《艾莉菲斯物語》（異世界穿越）: 第四十三章、尼奧修斯
馬索營地嘅石台上，哥布林將軍尼奧修斯屹立戰場，綠血染污破爛鐵甲，巨型戰斧閃爍寒光。
星光小隊圍繞石台，永誠、阿偉、洛希娜、曉峰同樂希氣喘吁吁，傷勢雖有樂希嘅「治療術」回復，但尼奧修斯嘅瞬移、火球同召喚術攻勢兇猛，雙方勢均力敵，戰鬥陷入膠著。
見戰況膠著，尼奧修斯突然咆哮一聲，紅眼閃爍兇光，戰斧插入石台，魔力波動暴漲。佢嘅綠皮膚燃起赤紅火焰，鐵甲熔化，化為一團烈焰包裹嘅人形。
尼奧修斯進入最終形態——火法師形態，渾身烈焰熊熊，猶如活生生嘅火神，綠皮膚化為焦黑，雙眼如熔岩般赤紅，長髮飄動如火焰流蘇，身軀散發熾熱氣浪，燒焦周圍草地。佢雙手一揚，魔力托舉，漂浮喺空中，石台烈焰隨之沖天，戰場化為火海。
永誠舉起鐵火龍骨大劍講：「佢變咗身！大家小心！」
尼奧修斯冷笑，雙手燃燒，施展「火焰風暴」，無數火球如隕石雨轟向隊伍。永誠施「旋風斬」，劍氣橫掃，勉強劈散幾顆火球，卻被熱浪逼退，手臀被燒傷。
阿偉舉劍施展「破風斬」，用氣刃抵消幾個火球，但仍然被火焰灼傷，佢對住隊伍講：「呢個形態好棘手......」
洛希娜拉弓使用「連射」，箭雨射向尼奧修斯，卻被佢施展「火牆術」，熾熱火牆環繞身軀，箭矢觸及即焚，化為灰燼。洛希娜咬牙再用「精準射擊」，箭矢穿過火牆縫隙，擦中尼奧修斯焦黑手臂，卻僅留淺痕，佢細聲講：「火牆防禦力好高...…我嘅箭射唔入！」
樂希用「聖靈守護」，銀白光盾護住隊伍，擋住火焰風暴餘波，佢再用安撫術同聖束術，但發現對呢個形態嘅尼奧修斯無效。佢無奈咁同隊伍講：「呢個形態魔法抗性好高......」
漂浮空中嘅尼奧修斯，又再用新攻擊法術「火焰連鎖」，火光如鞭，連環抽向隊伍。永誠用「大劍衝鋒」，試圖近身，卻被火鞭擊中胸口，燒傷冒煙，佢翻滾避開，佢話：「咁樣好難近身打！」
阿偉盾牌硬擋火鞭，卻被熱浪燒傷手臂，樂希一邊用「治療術」，白光癒合傷勢，一邊提醒：「阿偉！小心！」
曉峰潛入陰影，再用「背刺」，匕首刺向尼奧修斯，卻被火牆燒焦手臂，佢被逼退後。
洛希娜成為主力輸出，先用「彈射箭」，箭矢分裂，試圖繞過火牆，卻多數被焚毀，僅一箭射中尼奧修斯肩部，焦黑皮膚裂開，綠血滴落。佢再施展「連射」，箭雨連發，逼得尼奧修斯瞬移閃避，卻仍被火牆擋下大半。佢不停輸出，喘住氣講：「我嘅箭...…傷佢唔夠深……點算……」
星光小隊苦無對策，尼奧修斯嘅火焰法術如狂風暴雨，火牆環繞，近戰職業無法靠近，洛希娜箭矢難破防。
「我哋冇水系法術…點同佢鬥火焰？」永誠講。
「可惜寧寧唔喺到，佢用水魔法應該可以好快殺到佢。」阿偉諗起曾經帶住佢哋攻略羅森洞穴嘅魔源組元素使寧寧。
「我哋要搵方法……唔可以再拖......」樂希用「聖靈守護」展開光盾，勉強擋住襲來嘅火球，光盾卻漸漸裂開。
突然，尼奧修斯漂浮得更高，單手燃燒，開始詠唱，魔力波動暴漲，空中凝聚熾熱火雲，似要釋放大招。
曉峰急忙講：「佢好似要放大招！洛希娜，打斷佢！」
洛希娜用「箭雨」狂攻，卻被尼奧修斯一邊詠唱一邊施展「火牆術」，四道火牆環繞，箭矢全數焚毀。
「佢可以一邊詠唱法術，一邊用火牆擋……點打斷？」洛希娜驚訝咁講。
樂希觀察戰場，然後話：「等等...…其實我一直有留意，火牆數目應該有上限，佢每次最多同時放四個出嚟。」
「唔，好好嘅觀察，的確好似係咁。我哋五個人，只要同時攻擊，佢就擋唔晒！但代價係我哋近戰要硬闖火牆，可能會受傷。」曉峰眼中一亮，低聲講。
「冇問題！痛一陣怕咩，樂希會補返！」「我都可以，我本來就負責坦傷！」永誠同阿偉都同意。
樂希皺眉提出：「但係曉峰，我嘅聖光彈無傷害……」
曉峰冷靜咁分析：「佢專心詠唱，應該判斷唔到你會放咩技能，就算聖光彈無效，佢都應該會用火牆擋！」
佢靈光一動諗到一個計劃，示意眾人圍近，隊員快速聚攏，曉峰低聲佈置，眾人點頭，分散開來。
永誠同樂希企喺一齊，洛希娜、阿偉、曉峰各佔一個方向，五人圍住漂浮嘅尼奧修斯，戰意高昂，準備突破火牆，終結呢場烈焰之戰。
「進攻！」永誠一聲令下，眾人開始作戰計劃。
佢先用「狂熱」增加速度，然後抱起樂希用突進技「大劍衝鋒」衝向半空中嘅尼奧修斯。同一時間，喺另外三個方位，阿偉用「直劍突刺」衝向佢；曉峰化作暗影跳向佢準備「背刺」；洛希娜「精準射擊」嘅箭矢都飛向佢。
如同曉峰諗嘅一樣，尼奧修斯喺四個方位都用火牆防禦。永誠將抱住嘅樂希拋向空中，大叫：「係機會喇樂希，用絕招！」
樂希被拋至高過火牆，佢舉起聖彩之願，蓄力施法；尼奧修斯用到聖彩之願爆發嘅七彩光芒，怕被咩大招打中，急忙施展「瞬移」閃開，但卻始料不及嘅係，樂希只係射出一發聖光彈，根本唔係咩大招。
「真係機會！」永誠同洛希娜齊聲大叫。
曉峰早已睇穿尼奧修斯慣性向右瞬移，佢閃到尼奧修斯瞬移後嘅位置，手起刀落用「割喉暗殺」，尼奧修斯瞬移後未及調整姿態，就被曉峰嘅匕首刺穿咽喉，一命嗚呼，佢變回原本嘅形態倒地氣絕，星光小隊虛攻戰術成功。
打敗尼奧修斯後，雖然樂希幫大家都回復好，但佢哋都累極跌坐喺地上休息，冇力氣興奮慶祝。
「冒險者，你已成長到有足夠實力，請去馬利安城嘅法師公會水晶球進行二轉。」一陣空靈嘅女性聲音喺各人嘅心入面響起。
「你哋......聽唔聽到心入面有把聲......」樂希驚訝咁問。
「嗯。」「聽到呀。」「嚇死我仲以為自己有幻覺。」「傻豬我都聽到！」
一場驚心動魄嘅大戰過後，星光小隊終於成長到被加爾安娜絲女神認可，得到轉職成二轉職業嘅資格。
佢哋拖住疲累不堪嘅身軀，懷住興奮雀躍嘅心情，行返馬利安城，預備交任務同進行二轉。