待佢走咗之後,屋企突然變得異常寧靜,連窗外微風拂過樹葉嘅聲都聽得一清二楚。我癱喺沙發上,望住天花板,心頭一股莫名嘅苦悶慢慢湧上來。呢種感覺唔似係失去,反而似係一場夢醒咗,夢中嘅溫柔與美好,一瞬間消失無蹤。

因為佢,我決定喺呢個世界搵份工做。以前我總係覺得呢度係一個虛幻嘅空間,係我昏迷後嘅意識投射。但係自從佢出現,我開始相信呢度係一個真係存在嘅世界,甚至係一個可以重新開始嘅地方。

因為佢,我漸漸適應咗呢度嘅生活。雖然只係喺呢度得幾日,但係我已經習慣咗街頭巷尾嘅人情味,習慣咗佢笑起嚟時眼角微彎嘅模樣,習慣咗一齊去食炒冬甩、去商場閒逛,甚至係一齊睇夜景。

因為佢,我睇到呢個世界嘅美好。結果仲係忍不住瞓著咗,呢種安穩嘅感覺,係現實中從未有過嘅。

正當有人敲門,起初我聽唔到聲,只係覺得有陣陣輕微嘅震動傳入耳中。到後嚟敲門聲越來越響,似係有人喺門外急切地求救。我實在抵唔住,唯有醒起身嚟,揉住眼,睇睇鐘,而家係凌晨四點。





我先發覺到門口根本冇門鏡,唯有直接開門睇下。冇驚嚇,亦都冇緊張嘅感覺,我一如既往咁開咗門。

門外站住兩個男人,一高一矮,穿住黑色風褸,眼神銳利,似係準備隨時動手。其中一個戴住眼鏡,睇落有啲似斯文人,但係眼神中卻透出一絲陰冷。

「你殺咗澤明,已經冇得返轉頭... 另外,你落地獄嘅時間雖然重有一個禮拜,但係已經提前咗。」呢個人同澤明應該係同一夥人。

「我無端端又做咩落地獄呀?」我問,語氣中帶住一絲不耐。

「其實唔怕同你講,現實嘅你喺前日已經救唔返,其實你已經死咗,你先嚟咗呢個極樂世界。其實你昏迷嗰陣已經提早嚟咗呢度,但係你唔屬於呢個世界,所以你一定要走...點解會提前咗?因為你殺咗澤明,已經冇得返轉頭...你要接受呢個現實,唔好諗住想殺我。閻羅王一定會強行捉你走...」





我打量住佢,呢個人托一托眼鏡,雖然有啲似斯文人,但都可能暗藏危機。佢提到閻羅王,代表真係有呢個人,即係話我真係已經死咗。事件越來越奇怪。

「死咗?我昏迷咋喎,點解會死咗呀?你係咪搞錯咗啲乜嘢呀?我生前有冇做過壞嘢?我有冇做過啲壞事?無端端拉我落地獄?」

「因為你殺咗澤明...」佢話。

「你哋係咪傻㗎?我講緊我未殺佢之前... 仲有係佢無端端走過嚟同我講話要落地獄。我係好人,我點會落地獄?佢要用電槍強行拉我走,我冇可能唔反擊掛...?」

我講得非常之嚴厲,語氣中充滿怒火,雙手緊握,眼神中透出一絲不屈。我唔會容許任何人將我拉入地獄,尤其係我根本唔屬於呢個地方。





當然佢話千千萬萬個都會捉走我,難道地獄真係有咁多人咩?有咁空閒咩?

「唔好作無謂嘅反抗,落地獄定落地獄都唔到你話事。你始終都唔係呢個世界嘅人,你係唔係都要走...」

「笑話...你嚟幾多個我就打幾多個走。我係個好人,我唔會落地獄。要搞清楚呢一點,落地獄嘅主要原因係因為生前做過壞事。既然我冇,我憑乜嘢需要落地獄?唔好引我嬲...」

「咁好啦,你一意孤行,我哋就唯有強行帶走你...」

呢個眼鏡男行前咗我家門口一步。就喺呢個時候,Cathy走番轉頭,返到我家,見到呢種情形,見到眼鏡男。

「佢到底係?」Cathy問,語氣中帶住一絲緊張。

「佢應該係地府嘅人,佢想捉走我...」我話俾佢知。

話音未落,呢個眼鏡男已經行近我面前,實實地捉住我嘅膊頭。





「你憑咩可以捉我男朋友?仲想捉佢落地獄?你問過我未?...」Cathy急速跑上前,一拳打爆佢眼鏡。

碎片散佈一地。

「你竟敢打爆我眼鏡?你知唔知道得罪我嘅下場係乜嘢?就係要落地獄!唔好以為你係女仔就可以赦免,你哋兩個都要一齊落!哈哈哈...」

佢笑得好似一頭惡魔咁,輕鬆得意。

我扯開佢隻手:「我唔會有事嘅...」

跟住一拳打暈咗呢個眼鏡男,佢唔勝過我哋就倒咗喺地上。

「搞咗咁耐先可以打暈佢,係喎,點解我係你男朋友嘅...」





「冇呀,我係想以假亂真,嘻嘻...」

「死妹釘呀,咁玩我。雖然我都鍾意你,同你一齊都算係幾舒服...」

除咗喜歡你,仲有一年一度冬甩節...

講完話之後,我哋本嚟想收拾殘局,但係呢個男人又消失咗,另一個男人出現喺我哋面前。佢係真正嘅時空平行者,維持時空秩序。一波未平一波又起。

「𡃁仔...」

「你又嚟想捉走我落地獄?」

「我唔係嚟捉走你嘅,我係想同你講,你可以返返現實世界。你到底想唔想?」

「你講緊啲乜嘢呀?一個兩個又話我死咗,你又話我可以返去現實世界。到底邊個真邊個假?係咪喺度玩緊我?」





「我無情情做咩要玩你。如果你真係死咗,我都可以帶你上天堂。因為時空錯亂你先嚟咗呢個世界。你唔屬於呢個世界。之前你遇到嗰啲人,全部都係壞人,想擾亂時空秩序。」

「咪住先,咁Cathy點呀?我鍾意佢喎,而家我唔捨得呀...」

「你唔好離開我呀,我同你一齊好開心呀。」Cathy話完之後,竟然流出一絲絲眼淚。佢根本唔捨得我,我知道我對佢嚟講應該好重要。

「自從遇到你之後,我都冇咁寂寞。琴日冬甩節再遇到你,到今日去行商場,再去食炒冬甩。雖然同你過嘅日子唔多,但係真係幾開心...」

佢邊哭邊講。

「唔好咁啦,我都唔捨得你㗎。其實呢度嘅生活點都好過現實。我喺現實要還債,因為我老豆試咗好多錢。所以我喺現實過嘅係一啲好慘嘅生活。嚟咗呢度之後識到你,我真係開心咗好多。雖然有一刻想返現實,但係直到啱先,我不知不覺咁鍾意咗你...」

我都忍唔住流淚,眼淚流落我心入面。





「但你要明喎,你唔屬於呢個世界,要接受呢個係事實。仲有一件事要同你講,你呢位Cathy,喺現實佢已經死咗好幾年。佢患咗cancer,最後不敵病魔最後都死咗。嚟咗呢個世界之後,佢畀人洗走咗現實嘅記憶。佢係呢個世界嘅人,你同佢點樣都係唔到一齊...」

點解會咁?我好討厭呢個事實,我想去逃避。點解要話比我知?現實係咁殘酷。知道要同佢分開,我當然十萬個唔捨得。雖然同佢過嘅日子唔係好長,但係呢啲回憶都迫留喺我心入面。

「我係咪一定要走?我可唔可以反抗你?」

「時空錯亂你再留係度都無用。不過你有一個禮拜時間可以留喺度,到時你會突然間返到現實,你做唔到任何嘢,因為你一定要走...」

「咁回憶點呀?我離開咗呢個世界返去現實,咁我會唔會仲記得Cathy?」

「唔會㗎喇。你返到現實之後,呢度一切嘅回憶都會消失。你要記住,你唔會落地獄,你仲未死到。澤明同眼鏡男杜馬嘅死唔關你事,呢件事同Cathy都係一場意外。」

「點解我昏迷咗之後,要我睇到呢個世界?如果我唔係呢個世界,唔會巧合咁遇到Cathy,咁我就唔會咁傷心。而家有咁多唔捨得...」

「你醒咗之後,你會發覺呢個只不過係一場夢。呢個世界只係一個過渡期。你仲有一個禮拜可以好好相處。一個禮拜唔係畀多你,唔係畀個限期你,係因為一個禮拜之後你就會醒。所以我哋都幫你唔到留喺呢個世界。本身你都未死,只不過係昏迷咗咋嘛,我地亦都唔可以打亂現實嘅秩序。」

真係...冇其他辦法咩?真係要同佢講再見咩?真係要佢一個人孤獨咁留喺呢個世界咩?如果我喺呢個世界死咗會點...?天曉得...

重有一個禮拜時間。呢個禮拜我一定要同佢好好相處,唔可以浪費同佢每一分鐘。我要完成呢個美好而感人嘅故事...

我都想過喺呢個世界我死咗會點,就係我嘅命運會落地獄,因為喺呢個世界我確確實實殺咗澤明。我係逃唔到,都冇其他選擇。唯有珍惜同佢每一刻...

諗左一陣,下一秒,Cathy已經忍不住咁撲入我懷抱,雙手緊緊箍住我,頭埋喺我頸度,眼淚一滴一滴咁流落去。我亦都唔知點樣安慰佢,唯有將佢摟得更緊,心入面嘅痛楚好似刀割咁。

「...我唔想你走...」Cathy再次話咁一句,聲音細細,但係充滿咁執著。佢嘅眼眸中閃住淚光,但係眼神依然堅定,似係唔會放棄。

「我唔會走...唔會走...」我話俾佢聽,雖然我心入面都知,呢句話只係安慰。

「你唔屬於呢個世界...但係我哋嘅愛係真嘅...」佢話,指尖輕輕咁撫過我嘅唇,似係想將呢一刻嘅觸感記低。

「係...係真嘅...」我點頭,心入面一陣暖。我哋嘅愛,係超越生死、超越時空嘅。即使我哋只係喺呢個世界相遇,但係呢份情,係真真正正存在嘅。

我哋決定唔再理會邊個係地府、邊個係時空管理嘅人,我哋只係專心咁過最後一週。呢一週,我哋要將所有嘅愛、所有嘅溫柔、所有嘅回憶都儲起嚟,留低起嚟。
---

...........