當故事變成事實: 撞破
在車上，我和Stephy都沒有多說話。到差不多到我家時，Stephy提醒我：”喂，記住買套呀！”我點點頭，就打算下車後在便利店先買一盒，然後才回家。同時我想起我可能沒有足夠現金在身，八達通也未必有足夠餘額，於是就拿出錢包看。
Stephy見我拿著錢包就問：”做乜望住個銀包呀？”
我：可能要去㩒錢先。
Stephy：最近間銀行又要行一段路喎。唔好咁麻煩啦。你喺我銀包拎住張五百蚊先啦。
我：下？唔係咁好嘅。
Stephy：你幫我睇住個囡咁辛苦，我都未同你計啦。
我：咁我係自願架嘛。
Stephy：又或者，我就係想我地兩個乜野都唔計呢。如果你覺得唔comfortable，咪遲啲還返囉。
我：哦，咁唔該先。
之後我就跟從Stephy的指示，在她錢包中拿走一張五百元鈔票。我下車到便利店買避孕套、為八達通贈值，就回到家中換回男裝的內褲。整個過程只有十分鐘左右，我又回到Stephy的車上。
我告訴了Stephy美欣的地址，她就載我往美欣家。我們又是幾乎全程默不作聲。我不知道Stephy在想甚麼。我實在無法理解為何她明知我要去會合另一個女子，而且很可能會跟美欣上床，她都要載我過來。但更重要的是，似乎我今晚難免要在美欣和Stephy之間做一個抉擇。坦白說，這刻的我，幾乎整個心都在Stephy那邊，對於跟美欣幽會並沒有太大的期待。
車快到美欣家時，我就拿過手機跟美欣聯絡。我跟她說我早到了，但她沒有回應。同時Stephy要搞清楚在哪兒讓我下車：”佢住邊座架？我喺最近嗰個位放低你？”
我：前面轉右，左邊第一座就係。
Stephy：佢應該唔會喺屋企樓下等緊你掛。
我：佢冇覆我。應該唔會。
Stephy：咁就喺門口放低你啦。
我：唔該。
Stephy：你完左之後打俾我啦。雖然我唔知你幾時會完。但無論你決定係乜都好，我都好想知道你點諗。
我：哦。
Stephy搶著要吻我一下才讓我下車。我下車後，站在街上望著Stephy的車遠去。我轉身走向美欣家樓下，卻竟然看見她和一個男人在大廈內走出來。雖然那男人戴著口罩，但我猜那就是林生吧。我見美欣握緊林生的手，應該留意不到我的存在。他們兩人向便利店先去。我很想跟著他們，但又沒有足夠的勇氣，只好在原地等著。不到兩分鐘，他們就在便利店出來，而且分道揚鑣。美欣向著我這邊走來，林生就向另一個方向走。我見到美欣拿出手機，我也因此留意著自己的手提電話。我在自己的螢幕中見到美欣在輸入信息，就索性走到她面前。我的出現嚇了她一跳！
美欣：咁快到左？
我：唔好意思，我頭先見到你同佢落樓。
美欣望向後方，應該是為了確保我倆已在林生視線範圍以外：”你撞破我地冇所謂嘅。最怕佢撞破我地啫。”美欣迅即拖著我的手。她這隻手剛才還在拖著另一個男子，這刻已捉緊我。這情景卻給了我一股很刺激的感覺。