[同人系列]新泥漿俠: 第六章:情動
我喺一個空曠地方,練習下我嘅泥漿俠。附近冇人又冇物,練習呢啲功夫最好不過,起碼唔會臭親人。順便試下新技能——飛行技術。
起初真係唔受控制,亂咁飛,好似雷達失靈咁,飛得七零八落。
「玩具…?」Chole突然出現,睇住我手上個裝置。
「My friend,點解你會喺度?」我見到佢,真係幾訝異。
「我見你鬼鬼祟祟,咪跟蹤下你囉。跟住跟住就跟到你嚟呢度。」Chole指住我手上個裝置,「呢個玩具係邊度搵嚟架?」
「呢個唔係玩具,係變身裝置,可以助我一飛沖天…」我仲扮咁飛天咁,做個手勢。
「點解可以助你飛?睇落去真係似玩具。」Chole繼續咁講。
我唔理佢,反正喺其他人眼中,呢個只係一件唔起眼嘅玩具。但係對我嚟講,佢係一個神秘嘅科技,代表住無限可能。
「點都好啦,我嚟呢度就係想練習下呢個裝置。」我道。
「你都未同我講,呢個玩具係邊度得番嚟…」Chole追問。
「一個叫蒼海博士嘅失敗發明。佢送咗俾我,我就攞嚟用。」我解釋。
「你真係相信呢個玩具可以助你一飛冲天?」Chole再問。
「信!點解唔信?又識飛、又識放臭彈,咁勁嘅科技,將來仲可以成為新一代最強英雄,犀唔犀利先?」我講得眉飛色舞。
「一日到黑淨係掛住個英雄夢…」Chole搖頭。
「呢個係大好機會。做唔做得成英雄,都要靠自己嘅努力同汗水。你估真係話做就做咩?」我認真咁講。
「隨便你啦,但係我覺得,就算你練好咗,一樣會俾人笑。」Chole語氣淡淡。
佢咁講,反而啱我心水。我真係冇諗過,當我變成泥漿俠嗰陣,啲人會點睇我。我仲以為自己好聰明。
既然預左俾人笑,呢個英雄我一樣會做。
講過嘅話就一定要做,對自己有一個承諾。我要做一個有信用嘅男人。
就係咁,Chole無聊咁睇住我玩咗一日。但係我覺得自己對呢個裝置,已經加深咗認識。
之後,我漸漸發覺,自己鍾意左Chole。但係佢睇唔出,我亦都唔刻意去令佢注意。
佢覺得我做呢種英雄會好傻。如果呢個時候同佢講,我一定會被請食檸檬。
回程嗰陣,我含情脈脈望住Chole。
「???我塊面有污糟野咩?」
「唔係呀…我只想望多你幾眼…」我道。
「我哋成日都會見面架啦。你今日神神化化,肯定係俾你個玩具玩上腦…」Chole講。
「無咁嘅事啦…我唔望你喇…」我即刻擰轉塊面。
點解呢種感覺,偏偏要而家先嚟出現?
呢種感覺好奇妙,我仲試下希望係自欺欺人,最好係…
愛情就係咁。你等佢嚟,佢唔嚟;唔等嗰陣,佢又突然出現,嚇你一跳。
有種愛情,永遠意想唔到…