《艾莉菲斯物語》（異世界穿越）: 第五十四章、聖賢會議
聖水城王宮深處，一間莊嚴華麗但不過分奢華嘅會議室內，六位聖賢已經靜靜坐好。
呢間會議室嘅牆壁係以潔白嘅大理石砌成，上面雕刻住象徵加爾安娜斯女神嘅精美浮雕，牆上掛著幾幅描繪艾莉菲斯歷史嘅宏大油畫。天花板高聳，上面懸掛一個由純金同水晶打造嘅巨大吊燈，散發出柔和而神聖嘅光芒，將整個房間籠罩喺一片莊嚴嘅氛圍中。
房間中央擺放住一張長長嘅橢圓形檀木桌，桌面光滑得幾乎可以反映出人影。每個座位上都雕刻著代表七聖賢嘅獨特紋章，彰顯住佢哋喺艾莉菲斯世界中嘅獨特地位。會議桌旁邊擺放住一排排高背椅，椅背以精美嘅金絲刺繡裝飾，椅腳則係以沉穩嘅黑檀木製成，既顯威嚴，又唔過於浮誇。
窗外，陽光透過彩色玻璃窗灑入，將房間染上一層神聖嘅光輝。彩窗上描繪住之前嘅聖賢或者神話人物嘅英勇事蹟，每幅畫中都展現住佢哋喺歷史關鍵時刻中發揮嘅力量。
雖然會議尚未開始，但房間內嘅氣氛已經嚴肅而凝重。每個座位上嘅聖賢都各自坐喺屬於自己嘅位置，安靜地等待會議嘅開啟，佢哋嘅存在令整個房間充滿住一股無形嘅壓力。
—————————————————
出席嘅成員有：
一、艾莉絲
坐喺會議桌嘅主席位置上嘅係年輕嘅女國王，聖騎士、艾莉絲。
佢身影如雕像般挺直，紅色及肩嘅捲髮自然垂落，襯托出佢白皙如瓷嘅肌膚。佢藍色嘅瞳孔如同深海般深邃而銳利，帶著一股天生嘅威嚴，令人不敢直視。雖然年紀輕輕，但佢嘅氣場令人無法忽視，言行舉止充滿自信同決斷。
喺佢身旁，放置住兩件令人敬畏嘅稀有武器——純白色嘅騎士聖槍「聖女之吻」，槍身散發住柔和嘅聖光，彷彿能淨化一切嘅邪惡；以及金光閃閃嘅盾牌「天國救贖」，盾面雕刻住女神加爾安娜斯嘅神聖紋章，散發出令人安心嘅光芒。兩件武器嘅存在，令艾莉絲周身籠罩住一層神聖嘅氣息。
二、亞當
坐喺艾莉絲左邊嘅係狂戰士亞當。佢係一名中年男子，赤裸嘅上身滿佈新舊交錯嘅傷疤，每一條傷痕似乎都訴說住佢經歷過嘅戰鬥。佢身材魁梧，肌肉結實如鐵，周身散發出一股令人窒息嘅殺氣。亞當沉默寡言，但佢嘅存在本身就足以令人感到震攝。
喺佢背後，交叉擺放住兩把誇張嘅巨大雙劍——「炎魔」同「霜靈」。 「炎魔」劍身呈深紅色，劍刃邊緣彷彿燃燒住火焰，隱隱有熱浪散發，令人感到炙熱；「霜靈」劍身則係冰藍色，表面覆蓋住一層薄薄嘅寒霜，周圍空氣似乎都因為佢而變得寒冷刺骨。
呢兩把大劍喺亞當身後靜靜地放住，但佢哋散發出嘅威壓，好似隨時都可以引發一場驚天動地嘅災難。
三、莫耶
喺艾莉絲右邊坐住嘅係艾莉菲斯嘅魔法總管理者、魔導士莫耶。
佢身穿一件深藍色嘅長袍，袍上繡滿銀色嘅符文，符文隨住莫耶嘅輕微動作而閃爍住微弱嘅光芒，好似有生命咁。黑色及腰嘅長髮披散喺佢背後，令佢顯得好似一個神秘而優雅嘅美男子。
莫耶唔習慣使用武器，佢通常都係徒手施法，佢嘅雙手上隱隱浮現住魔法陣嘅殘影，佢身邊都有一股強大但平穩嘅魔力波動，顯示出佢對魔法嘅掌控能力已經達到巔峰。
四、甘霖
坐喺莫耶旁邊嘅係聖職系公會會長、神喻者甘霖。佢銀白色嘅長髮同長鬚為佢增添咗幾分仙風道骨嘅氣質，白袍上繡滿咗金色嘅符文，令佢嘅形象更加神聖。佢嘅臉上滿載歲月嘅痕跡，眼神溫和且慈祥，表情超塵絕俗，整個人散發住一種令人安心嘅感覺。
佢嘅武器擺放住喺佢身旁——木製法杖「治癒者」。法杖杖身雕刻住細緻嘅藤蔓紋路，杖頭鑲嵌咗一顆白色嘅寶石，寶石散發住柔和嘅光芒，彷彿一股溫暖嘅力量源源不斷地流動著。
五、馬莉娜娜
坐喺會議桌另一側、亞當旁邊嘅係幻術師馬莉娜娜。佢係一名年僅二十出頭嘅少女，一頭金色嘅長髮披散喺肩膀，五官精緻得如同畫中人，但佢眼神中帶著一絲狡黠，顯得活潑跳脫。佢身穿一條紫色嘅長裙，裙上繡有繁複嘅魔法陣紋路，周身籠罩住一層淡淡嘅幻影，好似令人無法分辨佢嘅實體咁，但出於對聖賢會議同國王嘅尊重，佢唔係用幻象出席會議。
佢手上把玩住一支外形奇特嘅魔杖——「謎」。魔杖表面如同水晶般透明，內部似乎有流動嘅液體，隨住馬莉娜娜嘅動作而變幻著顏色，時而白光、時而彩光，充滿咗神秘感。
六、影
最後坐喺會議桌最角落嘅係殺手影。佢全身包裹喺黑色嘅斗篷之中，面容完全隱藏喺兜帽下，只露出一雙銳利如刀嘅綠色眼睛。影一動不動咁坐喺度，整個人彷彿融入咗黑暗之中，唔細心睇根本無法察覺佢嘅存在。
喺佢腰間插住嘅合雙匕首叫「影牙」，匕首嘅刀鋒閃著寒光，周圍似乎有一層若有若無嘅黑霧包裹住，散發住一股令人不寒而慄嘅殺氣。
至於未到場嘅七聖賢之一、巫師加莉安娜，由於佢失蹤已久，會議室內佢嘅位置留空。冇人知道佢點解失蹤，所以都冇人知道幾時佢會坐返喺呢個屬於佢嘅位置。
—————————————————
艾莉絲心知加莉安娜唔會出現，見約定時間已到，佢開聲話：「好，七聖賢緊急會議開始。麻煩莫耶你記錄。」
「知道，陛下。」莫耶隨即右手一揮，一支羽毛筆和一卷羊皮紙憑空生成，然後佢再施法，筆就自動飄起嚟，喺羊皮紙上自己寫字。
「唔該莫耶。咁我哋就單刀直入，唔講太多場面說話。今次召開緊急會議嘅原因，係因為我哋收到情報，即將有為數不少嘅魔物集結，預備攻打呢到，王都聖水城。馬莉娜娜、影，麻煩你哋講下收集到嘅情報俾大家知道。」艾莉絲隨即開始講。
「收到，艾莉絲陛下。」馬莉娜娜活潑嘅聲音隨即響起：「我同影監視咗王都附近嘅魔物一段時間，發現近日佢哋喺王都嘅四個城門方向，各自都有異常嘅集結活動，走近調查後，我探測到係魔力嘅氣息，而且係魔王軍嘅魔法，合理推測魔物係被魔王軍用魔法控制......咳咳.....」
馬莉娜娜停咗一停飲水，然後又繼續講：「我用幻象走近西邊嘅魔物群，竟然發現咗一個久未露面嘅身影——魔王軍大將軍、被分級為傳說級魔物嘅奧修坦尼斯......」
「奧修坦尼斯！？奇怪，我冇感知到佢喎......」莫耶嘅「感知術」範圍橫跨大半個艾莉菲斯，傳說級魔物通常有強力嘅魔力量，所以佢一定會感知到，疑惑咁打斷馬莉娜娜。
「嗯，你冇聽錯，莫耶大人，的確係奧修坦尼斯，嗰隻半精靈法師，本來佢同魔王一樣，多年來消聲匿跡，但近日出現返，用魔力控制魔物，你感知唔到可能係因為佢學識咗隱藏自己嘅魔力。我用幻象扮佢副手接近，知道咗佢哋嘅計劃，佢哋計劃用魔法集結魔物群，喺三日後，同時間進攻聖水城嘅四個城門，目的係城中保存嘅『星雨結晶』」馬莉娜娜回應。
「『星雨結晶』？莫非......」甘霖皺眉。
「嗯，甘霖，我都係咁諗，佢哋要拎呢樣嘢嘅話，最終目的，應該就係復活魔王。文獻中冇記錄過魔王被打敗過，只係已經多年冇出現。我哋推測，魔王可能被啲唔知神秘魔法封印咗，奧修坦尼斯發現咗佢位置，所以佢要『星雨結晶』嚟打破封印。」艾莉絲接住甘霖嘅話講。
「根據我聽到奧修坦尼斯嘅對話，陛下嘅推測同真相應該好接近。影，到你，講下魔物嘅分佈。」馬莉娜娜補充。
「正如馬莉娜娜所講，魔物分四邊準備攻打聖水城嘅四門。我用分身術暗處觀察過，敵方主力部隊喺西邊，除咗奧修坦尼斯、仲有另外兩隻傳說級魔物、雷龍『莫尼克』同埋六臂劍魔『修羅』，帶住大量嘅高階魔物。」影語氣平淡地講。
「奧修坦尼斯、莫尼克、修羅......呢三隻都唔易處理......」莫耶若有所思咁講。
「至於北邊，主要都係由北方瑪利安納雪原集結嘅大量高階、中高階魔物，領軍嘅係傳說級魔物、魅魔『琳琳』；東邊就多數係東部尤坦高原嘅魔物，數量多但大多數只係中階，但領軍嘅係都傳說級魔物、高原巨蟒『利奧雷亞』；南邊戰力較弱，就係少量高階，同大量中階魔物嘅大軍。」影不徐不疾咁講完。
「唔......莫耶，麻煩講下聖水城疏散安排。」艾莉絲聽完後轉咗個話題。
「係，陛下。根據你嘅指示，由今朝開始已經陸續將聖水城嘅市民分批疏散到迷夢城同馬利安城，已經為佢哋安排住宿，預計明天中午前可以完成疏散。同埋我都根據你嘅指示作咗個原因，話係要進行大規模軍事演習，以免引起市民不必要嘅恐慌；另外都有對受影響嘅所有市民提供足夠嘅補償，所以市民都冇不滿情緒。」
「好，疏散完之後記得封鎖所有入嚟聖水城嘅主要道路，避免無辜嘅人捲入戰爭。」
「了解，陛下。」
「咁之後，就要傾下點應戰。我唔想牽涉其他冒險者入嚟，以免太多無謂傷亡，但有兩個冒險者，一定要搵埋過嚟，一個係死靈法師阿夢，雖然大家都知，我對死靈法師冇好感，佢必須承認，我哋需要依賴佢嘅強大戰力，；另一個係加爾安娜斯女神親自揀選，『聖彩之願』嘅持有人，剛轉職成星靈使嘅樂希，『聖彩之願』潛力無限，可能仲有隱藏技能可以扭轉戰局。」艾莉絲繼續引領住會議嘅進程。
甘霖聽後眉頭深鎖，忍唔住出聲講：「抱歉艾莉絲陛下，佢兩個仲係好年輕......老夫擔心......」
「甘霖，我知道你教過佢哋，都理解你嘅擔心，但冇辦法，我哋戰力唔夠，而家已經係動用咗最少我哋之外嘅人員。」艾莉絲語氣堅定。
「老夫了解......」甘霖擔心地點頭。
「咁甘霖，就交俾你通知佢哋。」
「了解。」
艾莉絲行事果斷，好快已經有個計劃︰「好，根據我聽完啱啱嘅戰場情報，初步有個計劃：敵人兵分四路，我哋都要分四路迎戰，西邊有成三隻傳說級魔物，仲要隻隻都好難打，所以我哋都必需派出主力部隊，我、亞當、甘霖三個負責防守西門；北邊有一隻傳說級魔物，仲要係魅魔，莫耶交俾你處理；東邊條大蛇就交俾阿夢，我相信佢嘅實力；至於南邊戰力較弱，就交俾樂希，同埋影你去支援佢。大家有冇問題？」
「陛下......有呀......咁我呢？」馬莉娜娜見艾莉絲冇提及過佢，舉手發問。
「係，唔記得講你，馬莉娜娜你留喺城到，負責穩定同看管保護王都嘅魔力結界，以免敵人偷偷摸摸唔知用咩方法突破結界，入嚟偷走『星雨結晶』。」艾莉絲回應。
「陛下，但我都想幫手打交喎......」馬莉娜娜細聲抱怨。
「馬莉娜娜，呢個任務係好重要嘅任務，只可以由你或者莫那做，但北邊嘅魅魔都要人處理，你應該知道魅魔係免疫幻術，所以只可以由莫耶去打魅魔，你留喺到保護結界，了解？」艾莉絲加重語氣。
「對唔住陛下，我了解啦。」
「好，大家仲有冇問題？」
見眾人都搖頭，艾莉絲宣佈散會，叫大家做好自己嘅任務。雖然魔物大軍三日後先進攻，但佢要求各單位最遲兩日後就要到達各自嘅位置準備，如果有隊友就自行傾好戰略。
「願加爾安娜斯女神願我哋同在！」艾莉絲散會前舉住聖槍祝福大家。