《艾莉菲斯物語》（異世界穿越）: 第三十七章、迷宮試煉

樂希喺聖殿探望完阿夢就離開聖殿，會合喺出面等嘅小隊其他四人，前往冒險者公會。

一行五人穿越城中繁華街道，行入冒險者公會。樂希一入大門，瞬間吸引整個大廳注意。無論職員或其他冒險者，都對佢投以敬仰目光，樂希已經習慣咗少少。

企喺櫃檯後嘅公會職員見到樂希，馬上鞠躬行禮：「聖職大人同您嘅隊友，歡迎蒞臨。請問今日有咩可以為您效勞？」

永誠答：「我哋想接一個任務，自己睇任務板就得，等等。」

職員恭敬咁點頭，然後又話：「咁啱新開放咗一個特殊任務。報酬唔係卡索，而係由史坦尼斯親自提供——一件隨機裝備。」





阿偉皺眉：「史坦尼斯？」

曉峰解釋：「呢個我知喎，我睇過書，史坦尼斯係一隻巨魔，分類上佢係傳說線魔物，住喺迷宮深處，所以個迷宮都用佢個名命名，佢對冒險者友好，所以同公會有合作關係，定期會請冒險者送物資入去俾佢。任務內容應該係將一袋公會物資運送到迷宮深處俾佢。」

「冇錯，就係咁啦，同埋呢個係限時任務。」職員笑住點頭。

「啫係冇戰鬥？」阿偉露出半信半疑表情。

「唔敢保證。」職員臉色稍嚴肅：「每次有隊伍進入迷宮內，迷宮都會隨機自行產生特殊機制。每次觸發嘅效果都唔同。我哋只可以提供任務烙印，協助你哋通過傳送門入場。」





「限時任務？」永誠問。

「係，由接任務起計限時五小時。逾時會自動傳送出場，當作任務失敗處理。」職員補充道。

星光小隊面面相覷，討論後最後一致點頭：「接啦。」

職員啟動魔法儀器，逐一將冒險者烙印灼印於五人手背，透明符文微光閃爍，象徵已具備進入迷宮資格。

接完任務，因有時間限制，五人馬不停蹄啟程，根據任務提示來到陽光海岸南方一片接近海崖嘅草原。藍天白雲下，遠方浪濤拍岸，幾塊殘破石碑圍成一圈中央，一座古老魔法陣傳送點安靜地伏臥喺陽光之下。





「就係呢度。」洛希娜望住陣法輕聲講。

「準備好未？」永誠抬起手，戰意高昂。

五人點頭，一同步入魔法陣中。

地面泛起漩渦光芒，視野一陣旋轉——

下一瞬，所有人眼前景象已天旋地轉。

入到迷宮五人竟被分開，分成三組處於迷宮內不同位置，阿偉和曉峰；永誠和洛希娜；樂希獨自一人，而更詭異嘅係——

「咩話？」阿偉低頭望住手中——係永誠嘅鐵火龍骨大劍。

「點解我會拎住洛希娜把弓……」曉峰疑惑抬頭。





另一邊，永誠望住曉峰嘅雙手匕首皺眉：「點解嘅……」

洛希娜提起手中嘅聖彩之願，但法杖對佢毫無反應，暗淡無光，猶如普通木杖。

而樂希孤身一人，身處另一條陰沉長廊，手上係阿偉平日使用嘅直劍與盾，好彩佢其實唔使依靠法杖都可以施法，佢施放照明術照亮前方嘅道路。

迷宮內，牆壁泛著灰藍光澤，地面為褐色石磚構成，未知會否有陷阱同魔物。牆上掛有不明文字，空氣中有股淡淡嘅魔力，宛如生物心跳般微微脈動。

傳說中嘅「史坦尼斯迷宮」，考驗嘅唔單係戰鬥力，而係適應力、判斷力、決策力、與同伴間默契，更重要嘅可能係......運氣。

三組錯配裝備嘅星光小隊成員，各自在迷宮嘅不同角落，踏出咗屬於自己嘅一步。

———————





史坦尼斯迷宮其中一處石廊內，阿偉與曉峰並肩前行，神情戒備。兩人雖然被分開隊伍，但仍保持冷靜。

「啱啱傳送落嚟，啲武器就亂晒……好彩劍我都用開，雖然冇咁大把......」阿偉望住自己手上嘅武器，正係永誠嘅鐵火龍骨大劍，眉頭微皺，「唔知大家點呢……樂希會唔會同永誠佢哋一齊呢……」

「可能啦，唔使太擔心。」曉峰一邊調整手上嘅長弓，一邊話：「我哋都唔識用弓，更何況身上都冇箭，把弓根本用唔著。」佢索性將弓揹住，「要靠你打啦，如果有魔物。」

「嗯，交俾我啦。」

兩人繼續深入迷宮，周圍牆壁泛出淡淡藍光，照亮前方路徑。他們一路遭遇數隻之前見過嘅低階魔物，如史萊姆、流沙蟹、地龍。

阿偉拎住永誠把鐵火龍骨大劍，望住前方幾隻擋路嘅流沙蟹。佢哋龐大嘅身軀慢慢移動，兩隻像大鉸剪般嘅巨鉗不時發出「咔咔」聲，沙粒從灰黃色嘅硬殼上滑落。

「流沙蟹……唔難打。」阿偉咕噥。

其中一隻蟹突然揚起鉗腳，向兩人方向射出一團小型水彈，力量唔算強，但打中曉峰個膊頭，濺濕咗件衫。





「嗯，水彈都冇咩傷害。」曉峰輕鬆避開下一發。

阿偉毫不猶豫舉劍直衝，一劍斬落，正中其中一隻流沙蟹殼側。巨劍威力十足，即使阿偉未完全熟習，但硬斬一擊，仍然令蟹身裂出條血痕，流出一灘藍色液體。

「仲有兩隻，搞掂佢哋！」阿偉舉劍再揮，曉峰則側身掩護，提防蟹鉗攻擊。好快所有流沙蟹倒下。

冇行前幾多，又有兩隻史萊姆擋路，曉峰冇武器負責吸引佢哋注意力，阿偉手起劍落，直取佢哋核心。

至於地龍，同之前一樣見到人就逃走，兩人都冇打算追。

雖然武器唔係用開，但魔物戰力弱，阿偉仍能一一應付。

正當兩人收尾之際，通道邊緣又突然跳出幾隻白色毛茸茸嘅生物——雪兔。





「呢隻係咩？」

佢哋未見過雪兔，其實都係低階魔物，體型大過一般兔仔少少，眼睛泛藍，雪兔一見到兩人就發出輕微吟唱聲。下一秒，幾發淡藍色冰箭由兔仔嘴巴射出。

「遠程攻擊？」阿偉用大劍擋住。

冰箭打喺大劍發出啪嗒聲，凍氣瀰漫，但威力明顯不足，最多只能凍住表面，仲好快溶化。

「……傷害好低，應該唔勁。」阿偉話聲未落，已經一劍掃過，將幾隻雪兔連根清走。

曉峰推眼鏡：「估計係最基本冰魔法，低階魔物……冇威脅。」

「但真係幾煩，咁多怪出嚟。」阿偉望住雪兔屍體，嘆咗口氣，「希望佢哋都順利啦。」

佢哋行至一處較開闊空間，周圍刻有圓形魔法陣，中央立著一道緊閉石門。

「有道門……有隻守門魔物？」阿偉低聲。

一道淺藍色人影現身於魔法陣中。對方外形與樂希幾乎完全一樣，只係全身都係淡藍色，神情冷漠，手持仿製聖彩之願。

「唔係樂希——係魔法複製體。」曉峰立刻分析。

複製體毫不猶豫，抬手釋出一道聖光彈，飛向阿偉。

阿偉驚叫：「嘩！」急忙閃避。

曉峰卻冷靜觀察：「聖光彈應該只對死靈系生物有效……」

佢故意唔避開，結果光彈打喺佢身上果然毫無反應。

樂希複製體再施展新法術，銀白光帶纏住阿偉身體，令其無法動彈。

「應該係……琴晚樂希話佢新學嘅其中一招法術，聖束術。」曉峰判斷。

阿偉掙扎：「點解除呀……郁唔到……」

不過數秒後，束縛自動解開。

曉峰話：「個技能有限時。你快啲斬咗隻複製體啦，唔打贏佢開唔到門。」

阿偉卻猶豫：「但……佢好似樂希，我唔捨得落手。」

「都唔係真人！」曉峰無奈，「算啦你俾把劍我。」

佢接過大劍，卻發現重量驚人，只能喺原地笨拙揮動幾下。

樂希複製體再度出手，施展另一新法術——繳械術。曉峰手中大劍自動脫落，彈到地下。

「呢招又係新學嘅……繳械術。」曉峰低頭，準備撿返。

複製體再度放出聖束術，兩人一齊中招，一時無法動彈。

「唉，佢應該傷害唔同我哋，但好煩……」曉峰無奈道。

阿偉深吸一口氣，解除束縛後重新拎返大劍，咬緊牙關：「算啦，都係我打……」

佢衝向樂希複製體，複製體釋出聖靈守護，形成防禦光盾，都係樂希琴日學嘅新技能，之後又以治癒術回復傷害。

阿偉沉著應戰，攻擊節奏雖被干擾，但憑藉實力穩紮穩打，戰鬥陷入持久僵局，阿偉一邊打，樂希複製體一邊補，間唔中又用啲控制技噁心下佢哋，曉峰都走近用把弓敲佢，傷害幾乎冇，但複製體唔識分，會分心防禦。

迷宮內，戰鬥火光閃動，兩人同一個熟悉面孔嘅幻影纏鬥不休。