《艾莉菲斯物語》（異世界穿越）: 第四十四章、溫馨之夜
艾莉菲斯嘅日落染紅天邊，晚霞如絲，星光小隊拖著疲憊身軀，踏上歸途。
同哥布林將軍嘅大戰仍喺佢哋腦海迴盪，尼奧修斯嘅烈焰同星光小隊嘅虛攻戰術成為佢哋首次獨力擊敗高階魔物嘅輝煌記憶。
樂希、阿偉、永誠、洛希娜同曉峰一齊穿過城門，天色漸黑，街燈點亮，馬利安城嘅石板路映著柔和光芒，食肆同攤販嘅叫賣聲此起彼落。
隊伍直奔冒險者公會，交還馬索營地討伐任務嘅證明——尼奧修斯嘅戰斧碎片。公會職員驗證後，遞上1000卡索報酬，驚嘆道：「聖職者大人，您同您隊伍星光小隊真厲害！尼奧修斯係高階魔物，你哋咁快完成任務！」永誠笑說：「當然啦！」樂希就臉紅住講：「都係我隊友嘅功勞......」
之後，佢哋聽從加爾安娜絲女神嘅聲音，計劃去法師公會，用水晶球進行二轉，卻發現公會大門緊閉，公會門口旁邊有個唔起眼嘅木牌，寫住「營業時間：早晨至黃昏」。
曉峰推一推眼鏡，語帶無奈：「過咗營業時間……我哋聽日先再嚟啦。」永誠點頭，笑住講：「既然咁，不如去露珠餐廳食大餐慶祝！好耐冇一齊食大餐！」
露珠餐廳係馬利安城著名食肆，星光小隊曾經喺嗰度聚餐，眾人都同意永誠嘅建議，興奮前往。
露珠餐廳一間包箱入面，燈火通明，木桌鋪住紅布，牆壁掛滿冒險者徽章，空氣瀰漫烤肉同香料嘅誘人氣味。食物放滿一桌：烤地龍肋排、香草燉雪兔、蜜汁火山雞腿，馬利安炒飯，配上馬利安特釀麥酒。
永誠舉杯：「為我哋首次獨力打敗高階魔物，乾杯！」眾人碰杯，笑聲響徹餐廳。阿偉攬住樂希，餵佢一塊火山雞，樂希臉紅，但都照畀佢餵。洛希娜同永誠相視一笑，甜蜜溢於言表。
飯後，永誠牽起洛希娜嘅手，同佢嘅隊友講：「各位，我想同洛希娜兩個行下街，散吓步。」洛希娜臉紅，點頭講：「嗯……你哋返去先啦。」
「傻豬，咁我哋都要去拍下拖！」阿偉有樣學樣，攬住樂希講。
「吓？咁啫係唔預我玩啦？」曉峰半吐槽半講笑道。
「曉峰，唔係咁嘅……你都可以同我同阿偉一齊行街呀！」樂希靦腆咁笑住講。
曉峰搖頭，無奈講：「我先唔要做電燈膽！」
洛希娜一愣，藍色眼眸疑惑，問：「電燈膽？係咩意思？」作為非穿越者，佢對現代俚語一無所知。
永誠即刻打圓場，笑講：「哈哈，曉峰一定係太羨慕我哋，搞到亂講野！」
「係呀，算啦，我都係返旅館睇書。之前買咗本《艾莉菲斯魔物圖鑑》，仲未睇完。」曉峰聳肩。
眾人哄笑，分開行動，永誠同洛希娜、阿偉同樂希兩對分別漫步馬利安夜市，曉峰獨自返回光影旅館。
馬利安城嘅夜市熱鬧非凡，石板街上燈籠搖曳，攤販嘅叫賣聲同小食攤食物嘅香氣交織，行人川流不息，街燈映照著歡笑嘅面孔。
永誠牽著洛希娜嘅手，兩人肩並肩，步伐輕快，彷彿夜市嘅喧囂只為佢哋而存在。洛希娜嘅藍色長髮隨風輕晃，映著燈光，永誠偷瞄佢講：「洛希娜，你好靚……同你一齊行街，我心跳得好快。」
洛希娜臉紅：「永誠……呢到咁多人，你唔好咁大聲……我會怕醜...…」佢輕捏永誠嘅手，眼中卻滿是甜意。
佢哋停喺一個飾物攤前，攤上陳列銀鏈、寶石戒指同雕花手鐲等，燭光下閃爍溫暖光芒。
洛希娜嘅藍色眼眸被一對情侶頸鍊吸引：銀色細鏈，吊墜為半顆心形藍寶石，兩條合併成完整心形，漂亮宛如星光凝結。
佢輕觸吊墜，細聲同永誠講：「呢對好靚……好似我哋喺星願草山丘睇嘅星空咁……」
「我都覺得呢對好適合我哋！送畀你好唔好？我戴一條，你戴一條，連繫我哋嘅心。」永誠深情咁望住洛希娜。
洛希娜臉頰更紅，微微點頭：「嗯……好，我哋一齊戴...…約定好唔准除！」
永誠付了卡索，輕輕幫洛希娜戴上頸鍊，藍寶石吊墜貼著佢嘅鎖骨，映出星點光芒。
佢低頭喺洛希娜耳邊講：「你戴得好好睇...…我哋嘅心，以後永遠連繫。」
洛希娜抬頭，藍色眼眸閃爍：「永誠，我會一直戴住，多謝你……」佢踮起腳，輕吻永誠臉頰，永誠愣住，隨即咧嘴笑，牽緊佢手。
佢哋繼續漫步，去到一個甜品攤，買咗由迷夢城運送過嚟嘅甜品「霜晶露」，一種類似雪糕嘅甜品，用冰系魔法冷凍果汁製成，呈半透明藍色，綴以蜜漬野莓，盛喺水晶碗中，散發清涼果香。
永誠舀起一匙餵洛希娜：「試吓。」
洛希娜小口一嚐，藍色眼眸亮起，驚喜講：「好甜好清涼！永誠，你試吓！」佢舀一匙餵永誠，永誠笑著吃下：「真係幾甜喎！但你嘅笑容比霜晶露仲甜十倍！」
「又咁大聲。」洛希娜臉紅，輕推佢手臂。
佢哋對坐喺攤旁木桌，分享霜晶露，笑聲同甜品嘅清香交織，夜市燈光為佢哋灑下溫暖光暈。
離開甜品攤後，佢哋去咗馬利安劇場，睇特技人嘅火舞表演，火焰喺空中畫出絢麗弧線。
佢哋坐喺劇場後方，洛希娜依偎住永誠，同佢耳語：「永誠，嗰陣你就死同我表白，我真以為會失去你……可以同你一齊，好似發夢咁，我好開心。」
「洛希娜，我應承過你，會一直守護你。我想永遠同你一齊，我哋永遠都咁開心。」永誠輕摟佢肩膀。
洛希娜抬頭深情凝望，藍色眼眸映著火光，佢哋十指緊扣，喺火光中對視，愛意如星光流轉，溫暖夜色。
佢哋最後漫步到夜市旁邊嘅星願橋，橋欄掛滿戀人嘅許願信，河面映著星空。
永誠同洛希娜靠喺橋欄，永誠同洛希娜講：「洛希娜，我哋之後一齊冒險，一齊睇好多好多星空，好唔好？」
洛希娜甜笑：「好……我仲想同你一齊，試好多甜品，睇好多風景，永遠一齊......」
「好啦，咁約定好！呢對頸鍊同呢個願，會陪我哋一世！」佢哋喺星願橋上輕輕相擁，河面星光閃爍，彷彿為佢哋嘅愛情作證。
樂希同阿偉漫步喺夜市另一邊，石板街燈光柔和，攤販嘅香料氣味同笑聲交織。阿偉攬住樂希嘅肩：「傻豬，好耐冇得我哋兩個行街啦。」樂希臉紅：「嗯......」佢眼中滿是甜意，輕靠阿偉胸膛，兩人步伐悠然。
佢哋停喺一個攤，買咗一盞星願燈，燈身畫滿星空圖案，點燃後散發微光，照亮夜空。阿偉同樂希一齊放飛燈籠（類似孔明燈）。
「傻豬，許個願啦！」
「我希望……我哋永遠一齊……」阿偉笑住講：「傻豬，你嘅願望同我一樣！」燈籠升空，融入天上嘅星海，兩人相視而笑，愛意喺燈光中流淌。
佢哋又去咗街角嘅音樂攤，聽吟遊詩人彈奏風琴，曲調悠揚，似喺到述說艾莉菲斯嘅傳奇。
佢哋行到一個街角，樂希依靠喺阿偉臂彎，阿偉低頭親吻。樂希臉紅，心頭暖笠笠，兩人喺音樂中依偎，夜市嘅喧囂只係佢哋嘅襯托。
之後，樂希同阿偉返到光影旅館，推開房門，曉峰坐喺桌前，翻閱《艾莉菲斯魔物圖鑑》，燭光映照住佢嘅眼鏡。樂希探問：「曉峰，永誠同洛希娜仲未返到咩？」
曉峰抬頭，嘴角揚起一抹邪笑：「返咗啦！但永誠話今晚去洛希娜房訓喎......」
阿偉聞言，眼睛一亮，邪笑講：「哦……佢個衰仔，先一齊冇耐，就想『深入交流』......」
樂希先是一愣，隨即明白佢哋嘅意思，臉紅得似熟透蘋果，低頭細聲講：「你哋…講咩呀……」
「傻豬，咁我哋今晚都不如都交流下......」阿偉色迷迷咁望住樂希。
「吓......你又亂講咩呀，曉峰喺到㗎。」樂希輕輕推開阿偉。
「叫曉峰『七街訓』咪得。」阿偉鬼馬地模仿某知名人物。
「我打獲你就得。」說罷曉峰作勢追打阿偉，阿偉企喺樂希後面幫自己擋住。
佢哋對視，笑聲響徹房間，旅館嘅燭光為呢場玩笑添上溫暖尾聲。