紙言

<網上交友的第一次> 憑感覺愛上你: 第十六篇：嘻嘻，舅母 （1）





  ↵琴晚Kyle約咗朋友飲野，所以我無去佢屋企訓。今朝好早就起咗身，星期六，今日到我輪休。我打開窗簾，猛烈嘅陽光射入我

間房，我相信又係美好嘅一日。我無搵Kyle嘅意願，因為我已經plan好曬行程。陣間同屋企人飲茶，同佢地行沙田嘅IKEA，順

便搜索下啲特別嘅家品，我相信屋企多啲色彩，人自然都會開心啲。正當我諗住出房刷牙洗面嘅時候，放喺床上嘅電話突然間

震......







去佢屋企要45分鐘嘅時間，大圍轉完車又要再轉。出到地面，攞住部手機睇住個google map，行咗10分鐘先到。

叮噹....門口打開，見到有個細路女企咗喺門側邊....

『你黎到就好了，唔該幫我搞掂佢』Wilson指住個細路女

『咁得意嘅，你個女呀？』

『閘住！佢係我家姐個女，佢同姐夫去咗美國工幹，今朝擺低咗佢就走咗』





『你唔識睇住佢就咪應承人嘛』

『仲好講，本來約咗Martin佢地今日打波架，但係我阿媽無端端俾老細急call要返工』

『喂！你唔係諗住叫我睇住佢，之後走咗去嘛』

『你放心，我無咁衰仔，但我都唔識睇住佢，嗱，果度有3大袋嘢，你自己執生啦』

『下...咁佢有無schedule一日要做啲咩？』





『佢阿媽話12點要食野，3點要訓晏覺，7點要食夜晚，9：30要訓覺，其餘同佢玩下，講下故仔，比佢睇電視就得，佢要做咩食咩寫晒喺張紙度』

『下，依家湊小朋友咁麻煩嘅』

『你同佢玩啦，我去打機』

『有無搞錯！』我即刻用鄙視嘅眼神望住佢
－－－－－－－－－－－－－－－－－－－－－－－－－－

『小妹妹，你叫咩名呀』我用小朋友嘅語氣問佢

『我叫歐陽天欣，英文名係Christy，今年4歲，讀緊K2』

『嘩，你咁犀利嘅！』佢嘅答法真係嚇我一跳，依家d細路咁叻嘅





『佢阿媽臨入學前就叫佢背熟廣東話英文普通話嘅自我介紹架啦，犀利乜鬼，依家個個都係咁』Wilson搭嗲

『乜你咁講架！』

『不如我同你玩？你有咩玩具呀？』

Christy走去果3大袋嘢，原來其中2袋都係佢啲玩具，人仔細細佢好有力氣，佢一步一步咁拖袋玩具嚟，之後一野倒晒落地。

『嘩，你有咁多玩具嘅？』

佢笑咗笑

地上面有公仔，有好細本嘅書，有泥膠，有喇叭仔等等。啲公仔原來係有得換衫，佢攞咗隻女仔，然後幫佢著裙，咁我就陪佢

玩，我攞咗隻男仔，然後幫佢換衫褲，原來仲有得戴帽。其實幫公仔換衫真係幾好玩，我記得以前幫barbie換衫前仲會幫佢用





番梘洗頭洗身，抹乾淨哂，吹埋個頭先幫佢著衫著鞋。有次去旅行，留低咗barbie對鞋喺酒店，我記得我仲喊咗好耐。講返正

題，Christy突然間走咗去Wilson隔離.....

『舅父舅父，陪我玩，舅父....』Christy一路講一路搖Wilson隻腳

『舅父睇緊戲呀，唔得閒』

『暫停先囉，難得Christy叫你陪佢玩，你要好好珍惜呀』

『舅父舅父』Christy眼甘甘望住Wilson

Wilson最終抵受唔到Christy嘅哀求，之後Christy拖住Wilson隻手叫佢坐地下。Christy從我手中攞走咗個公仔然後比Wilson





『舅父依個你既』

之後Christy將佢嘅公仔比咗我

『舅母依個你嘅』

我欣然接下，但係我慢慢發覺有啲唔妥，Wilson亦擘大咗隻眼，此刻我同Wilson對望

Wilson：『你叫佢做咩話？』Wilson指住我

Christy：『舅母』

我，Wilson：『下？』

Wilson：『叫佢做姐姐，乜野舅母呀』





我：『邊個教你講架？』

通常都係人地教小朋友點樣稱呼長輩，無人教又點識講呢？

Christy：『老師』

Wilson：『下，佢教你叫依個姐姐做舅母？』

Christy：『唔係，老師話哥哥係同姐姐，媽咪係同爹哋，姨姨係同叔叔，咁舅父咪同舅母囉』

我：『嘩，乜依家K2就要學識人物關係架啦？』

Wilson：『至弊學唔識曬呢』

我：『嗱，Christy，因為我未結婚，又唔係你舅父老婆，所以你應該叫我做姐姐』

Christy：『咩係結婚？』

Wilson：『啫係要好似你爹哋媽咪咁，一齊先可以叫爹哋媽咪，咁要我同依個姐姐一齊，而且結埋婚，咁你先可以叫佢做舅母』

Christy：『你地依家坐埋一齊，咪結婚囉，老師話舅父係同舅母架』

Wilson：『總之你叫佢做姐姐』

Christy：『但係老師話唔可以講錯架，講錯係無禮貌』

Wilson：『乜你咁多野講既，總之舅父無講錯』

我：『haha，總之你叫我做姐姐就啱架啦』

Christy：『哦』

Wilson：『你要我拎住依個公仔，跟住點呀？』

Christy：『你要返工，你要離開依度』

Wilson：『咁我繼續睇戲』一面無奈咁講

Christy拎住個bearbear走過嚟：『媽咪媽咪，我好肚餓』

我先發覺原來佢係玩緊家庭遊戲

我拎住隻公仔：『好快有得食，你等等』

之後我攞咗個玩具蘋果遞比佢

Christy之後又拎住隻bearbear講：『點解爸爸咁耐都未返嚟嘅？』

我大聲講：『喂！爸爸喎！』

Wilson：『唉』

Wilson坐返低地下，好平調咁講：『返嚟啦』

Christy：『唔係呀，你要學Jason好開心咁講 我返嚟啦！ 』

Wilson：『邊L個Jason？』自言自語咁講

我：『喂！你講咩粗口呀！有小朋友喺度架』

Wilson：『sorry，口快快啫』

Christy：『舅母，我好肚餓』

Wilson：『都話姐姐！』Wilson叉住條腰講，好搞笑

Christy：『嘻嘻，舅母』

Wilson：『姐姐！』

跟住Christy拉住我隻手望住我：『我好肚餓』

我望望個鐘，已經10:50am，咁我比住餅乾佢食，之後去煮野比佢食。