《艾莉菲斯物語》（異世界穿越）: 第五十三章、最後通碟
喺瑪利安納雪原大戰之後，星光小隊帶住水光之隊三位已故成員嘅遺體返到馬利安城，將遺體埋葬之前提過嘅城內公共墓地。
洛希娜小心翼翼咁親手將佢三位前隊友嘅遺體安放喺三個佢哋嘅墓碑前方，佢堅持要自己一個人處理，完成後佢跪喺墳前，手扶住墓碑，深吸一口氣，眼神複雜。
永誠企喺佢身邊，望住洛希娜嘅側臉，輕輕攬住佢嘅肩膀。
「你哋可以真正安息啦……感謝你哋曾經為我所做嘅一切。」洛希娜低聲道，眼中泛起淚光，但言語中帶著一絲解脫。
其他成員亦低頭默哀，向水光之隊嘅隊員致敬。呢一刻，洛希娜多年的心結終於完全放下。
經過一段傷感嘅告別後，佢哋離開墓園，樂希提議：「今晚不如我哋一齊食餐飯，慶祝我哋平安返嚟，順便多謝阿夢喺雪原上幫咗咁大嘅忙。」
阿夢諗咗片刻，然後輕輕點頭：「都可以，都未同過你哋正式食餐飯。」
眾人心情稍微輕鬆咗啲，於是結伴行向城內其中一間餐廳。但係行到半路時，阿夢突然停低，眉頭微皺。喺眾人疑惑嘅目光中，一隻全身散發著微弱幽光、骨質透明嘅骷髏烏鴉悄然降落喺阿夢嘅肩膀上。
骷髏烏鴉喺阿夢耳邊低語幾句，阿夢嘅表情變得嚴肅而凝重。
「終於搵到你……」阿夢喃喃自語，隨後轉身望住星光小隊，神情帶著歉意：「唔好意思咁多位，我突然有啲好緊要嘅事要處理，今晚唔可以同你哋一齊食飯，之後再搵時間補返......抱歉。」
未等其他人回應，阿夢已經召喚出佢嘅死靈座騎——洛可。佢低吼一聲，俯下身畀阿夢跳上佢嘅背上。
「多謝你哋嘅理解。」阿夢簡單道別，然後騎住洛可迅速飛向城外，消失喺夜空之中。
望住阿夢遠去嘅背影，樂希嘆咗口氣：「算啦，阿夢應該有佢嘅原因。我哋照去食飯，今晚返旅館好好休息，聽日先再計劃下一步啦。」
眾人點頭同意，返到旅館後，各自回房休息。永誠再一次過咗洛希娜房過夜，而其他人則繼續喺大房，享受短暫嘅安寧。
翌日一早，星光小隊喺大房集合食早餐，商量當日嘅計劃，最終決定喺馬利安城內休息一日，各自自由活動。
永誠同洛希娜選擇喺城內拍拖，探索馬利安城嘅各式景點；曉峰就喺圖書館睇書，研究新嘅戰術；樂希去咗聖殿學習法術；而阿偉就去咗戰士公會提升技能，然後又約埋樂希學完法術一齊去購買日用品。
雖然經歷過死亡嘅威脅，但呢一日，星光小隊難得感受到寧靜嘅生活。
—————————————————————————
視線轉到阿夢果邊，佢騎住洛可，飛過一大片荒涼嘅大地，最終嚟到一個危險又詭異嘅地方——煌峒火山。呢度係艾莉菲斯世界中未被完全探索嘅地帶，環境極其惡劣。
整個火山區域散發住詭異嘅氣氛，熔岩竟然係罕見嘅翠綠色，彷彿流動嘅毒液，散發出陣陣刺鼻嘅硫磺味。火山附近嘅天氣亦顯得極不尋常，有時酷熱如焚，有時又冷得令人顫抖，完全無法預測。
阿夢喺洛可背上，警惕地環顧四周，最終佢搵到咗一個熟悉嘅身影——半魔莎莉。
莎莉係佢童年嘅玩伴，但而家佢身上散發住一種危險嘅氣息。佢有一頭深紫色嘅長髮，微微捲曲，金色嘅雙眼散發住魅惑嘅光芒，白皙近乎透明嘅肌膚顯得異常耀眼。佢身上穿住一件黑色長袍，上面繡住紅色符文，手指甲呈紫色，散發住陰冷嘅氣息。
阿夢從洛可身上跳落地，凝視住莎莉，低聲道：「終於搵到你，莎莉。」
莎莉回過頭，冷笑：「點呀夢哥，又嚟煩我？叫咗你唔好理我啦。」
「唔理你？你知唔知你做緊嘅嘢，可能會毀滅成個艾莉菲斯？」阿夢皺眉，語氣嚴厲。
「就算係，都係呢個世界逼我㗎！」莎莉眯起雙眼，語氣中帶著不屑。
「冇人逼你，係你自己選擇咁做。」阿夢冷冷回應。
莎莉嘆咗口氣，目光變得更加冷漠：「算啦，你唔會明白嘅。隨得你點講啦，都係果句，而家你要殺就殺，反正我唔夠你呢啲天才打。」
阿夢嘗試壓抑情緒：「我講過我唔想咁做，就算你而家唔當我係朋友，我地始終係一齊成長嘅師兄妹。」
「師兄妹？都過左去啦，你仲提黎做乜。」見阿夢冇回應，莎莉繼續講：「冇咩事我走先啦，既然你唔打，你就唔好特登嚟搵我啦。」
「今次係最後一次機會喇莎莉，如果我下次再見到你，你仲係唔係收手……我……」
「你會點？殺咗我？」
阿夢緊緊握住魔杖，眼神中滿是複雜：「我會親手消滅你。我一直冇同七聖賢講你嘅所作所為，因為佢地根本唔會容忍你做嘅事，一講咗你就會被討伐。」
「咁我係咪要多謝你？」莎莉講完就用影遁消失喺空氣中，只留下一臉複雜嘅阿夢，同埋唔知發生咩事嘅洛可企喺原地。
「莎莉......」阿夢語氣低沉，眼中透著深深嘅無奈。
正當阿夢陷入沉思之際，一隻潛伏喺翠綠岩漿入面嘅奇異魔獸——炎杲，突然浮現。牠嘅體型猶如河馬，但外形卻似食蟻獸，全身鮮艷嘅顏色代表著致命嘅劇毒。牠張開嘴巴，噴出一道熔岩攻擊。
阿夢心情本來已經唔好，佢隨手一揮使用「抵消術」，熔岩瞬間被轉化為無害嘅氣體。阿夢再揮動魔杖施放「死靈光波」，黑色嘅能量洪流湧向炎杲，將牠炸到四分五裂。
—————————————————————————
同一時間，喺聖殿，甘霖收到女國王艾莉絲嘅緊急信件，要求佢翌日正午前趕到王都聖水城，參加緊急聖賢會議。甘霖睇到後十分凝重，因為召開緊急聖賢會議通常代表有危急嘅事發生。
甘霖連信都未放低，莫耶就帶住影傳送咗過嚟，同甘霖講：「甘霖，我大概知道發生咩事，我哋不如提前去王都準備，順便同你傾下細節。」甘霖點頭同意，莫耶隨即施展傳送術，三人一同被莫耶傳送前到王都。