梅蘭——為了夢幻日子得到保障，用惡夢結帳: 反客為主的念頭

沈綽的補習班上了足足一個多小時。待她腦袋快爆炸了，才總算看完整條錄像。
她輕嘆一聲，感慨着香城學生的苦悶人生，然後伸了個懶腰，拎起背包離開補習社。
打開大門來到街上，沈綽首先便感覺到晚上氣温明顯涼了不少。
迎面吹來陣陣涼風，把寒意送進她的心坎裏。明明只是一個多小時的時間差別，她卻感覺自己去了另一個城市。
她穿着的還是單薄的夏季校服裙子，為了保暖，只能連忙把背包裏的毛衣披上。
完全暗下來的天色下，城市亮起點點燈光。路旁商店的招牌明亮耀眼，卻未能吸引到大多數路人的目光。他們只顧匆匆趕路，追趕着快要開出的巴士；或是拖着疲累的身軀，如同喪屍般湧入地鐵站口。
沈綽在這些人羣之中，再次看見梁寬的身影。他正好從那家酒吧出來，腳步浮浮，通紅的臉上卻一臉迷糊的樣子。看起來沒少喝酒。
「個老嘢仲喺度？真係唔使返工架？」她想着，靜靜地躲在一旁觀察着梁寬。
梁寬被他那司機攙扶着坐上後座。沈綽玩勉強聽見了那司機語重心長地抱怨：「局長你知道自己酒量唔好就咪飲咁多啦！陣間仲點返office呀？」
「原來係曠工鼠出嚟飲酒，仲要飲到醉埋。」沈綽揚起嘴角，拿出手機對着梁寬的座駕「咔嚓咔嚓」的拍了好幾張照片。


梁寬本人已經醉得失去警覺性，而負責照顧他的司機又分身不暇。而為了掩人耳目，不讓人知道他偷跑出來喝酒，他那一大群保鏢又沒跟來。這才讓沈綽鑽了空子。
「如果係我，我先唔會咁魯莽。」沈綽看着梁寬的車子開出，混入來來往往的車流之中，再也找不到，才打開社交網絡，想要上傳剛剛拍到的照片。
她正想着要給梁寬寫一段怎樣妙趣橫生的帖文，才能好好配合照片上梁寬那如痴如醉的表情。
可是臨發出去之前，沈綽的手又頓了頓。
她看看手上的這些素材，忽然又不是很想就這樣發出去。
就這樣放出來，頂多讓人看到這傢伙的醜態，或者罵他兩句德不配位，白逗人工之類。對他們對抗強制服務令的抗爭沒有多大幫助。相比起這樣，他嗜酒這個弱點，是不是還有更大的利用價值？
人喝醉了，判斷力會下降。行事會變得莽撞，也更容易犯錯。
趁着他喝酒的時候，引誘他犯錯，讓他再也不能維護強制服務令，這不是對他們的計劃更有利嗎？
那麼，該讓他犯一個什麼錯，才能讓他失去支持強制服務令的立場呢？
沈綽漸漸生出了一個想法。


沈綽知道梅蘭今晚會搬到凌峰的家暫住，直接坐車衝上凌峰的家找她。
梅蘭將沈綽帶到自己的房間，把沈綽的想法完整聽了一遍。
「如果佢喺利用強制服務令尋歡作樂嘅時候中招，佢就再無理由話強制服務令無問題。」沈綽總結道。
梅蘭沒想到沈綽居然會想出這樣的計劃。她知道自己沒有立場批判沈綽，畢竟自己憑一己之力，害得香城不知道多少個人受感染。但當她知道事情一發不可收拾之後，她自己都害怕。
若再有更多人因她染病，因她而死，她承擔得起嗎？
而沈綽現在想要的，正正是讓她再做一次這樣的事情。
「先唔講我而家已經明確被登記成為患者，無可能再被要求強制服務。我再同人做，一定會感染佢。到時候如果佢再同其他女人上牀，咁又會有更加多嘅受害者。」梅蘭的語氣並不情願：「我唔想再令到疫情變得更加嚴重。」
但沈綽在這件事的立場上卻比平常堅定不少：「而家疫情去到呢個階段，有翻啲常識嘅香城人都唔再做強制服務。可能你無機會睇到，而家喺條街度已經見唔到有人隨地野戰架喇。」
「香城人其實好自私。佢哋知道唔做就唔會中招，自然就會唔做。梁寬嗰種人咁精，更加無可能周街揾人做。根本無必要擔心感染咗佢，會害到其他人。」
「但係我唔一樣。我幾乎令到佢身敗名裂，國際間有越嚟越多人聲討佢，甚至有唔少國家要制裁佢。所以佢只要見到我，一定會惱羞成怒，好似上次咁想用強制服務令逼我就範。」


「只要我趁佢醉醉哋又未醉得曬嘅時候出現喺佢面前，等佢對我發起強制服務，然後我同你偷龍轉鳳，等你傳染佢。佢就會喺不經不覺間感染愛滋病。」
「而家佢就係取消強制服務令最大嘅阻力。只要佢無立場再阻止，咁我哋就會贏。如果佢因為強制服務令而中招，佢就無可能再否定我哋嘅講法，話強制服務令仍然係安全嘅。」
「佢一個人中招就可以令強制服務令消失，咁以後千千萬萬個女性就唔需要因為強制服務令而無辜受感染。呢條數唔通唔值得咩？」
沈綽異常興奮。梅蘭聽出了，現在的她除了以往想到壞點子時的邪魅，還多出了一份狠勁，以及一種馬上就要大仇得報的快感。
梅蘭不知道沈綽為什麼會這般興奮，但這樣的她，像極了在論壇上引爆完自己身上的炸彈，面對凌峰質問時那輕狂的自己。
「但係……」梅蘭欲言又止。她不確定沈綽現在這樣，自己是不是應該勸阻一下。
但沈綽不需要她勸阻。反倒是她勸喻梅蘭道：「呢件事係你開始嘅，點解而家你反而變得畏首畏尾？」
梅蘭覺得眼前的沈綽很陌生。
「你以前都唔贊成我咁樣做嘅。當初你唔係最搏命阻止我嘅人咩？而家連我都知道我今次玩大咗，你仲要我再玩大啲？佢身邊咁多人保護，我點可能潛入去同你偷龍轉鳳？就算我哋真係埋到佢身，佢班保鑣個個都牛高馬大，就憑我哋兩個，有可能從佢班保鑣手中全身而退咩？呢個計畫邊有可能成功呀？」
「咁你感染我。」沈綽衝口而出：「你感染我，然後我去感染佢。只要我喺輪到我做身體檢查之前感染到佢，咁就冇問題啦！」
梅蘭大驚，雙手緊緊握成拳頭：「你知唔知自己講緊乜嘢？呢個係病嚟㗎！而且係跟你一世，無得返轉頭嗰隻啊！」
「我知！我唔怕！」沈綽也激動起來：「只要可以令強制服務令消失，要我聽日死都得！」
「係咪發生咗啲乜嘢事？點解你突然變成咁⋯⋯」梅蘭戚戚然問道。
沈綽沒有立即回答。她沉默了一會兒，才低聲回答：
「我去咗探宋詩音。」


聽到那個潛藏在腦海深處的名字，梅蘭嚇了一跳，胸口隨即久違地，狠狠地揪了一下。
「嗰次我受傷入咗醫院，當時就係被送入去佢嗰間醫院。我一直唔敢入去探佢，因為我覺得，我身為佢嘅好朋友，佢嘅大姐姐，我無好好照顧佢。喺佢最無助嘅時候，偏偏我幫唔到佢。我甚至連佢出咗事我都唔知，直至有人通知我我先知。」
梅蘭默默聽着沈綽的自白。沈綽從來沒跟她說過自己與宋詩音有什麼關係，在沈綽今天跟她提起之前，她甚至不知道兩人原來相識。
這麼說來，沈綽心底裡會不會憎恨自己？畢竟連宋太太都認為，她就是害宋詩音出事的罪魁禍首。
「當我知道你同嗰件事有關，我先至開始留意你。我留意到你第二日即刻報名參選學生會，而且性情大變，好積極咁周圍搵人拉票。我唔知道你當時究竟盤算緊啲乜嘢，所以霍超然嗰件事上面，我唔敢積極幫你。直至你入咗閘，我知道你想做啲乜，我先至重新思考，我應該點做。」
「我同丁香、花玥盈唔同，我冇咩不堪回首嘅過去，亦冇咩憤世嫉俗嘅熱心腸。當初我知道你想利用自己身上嘅病毒去感染其他人，講真我唔想跟住你冒呢個險，因為我覺得唔值得犧牲咁多人去做呢件事。但係我知道你做緊嘅嘢，可以畀詩音一個安全嘅未來。所以當件事已成定局，我都無離開。我選擇用我自己嘅方式，去為呢件事出力。」
「就係pornblub嗰件事？」梅蘭問。
「係。」沈綽道：「我知道梁寬總有一日會對我哋幾個女仔出手，我預先set定咗捷徑喺手機homepage度，佢一喐手我就即刻直播出去。就連標題都係我一早已經set好咗嘅。」
「後來嘅事態發展都好順利。我條片得到全世界嘅關注，強制服務令呢件事都再一次翻到世人嘅目光之中。」
「但係呢啲嘢根本無用！」
「無論幾多個國家做咗幾多嘢，制裁咗幾多高官政棍，對佢哋嚟講根本就不痛不癢。一百年前係噉，而家都仲係咁！但係每一日香城都有一千個人嘅人生被愛滋病摧毀，香城人等唔切喇！」
「你唔係成日出門你唔知，疫情開始咗之後有幾多人日日喺度喊，唔知自己未來可以點。我今日先聽住一個仲低你一form嘅女仔喺學校喊，因為佢感染咗愛滋病，以後無得賺服務費養活一家。」
「所以疫情必須要即刻停止，強制服務令要即刻取消，將所有服務變成自願，等女仔可以自己決定要同邊一個人做。唔可以再拖落去喇！」
「直接對梁寬落手，就係最快嘅方法！只要等佢自己都成為受害者，令佢再無立場反對，咁我哋就可以直接贏！」
沈綽一口氣説了一大堆話，把梅蘭堵得啞口無言。梅蘭不能否認，沈綽的想法可能是最快能解決困局的方式。自從染疫人數開始公佈之後，支持取消強制服務令的人越來越多，民意已經不再是問題了。只要解決掉梁寬，最大的阻力消失，便再也沒有人繼續維護強制服務令。


「你仲猶疑啲乜嘢啊？而家就係最好嘅機會喇！」沈綽抓緊梅蘭雙臂：「我哋爭取咗咁耐，就係爭臨門呢一腳咋！」
「你畀我考慮下先啦！」梅蘭反握着沈綽雙手，將它們從自己的肩上拿下來，放在自己掌心。
「宋詩音嘅事，好對唔住。如果唔係我，佢唔會變成而家噉樣。」梅蘭低下頭：「但係自從我知道咗染疫嘅人數居然有咁多，而且佢哋染疫背後嘅原因全部都係因為我，我唔敢再做啲咩以暴易暴嘅事。我已經犧牲咗太多人喇……」
「呢啲唔係叫以暴易暴，呢啲叫以戰止戰。」沈綽再次打斷梅蘭。「你好好諗下，只要梁寬一冧，我哋可以拯救到幾多個人？」
梅蘭沉默不語。每當她想反駁，但又明白到對方根本不會聽她説，她才選擇沉默。她是真的想好好想清楚，這樣做到底對不對。
但她的反應，卻讓沈綽徹底失望。她倏地把雙手抽回：「算啦！無論你幫唔幫我，我都會諗辦法做到。」
説完，沈綽站了起來，逕自往門外去。
凌峰捧着一盤水果，打算送給沈綽和梅蘭吃。他本來打算藉着給兩人送水果，然後順勢參與接下來的討論。他知道沈綽此時來找梅蘭，自然不會是噓寒問暖這麼簡單。他也阻止不了梅蘭繼續參與進抗爭活動，但他至少要避免梅蘭參與危險的行動。
而沈綽想出來的鬼主意，最不缺就是危險。
但他剛到梅蘭的房間外面，便見到奪門而出的沈綽。
沈綽與凌峰僅對視一眼，便馬上拐了個彎，直往凌峰家大門口走去。凌峰的家不是任志和家那種獨立屋，就只是一間比較寬敞的私人屋苑單位。從沈綽要跑到門口，就只是三兩步的距離。因此待梅蘭追到凌峰面前，只能遙望大門被沈綽「砰！」的關上。
凌峰與梅蘭面面相覷。
梅蘭輕輕地歎了一口氣，轉身回房。不過她知道凌峰碰着一盤水果，肯定是要跟進來的，也就沒有關上門。
「發生咩事？做乜佢嚟咗無耐就嬲爆爆咁走咗嘅？」凌峰邊在梅蘭房間的書桌上放下果盤，邊問道。
梅蘭坐在床邊，眉頭緊皺着：「沈綽想我去感染梁寬。」


「唔得。」凌峰立刻反對。
「我未應承佢。」梅蘭道。
「未應承即係考慮想應承啦？」凌峰激動地說：「唔得呀！諗吓都唔得！」
「我都唔想做呀！但係沈綽有樣嘢講得啱，疫情太嚴重喇，香城人等唔到抗爭成功嘅一日喇。」梅蘭也提高了聲線：「如果設個局令梁寬因為強制服務令而感染，咁佢就再冇理由維護強制服務令。呢個的確係最快解決呢件事嘅方法。」
「我唔理佢有咩好處，總之要你以身犯險就唔得！梁寬佢係乜嘢人呀？你夠膽搞佢，佢點可能畀你全身而退？」
「落藥或者灌醉……我都未諗到呢度。」梅蘭搖頭表示不知：「我好想快啲解決呢件事，但係我擔心我傳染咗畀梁寬之後，佢會禍害其他女仔……」
「咁咪啱囉！你唔好搞佢，咁咪唔會害到其他女仔囉！」凌峰把梅蘭緊緊抱入懷中，不容她掙脱：「我唔可以無咗你㗎！咁危險嘅嘢你唔可以去做！」
梅蘭感受到凌峰的體温和鼻息，聽着他著緊自己的言語和心跳，她不禁有點感動。可是，她更加清楚她不能接受。
她是個罪人。她不可能逃過自己的罪責。她不可以拖累凌峰。而且她知道，相比起她的身旁，某個人此刻更加需要凌峰。
説起來，凌峰擅自宣佈退出丁香的關注組，這筆帳還未跟他算清楚。既然如此，不如現在就徹底算一算，讓他和自己好好了斷。
梅蘭推了推凌峰，發覺男生的身體堅如磐石，紋絲不動。她再用力推了推，同時沉聲道：「放開我。」，這才引起凌峰的注意。
「我整痛你呀？Sorry啊！」凌峰急忙鬆開梅蘭。梅蘭乘機站了起來，拉開了距離。
凌峰對梅蘭突然的轉變感到詫異。明明上一秒還讓他抱着，現在卻退避三舍。
梅蘭冷冷地説：「凌峰你出去啦。」
「點解？」凌峰不解。


「你由得我自己一個啦。」
「唔得！我係你男朋友嚟㗎，我唔可以畀你做傻事！」凌峰也站了起來想要接近梅蘭：「萬一你趁我唔覺意走咗去揾沈綽咁點啊？」
「凌峰，我哋完咗架喇。」梅蘭卻一頭冷水潑在凌峰頭上。
「你唔好講埋曬啲晦氣説話啦！我唔會再離開你架喇！」凌峰卻無視了她的話，繼續靠近。
眼見馬上就能再將梅蘭抱入懷，凌峰卻突然感到臉上一陣刺痛。梅蘭用力刮了他一巴掌。
「你唔好再咁任性啦！」梅蘭喊道：「我哋無可能架喇！我係一個壞人，我無未來架！你唔應該再同我一齊㗎！」
「你而家應該陪住丁香先啱啊！佢先係最需要你嘅人啊！佢而家先係企喺全世界面前，對抗緊極權同不公義嘅英雄。佢需要你幫佢啊！」
凌峰也吼起來：「佢點樣我唔理啊！我凈係知道你再係咁落去唔得咋！」
「你唔理佢唔得！你知唔知道你如果唔理佢，成個抗爭運動會失敗架！佢一個人點可能處理咁多嘢？抗爭去到呢個階段，已經唔再係嗌兩句口號嘅事喇！要做宣傳，要公開演説，要同政府嘅人辯論，要組織遊行示威，要爭取全球領袖嘅支持，甚至要面對政治打壓，打官司，隨時防備有人對付自己……佢一個人點得啊？」
「佢背係咪仲有成個團隊支持佢咩？」
「如果咁就無問題，咁沈綽今日唔會走嚟揾我，仲提出一個咁瘋狂嘅諗法！」
梅蘭愠怒地看着凌峰：「沈綽今日嚟搵我，係因為佢覺得而家咁落去唔work。丁香佢好努力，但係有啲嘢唔係佢一個人努力就得㗎。如果你無借啲咦離開關注組，可以分擔一部分壓力嘅話，咁成個運動點會進展得咁慢？」
「而家個運動無進展咩？我哋越來越多人支持，越來越多人同我哋企喺同一陣線，一齊向政府施壓。丁香同沈綽每一日都上新聞。我哋已經進展得好快架喇！」
「但係每一日都有一千個人受感染啊！」
一想到新聞報道上顯示的感染人數，梅蘭便再也控制不住情緒，崩潰地哭了。
「再拖多一日，就會多一千個人被我害死。當中仲要有六七成係女仔呀！沈綽講得啱㗎！我哋唔可以再拖落去喇！」
凌峰很無奈。他根本不覺得自己在關注組裏面就能讓事情明天就解決。但他知道梅蘭自從知道了病患人數之後，心理壓力一直很大。她雖然沒明説，但凌峰很清楚她有多麼自責。他唯一可以做的，就只有讓梅蘭宣泄一下。
「唔理我幫唔幫沈綽都好，我哋搵返佢返嚟先講。」梅蘭哭着哭着，突然道：「佢話就算我唔幫佢，佢會自己感染咗自己先，然後親自要去搵梁寬。」
「自己感染自己？佢諗住點做啊？」
「搵個針筒吉自己，或者搵個有病嘅人同自己上牀掛？」梅蘭舉手拭乾眼淚：「你知佢份人，咩都做得出。我唔會估到佢想點。」
「咁我哋去搵佢。總之我哋從長計議，任何人都唔可以做傻事。」趁着梅蘭哭泣的時機，凌峰終於成功來到梅蘭身邊，重新將她抱住：「無論係你定係沈綽，邊個都唔可以。」