<網上交友的第一次> 憑感覺愛上你: 第十五篇：原來一早識架？（2）

果日，我地3個女仔先約好喺馬鞍山等，再轉專車到烏溪沙個白石燒烤場。天公造美，有太陽得嚟唔算熱，可能係春天關係

吧。到達場地，已經見到2大男士喺到為我地霸位。佢地一身背心短褲，的確夠陽光。Jessica見到佢地已經好熱情飆過去坐係

Kenneth隔離，我左望右望，都唔見Wilson。

Katy：『係呢，Wilson遲到呀？』

Martin：『唉，唔駛理佢了，條友突然有野做，所以甩底』





我細細聲講咗句『又會咁突然嘅』，忽然我眼尾睄到Kenneth好古惑咁望住我，我當然無望過去，佢個樣古古怪怪咁，之後我

就叫Katy陪我去廁所梳起啲頭髮。返到去，就見到佢地填緊張食物紙，5個人都唔需要食咁多野，更何況Jessica減緊肥。填完

後，正當我同Katy諗住去交單嘅時候，Martin就一手拎咗張紙。

Martin：『等我地嚟啦』

佢地去左入紙俾錢，咁無理由3個女仔喺度無所事事嘅，咁我同Katy就企起出面等啲工作人員執齊啲食物，咁2位男士就負責

開爐。我同Katy一邊傾偈就一邊望番去果邊討論Jessica。我地都喺度笑佢依個鹹濕婆笑淫淫咁望住Kenneth，佢肯定冧阿

Kenneth。我同Katy拎住一袋二袋返埋我地個位，爐亦已經起咗火，好快就急不及待去燒。鬼咩，Jessica約1：00pm，燒果時

都已經係半個鐘後嘅事，所以個個都好肚餓。

Martin：『係呢，之後都唔見你地再落過去間酒吧嘅』

Jessica：『依兩個對酒吧一般般架咋』指住我同Katy





Kenneth：『係咩，Kelly乜唔係自己落過去咩』佢又好古惑咁對住我笑

Katy同Jessica即刻擘大眼望住我，而我亦唔知點解佢地咁驚訝

Jessica：『有啲咁嘅事？因為Kyle呀？』

Katy：『係囉，叫我地陪你吖嘛』

我：『無事，喂！你又知嘅，Wilson同你講架？』

Jessica：『哦！你密會Wilson，原來係你唔理Kyle在先嘅』

我：『痴線，邊有，咁啱見到啫』

Martin：『邊個係Kyle？』





Katy：『Kelly男朋友』 Jessica：『朋友』

Martin：『下？』

Jessica：『都係朋友嘅一種haha』

Kenneth：『當然係佢講，唔係仲有邊個，我仲唔止知咁少添』

Jessica：『有秘密爆？』

Kenneth：『Kelly同Wilson係一早識嘅！』

我突然間打咗個突，今次4條友同時間望住我，搞到我都唔知點咁





Jessica：『原來你同Wilson一早識架？姊妹都唔講！』

Katy：『但係上次酒吧見到你哋唔似識喎，你仲執到佢嘅野添』

Kenneth：『佢地好耐之前上網識架，未親身見過面，第一眼認唔出唔出奇嘅』

我：『喂！乜你知咁多我同佢嘅野架，佢講晒比你知？』

Kenneth：『我諗差唔多掛，你地果時仲成日Line嘛』

我：『啊，好喇好喇，咪繼續講啦』搞到我有啲尷尬

Jessica：『唔通係前緣未續，上天比你地繼續？』

Martin：『不過可惜Kelly已經有男朋友啦，可憐Wilson dry咗咁耐都未有女朋友』





Jessica：『有乜所謂，橫掂果個Kyle近排對Kelly好似淡咗咁，其實Wilson睇落都唔錯呀，係靜咗啲啫』

我：『喂！你地2個爆完我啲野未呀！』

Jessica：『唔緊要，Kenneth我地今晚私底下講』一路講一路奸笑

我即刻睥住Jessica，Martin同Katy都喺度笑。

燒到4點幾，我地就執嘢走人去食糖水.......