---

Chole係需要知道師爺係一個點樣嘅人。
在此之前,原來師爺已經向Chole表白,而且係我行動嘅中午。

---

**某某餐廳**

「我單獨約左你出嚟,唔好介意……」




師爺雖然口才了得,但都有害羞嘅一面。

「唔緊要啦,你無咩朋友吖嘛,識多啲朋友係好事嚟嘅……」
Chole笑笑口道。

「你睇下食啲咩啦……」師爺道。

「我想食……你話事啦,你請吖嘛,食咩都無所謂……」Chole道。

師爺隨便點左兩個牛排餐,一齊食。





中午呢間餐廳真係好鬼多人,仲要排隊,係一個嘈交嘅餐廳,食野都唔係浪漫嘅事。不過都係個句,最緊要Chole開心。

師爺咁快主動出擊,就唔係一件好事。

Chole無望向師爺,自己玩緊手機。
未上野食之前,師爺就向Chole表白佢嘅用意。

心急如火嘅師爺,令到Chole稍有一點呆住。





「嚇……你係呢個時候向我表白?」

「你唔駛咁快答應我架,我只係講出我嘅心意……」師爺道。

「問題係我同你都啱啱識,你會唔會急得濟?」

「點會呢……鍾意嘅野我鍾意打聽趁熱。我知道你有男朋友架喇,不過我會好好對你多過你男朋友。」師爺道。

「實係Golden同你講我有男朋友啦係咪……」Chole道。

「係呀,不過佢唔肯講你嘅野俾我知。唔緊要啦,你嘅野可以慢慢發堀……」師爺道。

Chole心諗:
原來Golden幫自己兜左個大話出嚟,佢都算係有情有義,Golden真係唔會令我失望嘅。
佢放心左落嚟,只係霎時間俾師爺嘅行為令人反感。





不過Chole心裡面係未完全接受到師爺。
自己仲未摸清師爺個底;
第二呢種急性行為自己又唔鍾意,因為知道自己咩性格——慢熱嘅人唔會咁易接受新事物;
第三太有自信唔係一件好事,仲要做人第三者;
第四就係太無原則同承諾,自己都唔會鍾意。

「點解你會鍾意我?係幾時嘅事?」Chole問道。

「無耐之前就覺得鍾意你。我起初都唔係好意思講,但唔講自己個心又好難受……」師爺道。

「你鍾意我啲咩?」Chole繼續追問。

「純真、可愛,都係我鍾意嘅type……」師爺道。





聽完之後,牛排餐慢慢奉上。
Chole點都會安安靜靜食埋呢餐,無咩特別,就咁安靜渡過。
講咩都無用,越講越多,反感程度就會增加……

---

「呢段時間,我希望你唔好搵我了……」
食完呢餐之後,Chole彈出一句說話。

「點解呀?我對你係唔係唔夠好?你咁快就否決我,或者你俾個機會我,我會對你好好嘅……」師爺道。

「你太急進了,我需要一啲時間諗清諗楚。你繼續咁樣,只會令我反感……」Chole結果都係拒絕師爺。

師爺條件幾好都好,都唔係Chole鍾意個type。
更何況師爺缺點太多,Chole會諗,之後一齊仲更加辛苦……





「都係嘅……咁我俾一個禮拜諗清楚啦……」師爺道。

「師爺,你仲係唔明?呢個唔係一個禮拜時間嘅問題。你令我太反感呀……」Chole想離開。

「唔好意思……」

一瞬間,師爺就捉番Chole隻手。

「你想……點啊?」

「我想你俾次機會我好好對你,希望你可以做我女朋友……」
師爺誠懇嘅態度,令Chole一再反感。

講左一次就唔想講第二次,講左第一次都係死性不改,就唔係反感,而係扯火。





「你都係放手先啦……我又唔鍾意你,你夾硬嚟都無意思,咁樣係唔會幸福架……」
Chole想甩左師爺隻手,但師爺捉緊住。

「你試都唔試就話唔會幸福?啱啱又話俾時間你,轉個頭就話唔鍾意我?」
師爺加重語氣。

「你唔夾硬嚟,我都唔會太過反感……」Chole道。

「咁好吖……我俾一個禮拜時間諗清楚。不過到時你可以應承做我女朋友……」師爺道。

「師爺,好喇,點解我要應承做你女朋友呀??」Chole嬲爆爆。

「我知道你顧慮啲咩。你講,你現任男友係邊個?我打扁佢,等你可以專注做我女朋友……」師爺道。

「笑死,我點解要同你講我男朋友係邊個……」
Chole大力拎開佢隻手,離開前一刻講埋最後一句話:
「你以後……唔好搵我,pls……」

「Chole……阮……皓兒……」師爺唔甘心,追上嚟。
有啲路人就係度睇埋呢齣戲。

Chole離師爺越來越遠。

佢將手機所有關於師爺嘅事都立即block左佢。
費時師爺死纏難打,佢寫咩都無用,呢個人己經無機會接近Chole。

「呼……都未見過啲咁硬頸嘅人……」Chole心諗。

佢同左佢啲朋友講之餘,又會同我講。
我係佢值得信賴嘅好兄弟,有啲咩事,大家會互相傾心事、互相撐大家……

---

**手機短訊之上……**

「我本身都己經想講師爺佢想主動出擊架喇,無諗過佢急成咁……呢兩日我都比較忙,希望你唔好見怪。」我道。

「工作要緊,我明嘅。加上你係英雄,係我份工過於輕鬆姐……」Chole道。

Chole點都會體諒我。

我而家真係少左個競爭對手,不過我會選擇慢慢嚟嘅。

「係呀……咁你block左佢未?」我道。

「我己經封鎖左佢喇……你都要封鎖佢呀,知唔知?」Chole都唔想同師爺行咁哂。

不過我暫時唔會封鎖佢住,我要睇下師爺會玩咩花臣,我要玩番佢轉頭……

「我留先,我而家都唔會搵佢,睇下佢要玩咩先……」我道。

「都好……如果佢whatapps你,你記得同我講,睇下佢講左啲咩……」Chole道。

「無問題呀……」我道。

不過我都希望師爺知難而退。
問題係搞到大家連朋友都無得做,本身對佢都無咩好感,多一個朋友少一個朋友唔算咩……

人生遇到嘅人有好有壞,而家認清楚師爺係咩人都未算遲……