《艾莉菲斯物語》（異世界穿越）: 第四十六章、艱難決擇
曉峰輕推眼鏡踏前，走近水晶球，雙手觸碰球面。水晶球綻放幽暗紫光，如夜幕下嘅暗影，詭秘光芒籠罩曉峰，映照大廳地板，牆上壁畫似隨之隱沒。球內魔力流轉，三道光影浮現，化為三個職業名稱：殺手、暗殺者、斥侯，文字懸浮空中，散發黯淡銀光，曉峰眼中閃過銳利光芒。
「好！曉峰，水晶球畀咗你三個刺客二轉職業，我同你講解吓！」馬莉娜娜指住「殺手」，驚喜講：「嘩！殺手！係七聖賢之一、影嘅職業！殺手嘅任務好簡單，就係殺敵，簡單、暴力！仲識用分身術、瞬移等技能，就算暗殺唔到敵人，殺手本身近戰能力都不俗，喺戰場上好似幽靈咁神出鬼沒！缺點面對複雜戰局稍顯吃力、防禦能力唔高，雖然呢個係所有刺客系職業嘅通病。」
佢再指一指「暗殺者」：「暗殺者更加簡單直接，專注潛伏同暗殺，經常喺暗影中尋找機會，務求一擊必殺！隱匿能力同單體爆發超強！缺點係近戰能力比其他近戰職業弱，仲有難以同時應付大量敵人，只適合精準刺殺。」
「斥侯就真係比較少見，同前面兩個好唔同！雖然係刺客二轉，但佢主力係偵察敵情，尋找敵人弱點，擅長分析戰局，幫隊伍制定策略！佢都有暗殺能力，但單體傷害同近戰能力比前兩個弱，適合團隊配合同情報戰。」
曉峰聽罷陷入沉思，眼中閃過冷靜光芒。佢心諗：「永誠揀咗狂戰士、洛希娜神射手……其實我哋嘅物理輸出已經好夠，同埋我估之後可能會面對更多高階魔物，佢哋應該都有唔同嘅自保手段，未必咁容易暗殺，咁倒不如......揀斥侯，佢嘅偵察同分析能力，正好補充隊伍嘅戰術需要，幫永誠佢哋搵魔物嘅弱點，仲可以指揮戰局，好似都好適合我...…」
佢望向隊友話：「我揀斥侯！我想幫隊伍分析戰局，搵敵人弱點。」
「曉峰！斥侯感覺冷靜又聰明，啱晒你！」永誠立即同意，洛希娜微笑點頭。
「的確我哋好需要一個軍師。」阿偉笑住講。
「曉峰，我支持你，我本身聽完都覺得斥侯好適合你。」樂希都點頭同意。
「好！曉峰，咁你準備好就可以開始轉職！」
曉峰再次觸碰水晶球，紫光暴漲，化為暗影光柱，籠罩佢全身。水晶球內魔力流轉，幻化出一道斥侯身影，手持雙匕首，隱於後方指揮戰局，眼神如鷹般銳利。
光柱滲入曉峰體內，佢眼中閃過銀光，雙匕首喺手中微微顫動，與新力量共鳴。暗影光柱逐漸收斂，曉峰身上多咗一層幽暗魔力光暈，氣質更顯冷靜銳利，散發斥侯嘅敏銳氣勢。轉職完成，水晶球恢復微光。
曉峰冷靜講：「我會努力，幫大家搵到所有敵人嘅弱點。」
喺隊友歡呼聲中，馬莉娜娜話：「恭喜曉峰！祝你嘅斥侯之路，可以每每都洞悉戰局！下一位~」
阿偉同樂希講：「傻豬，我留返個壓軸俾你。」佢走近水晶球，雙手觸碰球面。水晶球綻放耀眼白光，如聖光降臨，輝煌光芒籠罩阿偉。球內魔力流轉，四道光影浮現，化為四個職業名稱：聖騎士、守護者、重裝鬥士、龍騎士，文字懸浮空中，散發金白光暈。阿偉笑住講：「四個咁多？女神真畀面我！」
馬莉娜娜幻象瞪大藍色眼眸，細聲嘀咕：「咁多㗎？我咪有排講...…」
佢隨即清清嗓子：「咳咳......唔好意思，我係專業嘅！好！阿偉，我同你講解吓！」
「聖騎士係我哋尊貴女國王、七聖賢之一艾莉絲陛下嘅職業！攻守兼備，有聖光之力加持，有機會學到少量魔法，但要好努力練！你哋可能唔知，艾莉絲陛下戰力超高，佢曾經單挑斬殺傳說級魔物『雪山巨人』，同狂戰士亞當大人並列艾莉菲斯近戰戰力巔峰！呀…我又講遠咗，總之好勁！缺點係技能好難學，十個聖騎士得一個學到聖光魔法，精通嘅更加少之又少。」
「守護者通常拎巨盾，係隊伍最強坦克，幫隊友坦住一切傷害，防高血厚，生存能力超強！缺點係笨重，攻擊手段少，輸出就要依賴隊友啦。」
阿偉聽到「守護者」，心頭一震，諗起喺羅森洞穴入面，魔源組嘅守護者金剛用巨盾保護隊友，坦住敵軍攻勢，英勇無比，又諗起金剛對佢嘅教導。佢心諗：「守護者好似可以好好保護隊友……但係......」
馬莉娜娜停咗一停休息，然後又繼續講：「重裝鬥士同守護者相反，係騎士二轉攻擊力最高嘅職業，自身防禦力都唔差，近戰好強力，輸出甚至可同戰士二轉職業媲美，係好全面嘅近戰職業！缺點係犧牲咗一部分保護隊友同坦傷嘅能力。」
「龍騎士算幾稀有，有龍族力量加持，攻防都高，二轉職業入面整體能力頂尖，可以用龍之力統治戰場！但係......缺點好明顯，你要搵到一隻龍族願意同你契約綁定。艾莉菲斯龍族本來就少，願意溝通嘅更少……雖然我唔應該畀意見，但真係唔太建議揀......至今艾莉菲斯史上未有頂尖嘅龍騎士。」
阿偉聽罷陷入沉思：「龍騎士同聖騎士聽落好型，但龍族契約太難，聖光魔法又難練……重裝鬥士嘅全面近戰好啱我，攻擊同防禦都強，可以同永誠一齊衝！守護者雖然可以保護大家，但我好似唔太想再做純坦克……」
不過，為咗隊伍，佢望向隊友講：「我揀守護者啦，可以幫大家坦傷，保護隊友！」
作為阿偉嘅男朋友，樂希好了解阿偉，佢望住阿偉，眼眸滿是溫柔同理解。
「阿偉……我睇得出你唔係好想揀守護者，你應該鐘意同永誠一齊近戰輸出。我覺得我哋隊伍其實唔一定需要坦克，我有聖彩之願，魔力夠，可以一直幫大家回復...…更重要嘅係，我想你跟從自己嘅心，揀你真心想要嘅職業。」
曉峰都幫口講：「樂希講得好啱。阿偉，我哋打尼奧修斯嗰陣，你同永誠一齊做近戰輸出，而唔係純坦克，重裝鬥士好似更啱你嘅風格。」
「咁呀，阿偉，你想同我一齊瘋狂輸出敵人？」永誠笑講。
阿偉心頭一暖，望住樂希同隊友：「傻豬，多謝你……你真係好了解我。同埋多謝你哋支持，好！我揀重裝鬥士！攻防兼備，幫隊伍橫掃戰場！」
隊友一齊歡呼，馬莉娜娜嘅幻象拍拍手話：「好啦！阿偉，準備好就開始轉職！」
阿偉再次觸碰水晶球，白光暴漲，化為金白光柱，籠罩佢全身。水晶球內魔力流轉，幻化出一道重裝鬥士身影，手持直劍與盾牌，氣勢如山，隱隱散發騎士嘅榮耀。
光柱滲入阿偉體內，佢眼中閃過金光，手中嘅直劍同盾牌微微震動，同新力量共鳴。金白光柱逐漸收斂，阿偉身上多咗一層輝煌魔力光暈，氣質更顯堅毅，散發重裝鬥士嘅威嚴氣勢。
轉職完成，水晶球恢復微光，阿偉舉起直劍，笑住講：「重裝鬥士！睇我點同永誠一齊打爆敵人！」
馬莉娜娜笑講：「恭喜阿偉！祝你嘅重裝鬥士之路無堅不摧！剩返你啦，樂希。」
二轉後嘅狂戰士永誠、神射手洛希娜、斥侯曉峰、重裝鬥士阿偉，齊齊望住樂希。
剩下嘅樂希緩緩踏前，手中緊握聖彩之願，佢走近水晶球，手心微微出汗，聖彩之願喺佢手中散發溫暖光芒，似喺到鼓勵佢。佢深呼吸，雙手輕觸球面，水晶球瞬間爆發七彩光芒，如虹光綻放，絢麗光輝籠罩整個大廳，牆上壁畫好似隨之舞動一樣。
魔力運轉後，六道光影浮現，化為六個職業名稱：聖舞者、驅魔師、武僧、神官、神喻者、星靈使，文字懸浮空中，散發彩虹光暈。樂希眼眸瞪大，細聲驚呼：「咁多……點揀呀……」
馬莉娜娜嘅幻象瞪大藍色眼眸，細細聲吐槽：「六個？！我一定要同莫耶大人收返加班費...…」佢隨即清嗓子，專業咁講：「好！樂希，水晶球畀咗你六個聖職二轉職業你揀，聖職系嘅二轉分別好大，我逐個同你講解吓！」
「聖舞者，顧名思義，真係喺戰場跳舞！但唔係普通舞，係加爾安娜絲女神嘅聖舞，鼓舞隊友，幫大範圍戰場嘅隊友上唔同增強效果，最特別係可以大範圍回復魔力。缺點係技能數量少，回復量喺聖職輔助入面唔算高。」
「驅魔師好唔同，係全艾莉菲斯對死靈生物同惡魔最強嘅職業！擅長淨化、聖光攻擊，驅逐邪靈，對付邪靈堪稱無敵！但缺點好明顯，對其他生物幾乎冇輸出，輔助能力都弱，再加上艾莉菲斯嘅死靈生物同惡魔其實都唔多。」
「嗱，武僧又係另一極端！捨棄法杖同聖袍，用加爾安娜絲女神嘅祝福強化肉體，多數徒手攻擊，學到好多武術招數，係聖職系少有嘅近戰職業！缺點係犧牲咗大部分輔助能力，變成純戰鬥角色。」
「神官係祭師嘅加強版，樂希，你應該有俾聖殿導師溫妮教過，佢就係神官。神官精通治療、強化、控制技能等等，係平實全能嘅輔助職業！冇明顯缺點，但就比較普通，無咩特別突出嘅特色。」
「嘩，有神喻者，神喻者好稀有，係甘霖大人嘅職業！相傳出色嘅神喻者可以直接聽到加爾安娜絲女神嘅聖喻，神喻者技能種類同數量都好多，可以配合唔同戰術，仲可以學到最強防禦技能——加爾安娜絲聖域，暫時免疫一切傷害！職業本身冇明顯缺點，但對魔力量、魔法天賦、學習能力要求好高。」
「嘩，連星靈使都有。星靈使更稀有，全艾莉菲斯唔多過十個！佢又可以叫聖靈使，兩個名都得，因為佢可以同時用星靈同聖靈嘅力量，輔助能力超強，仲有個特別之處——輸出能力可以好高，甚至比我呢啲幻術師、專注控制系技能嘅法系二轉，同埋召喚師呢啲更高。同樣地，個職業冇明顯缺點，但同神喻者一樣，對魔力量、魔法天賦、學習能力等都要求極高。」
馬莉娜娜一口氣講完，然後停咗一停，再補充：「順帶一提，神喻者同星靈使喺聖職系二轉入面，公認整體能力比較頂尖，樂希你可以參考吓！」
樂希聽罷，緊握聖彩之願，陷入沉思。
「聖舞者嘅舞蹈同魔力回復好有趣，但回復量低，幫唔到隊友好多；驅魔師對惡魔好強，但平時戰鬥好似冇乜用……武僧會變近戰，又輔助唔到隊友，好似完全唔啱我。」佢心中將呢三個職業排除。
「唔......神官好似好穩陣，治療同控制都得，啲技能又唔應該唔會好難學。但馬莉娜娜又話神喻者同星靈使整體能力比較強，神喻者好似係全能輔助，最多技能；星靈使輔助之餘，仲可以做魔法輸出，我哋而家成隊都冇。但係......要求咁高，我應唔應付到呢？」
佢望向隊友，細聲講：「我...…我唔知點揀……神官好似好有用，又容易啲，但神喻者同星靈使更強……想做我又怕自己應付唔到…」
「傻瓜，好似你鼓勵我咁，跟隨你善良嘅心，唔使擔心咁多，揀你最鐘意嘅就得，我哋點都會支持你。」阿偉上前輕擁住樂希，代表隊伍給予支持。
樂希低頭望住聖彩之願，杖身散發柔和光芒，似喺指引佢。佢咬唇，眼眸閃過猶豫，陷入選擇困難，未能下定決心。