當故事變成事實: 別人的情婦
下車時，我才留意到美欣的手袋是一個名牌。我問她：”個手袋係咪好貴？”她答：”係。五位數架。”
我：咁捨得？
美欣：買野，唔一定係自己俾錢嘅。
我：嗯……
美欣：不如去七十一買啲野上去飲。你仲鍾唔鍾意飲百事？
我：好多年冇飲啦。
美欣：以前唔係成日都要飲百事，唔肯飲可口可樂嘅咩？
我：嗰陣時懶係特別嘛。
美欣：而家呢？
我：而家……冇所謂啦。你以前都唔會恨用呢啲名牌。
美欣：咁人愈大，點都會變嘅。
我：有啲野又唔會變嘅。
美欣：乜野呀？
我：你仲係咁靚。
美欣：哈！你真係變左。以前你邊會咁口花花？
我：我講真心話啫。
這時，我們要走進便利店。買了一些飲品和零食後，美欣就帶領我走向她的家。
原來美欣的住所，在一個藍籌屋苑內。在我印象中，她的收入不多，為何有條件住在這呢？在升降機內，我問她：”你呢度，買定租架？”她的回應是：”陣間話你知呀。”我不明白，為何這麼簡單的問題，美欣在升降機內不能回答。
踏進美欣家，她開燈後第一時間去拉好窗簾。之後我倆就坐在沙發上。我將零食和飲品放在前面的茶几，思考應該說些甚麼。不過，美欣搶先說話：”你頭先咪問我呢度係租定買嘅。”
我：係呀。
美欣：其實……又唔係租又唔係買……
我：下？即係點？
美欣：頭先我咪話人會變嘅……我已經唔係你以前鍾意嗰個美欣……我做左個壞人……
我：點解咁講？
美欣：我住得喺度。用到呢個手袋，因為我做左人地情婦……
美欣的語氣看似輕描淡寫，但我感受到她內心那種不安、不快的情緒。我不知怎樣回應。應該追問詳情還是怎樣呢？美欣見我沒有說話，就說：”唔講野，係咪睇唔起我呀？”
我：唔係……我估唔到你會同我咁樣講。一時間唔識俾啲乜野反應你。
美欣：哈！當年你同我表白時，我都唔知點俾反應你。過左幾秒你就來捉住我個手臂。
我喝了一口汽水。放下汽水罐時見到廳的一個櫃上有美欣和一個男人的合照。我望著照片說：”就係佢？”
美欣：係呀。
我：係咪叫高富帥呀？
美欣：係高同富嘅，帥唔帥就見仁見智。
我：你特登叫我上來就係講呢樣野我知？
美欣沉默了一會才說：”呢件事……我一路都冇講過俾人聽。Rebecca同其他朋友都冇。太羞家。屈住左好耐好耐……”
我：咁做乜同我講？
美欣：唔知呢。我頭先見到你，就覺得我可以同你講真話。
不知何故，聽到美欣這樣說，我很想立即坐在她身旁，擁著她。但我很清楚她只當我是個老朋友而己，故不可以輕舉妄動，所以我只向她報以一個微笑。
美欣：你介唔介意聽我講多少少？
我：點會介意？
美欣：我呢幾年去左賣化妝品。其實佢老婆係我個客。但後來佢竟然主動溝我。我又冇拖拍、又爭卡數，佢又唔係差，所以我就做左壞人小三。都做左兩年啦。
我：咁你鍾唔鍾意佢架？
美欣：呢個問題。我成日都問自己。我冇答案。或者根本唔重要。最重要係佢俾到我想要嘅野我，而我唔抗拒佢。我係咪好壞？
我：咁你要嘅就係個手袋、呢個單位？
美欣站起來，走到窗前。