<網上交友的第一次> 憑感覺愛上你: 第四章：新生活，新開始
三年後，我已經大學畢業。我返到香港繼續追求我嘅夢想。我入咗一間廣告公司做，面對新嘅工作同環境，我就知道我要開始
新嘅里程碑。職場上嘅挑戰，令我人生好充實。不過所面對嘅壓力，亦係我前所未有既辛苦。我係市場部嘅員工，一個禮拜要
OT三四日亦在所難免，何況我係新仔。 初初返Office工，我真係唔係好習慣，可能喺英國住咗幾年，做野既速度真係唔及都市人。有時，我係最後一個人離開公司。
話說有一日我又係最後一個離開公司，個lift落到去5樓嘅時候，有個人入咗嚟，我心諗：估唔到有人同我一樣開OT開到咁夜。
佢入到嚟，佢向我點一點頭，當然我都向佢微笑咗一下。
『係呢，之前未見過你嘅？』
『啊，我啱啱入黎做無耐，喺市場部果到咋嘛』
『ohh，你好呀，我叫Kyle，係會計部度做』
『ohh，haha你好，我叫Kelly』
去到公司樓下，大家講完byebye就各自返屋企。
返full time工唔同返part time，至少返part time會有多啲私人時間做自己嘢，可以得閒睇下電視咁，依家嘅我，返屋企只係沖涼，食飯同
瞓覺。而第二朝亦要早起身返工。
Katy：『Kelly，麻煩你幫我攞份文件落去會計部』
我：『哦，冇問題』
Katy係我新識嘅朋友，通常食lunch我都會同佢同埋幾個同事一齊食，喺公司，我同佢最熟，佢亦都時常幫我。佢都算係我嘅
上司嘅，因為佢係我果team嘅leader，名義上係marketing manager，而我，就係marketing assistant。
落到去會計部，咁啱reception果度嘅職員唔知去咗邊，我企咗係果度，手拎住份文件袋，望見啲人各有各忙，好似見唔到我
咁，尷尷尬尬，我突然間唔知點算。
『Kelly？』
『ohh，Hi Kyle』
『你有事搵我地？』
『啊，係呀，嗱，係Katy叫我比你哋』我遞咗份文件袋比Kyle
『ohh唔該晒，依份係咩黎？』
『下....咩黎?其實我都唔知，Katy無講啊，我返上去幫你問下』
『haha，唔駛，你係度打個電話咪得囉』
『啊，係呀可，haha』
點知....原來Katy一早有講，係我無留心聽，返到上去，結果比Katy鬧....
『Kelly，我咪同你講咗果份野係好緊要，要親手交俾羅經理架囉，好彩你問番我果份野係咩黎，如果你隨便比咗一個人，就有機會比隔離team嘅人亂改野，到時份野批唔到你話點算？』
『好對唔住，下次我會留心啲』
『咁份嘢你交咗比邊個？』
『羅經理唔係到，我交咗比Kyle』
『Kyle，佢係負責我地team嘅財政，都還好啲，你繼續做野啦』
『嗯』
Katy雖然好照顧我，而我同佢亦都私底下關係唔錯，不過經過我幾日嘅觀察，佢係個公私分明嘅人，雖然比佢鬧我係唔開心，
不過我都明白嘅，係我自己唔留心聽人講野。
OT，OT，OT，好多時8:00先走得，真係搵錢甚艱難。部lift落到去5樓又停咗，咁啱又撞到Kyle。
『Hi，咁啱嘅，又OT？』
『haha係呀』
『點呀？你果日有無比Katy鬧？』
『下，你又會知嘅？』
『Katy最緊張budget批核嘅野，通常佢都係要自己人親手交比羅經理，你知啦，職場如戰場嘛』
『果日你無出賣我地架可？』
『小姐，係邊個負責管理你果team嘅財政架？』
『haha，又係喎可』
『你食咗飯未呀？一唔一齊食？』
『好呀！我超肚餓！』
『跟我黎啦，帶你食好野』
佢所講嘅好野，係一間茶餐廳，佢話果度嘅炒野好夠火候，我二話不說即刻嗌咗碟乾炒牛河，而佢嗌咗碟豆腐火腩飯，然後我
地諗住share。
『haha，男人的浪漫』
佢對我笑咗一笑
佢坐喺我隔離，我偷睇到原來佢上緊高登
『啊，原來你係巴打！』
『ha，我都係間唔中先上啫』
『haha咁驚做咩呢，我都係絲打黎架！』
『高登會有絲打？』
『你唔信呀？』
我遞咗我部電話比佢睇，開咗高登個app，點知佢都係唔信，話我肯定係CD－ROM， 咁我唯有show我個高登account比佢睇
『haha，原來你叫K婷』
『oh shit！自爆咗添！』
『放心喎，我都唔會將你post上網嘅』
『唔得！咁唔公平！你比返你個account名我睇！』我伸咗隻手出嚟
『你都傻嘅』
『喂呀！講比我知啦！』我嘗試搶佢部電話
『喂！依度大庭廣眾黎架！』佢不斷攞開部電話
『唔比就算！』
見啲野黎咗，我就食野，都費事理佢！醫肚要緊嘛。食完野，我地就各自返屋企，臨走前，我地交換咗電話。
通常一上到車，我最鍾意攞部電話出黎一邊聽歌，一邊上高登。我發現有人PM我，我click入去睇，
係一個叫 無形人 嘅人PM我。
無形人
『估下我係邊個』
K婷
『唔駛估都知你係Kyle啦！』
返到屋企，沖完涼，臨訓前再睇一睇高登，又有PM。
無形人
『Kyle？邊個黎架？』
K婷
『咪扮曬野啦！聽朝返工見啦，早抖！』