友，卻帶著令人毛骨悚然嘅寒意：
「甜夢夜，星光閃，月兒彎彎喺天笑。
小朋友，跟我行，黑暗入面有光照。
手牽手，莫回頭，迷路寶貝唔使憂。
甜夢夜，永不醒，閉上眼，到盡頭.....」
童謠歌詞看似富有童真，卻細思極恐——「莫回頭」「永不醒」「到盡頭」等彷彿誘人墮入無盡黑暗，透出一陣詭異誘惑。歌聲喺迷宮迴盪，時遠時近，似從四面八方傳來。
洛希娜本來已經好驚，只係故作鎮定，聽到呢啲歌聲已經忍唔住將身軀靠近永誠，然後單手輕輕捉住佢嘅手臂。
「對唔住永誠，我可唔可以輕輕捉住你.....」洛希娜好害羞咁講。
永誠停下腳步，溫柔咁講：「洛希娜，你如果驚，唔介意嘅話，可以拖住我先。」說罷就將匕首收起。
「嗯.....」洛希娜立即喺黑暗中尋找永誠嘅手，然後緊緊拖實。永誠嘅心情好複雜，心入面好似觸電，心跳好似亂跳咁。
黑暗中佢哋都見唔到大家，為兩人減低尷尬感。
洛希娜一手握緊聖彩之願，另一手拖住永誠，兩人繼續向前行。歌聲繼續飄蕩，小女孩嘅笑聲夾雜其中，喺黑暗中縈繞，令兩人背脊發涼。
「手牽手，莫回頭，迷路寶貝唔使憂......」