當故事變成事實: 美欣的眼淚
美欣在窗簾中找出一條罅隙，再著我走到她身旁。她指著旁邊那座的一個中層單位說：＂佢住喺嗰度。＂我問：＂佢望到你，你都望到佢喎。所以你一入屋就拉埋窗簾？＂
美欣：我唔係望得好清楚。但佢嗰度望落來就清楚好多。
我：又會咁危險俾你住呢度？
美欣：佢話方便嘛。佢想搵我，同老婆講落街散步，去商場行個圈都得。
我：但你識佢老婆，都會易撞到……
美欣：係撞過架。我話我父母喺度住。
我：咁你地真係要拉好窗廉。
我跟隨美欣回到沙發坐下。她告訴我：＂其實呢個單位係佢出錢租。唔係屬於我。我都後悔以前冇聽你話畀心機啲讀書。我而家只可以將佢俾我啲錢儲起或者投資……＂
我：佢厭左嘅話就弊……
美欣：冇話弊唔弊嘅。點呀？我似唔似一隻雞呀？
我：唔好咁難聽。何況你話你唔抗拒佢嘛。即係都有感情……
美欣：感情……我唔知有冇……
美欣喝了一口汽水再說：＂我估……同佢搞得多，真係搞出左感情。我係咪好污糟？＂
我：咁你兩個成年人都同意，邊會有污唔污糟。
美欣：我做人小三喎。仲要……你知唔知？點解我鍾意同佢搞？
我：點解？
美欣：我諗起都覺得恐怖。我估我唔係真係鍾意左佢。我係鍾意同人地個男人搞。仲要喺佢屋企附近搞。
我：下？
美欣：接受唔到呢係咪？我自己都接受唔到。所以你叫我點同其他人講？
我：唔係接受唔到。你自己覺得開心、舒服咪得。呢樣野最重要最緊要。
美欣：你唔覺得我好壞、好賤、好污糟咩？
我：點會呢？喺我心目中你永遠都咁靚。
美欣向我報以一個微笑，但同時眼中卻有淚光。我見到飯桌上有一盒紙巾，就拿了幾張紙巾給她。她接過後擦著眼淚說：＂多謝你氹我。但我知自己真係好壞、好差、好污糟。＂我拍拍美欣的肩說：＂唔係咁，唔係咁。信我。＂美欣卻哭得更大聲，同時又捉著我的手。
這一刻，我的腦海突然要處理很多資料。首先，是當年美欣首次會考失敗後放聲大哭時的情況。她坐在教室一角，我又是這樣的安撫她。我記得，她那時也是有捉緊我的手。第二、多年沒有親近過美欣，現在和她在一個私人地方如此靠近，我的色心出現了。我問自己：應主動嗎？如果我不主動，但美欣吻過來或者擁著我，我又應怎樣？但同時，我想起幾個月前在Ｓｔｅｐｈｙ家看著她哭的場面。現在我的心，真的有了另一個人。那到底，我應該怎麼辦？
不到三十秒，我就要做決定。因為美欣問我：＂你介唔介意俾我攬住呀？＂美欣這句說話令我進一步記起會考放榜那天的情況。當天她也問我能否讓她擁著。因為那兒始終是學校，被別人見到我們這樣不太好。但我沒有拒絕。我擁著她，讓她哭到再沒有力氣哭下去為止。
於是我這樣回應：＂好似嗰時放榜咁？＂美欣說了一聲＂嗯＂，我就主動將美欣擁在懷中，而她也雙手擁著我。我像當年一樣，輕撫著她的頭讓她哭下去。我記得那天，她哭完後我在校園中拖著她，沒有人干涉過我們，就像突破了一個禁忌一樣。美欣應該也想像相同的畫面：＂你記唔記得嗰日我喊完之後，你一路喺學校拖實我？＂
我：記得。永遠記得。
美欣：但係我地而家唔係中學生啦。