毒撚都可以召喚老婆？幻想同步異世界: 第一章：我就係香港一隻死社畜

第一章：我就係香港一隻死社畜

我叫陳浩揚，今年三十二，住沙田。冇樓、冇車、冇拖拍，仲要住緊屋企，嗰種「放工返嚟阿媽仲幫你摺底褲」嘅廢青生活。

唔係咩高材生，香港top-up degree 畢業，做咗九年同一份工——一間大集團入面嘅 Senior Officer。聽落勁，其實就係打雜，樣樣做、樣樣唔關我事，樣樣都有人屙完屎就搵我抹。

九年，升職零次。人工萬九幾，一睇銀行 Apps 就火都嚟埋。

你以為我唔努力？我唔煙唔酒唔賭錢，份人唔衰，但就係咁啱唔啱人搵，啱啱夠做唔夠生存。



而家回望返人生，最穩陣就只係條腸——因為日日最準時，係返工屙屎。

你唔知啫，對於打工仔嚟講，屙屎唔使自己俾錢沖廁、唔使俾租、有冷氣有 wifi，仲可以拎住部電話玩陣 Game，scroll 吓 IG，或者純粹坐低發吓呆。個 moment，先至係屬於我自己。

有時我會諗，如果真係有異世界，唔洗做唔洗供樓，可以日日訓晏啲，有靚女陪，有金幣袋袋落，
咁人生，會唔會開心啲？

可惜，呢啲只係廁所入面嘅幻想。擦完pat pat，就要返出嚟繼續俾人擦。

最慘唔係件工辛苦，而係你開始發現——自己同身邊啲人，越嚟越講唔到嘢。



當年一齊入公司嗰班人，跳咗槽、有啲做晒 Manager、有啲移民、有啲直頭唔見咗。

而你就係個仲坐緊同一張爛 Office 椅、食緊同一間茶記外賣嘅毒撚中佬。

新入嚟嗰啲後生，男嘅叫我「浩哥」算客氣，女嘅基本上冇乜想理我——你問佢哋一聲「你食咗飯未」，都可能會當你有問題。
我唔敢講嘢，驚俾人覺得核突；但唔講嘢，又好似透明咁。

你知咩係代溝？代溝就係當你連 Slack 嘅 emoji code 都唔識打、佢哋講「GPT」你以為係股票，你就知道自己已經老咗。
放工返屋企，沙田站出閘，搭扶手電梯落街，個人已經俾人榨乾。



「返嚟啦，快啲洗手食飯啦，啲餸凍啦！」阿媽個聲未見人已經傳晒出廳。
我一入門，仲未行入房，已經聞到熟悉嘅飯香同埋……啲家居清潔劑加魚腥味。
日復日都係咁。

飯枱上面擺住三餸一湯：梅菜蒸肉餅、炒菜心、煎蛋，仲有碗湯唔知咩根咩草熬出嚟。
「你睇下人哋阿偉啱啱買樓，阿成個女都出世啦，你幾時帶個女返嚟？」
「食緊飯啦，唔好講咁多嘢。」

我都唔係嬲，只係攰到連解釋都唔想。呢啲對話已經重複咗幾年，每一日都重播。
食完，我閃入房。

房門一關，整個世界都靜咗。

我一坐低，就聞到熟悉嘅味道——毒撚味。嗰啲 figure 膠味、漫畫紙味、加埋成日唔開窗嗰陣悶濕氣味。


講真，難聞。但我聞慣咗。呢間房，雖然細，但係我唯一可以逃避現實嘅空間。
我攤喺床上，開住冷氣，拎住部電話開始滑 IG。

一個又一個 story：同學去旅行、結婚、生仔、出 Pool、買 Tesla。
而我，就係攤喺度，睇動漫、打機、FF，幻想有日可以擁有自己嘅「快樂人生」。

每年生日我都會許同一個願望：
想搵個又靚又正又大波嘅女朋友，識聽我講動漫，唔會嫌我打機，最好識煮飯同幫我按腳。

啱啱諗起，電話突然彈咗個 popup：

【✨限時測試：命運召喚環．專屬你的契印伴侶✨】
立即參加，只為「未被選中」的人而開放

我對住個畫面愣咗幾秒。畫面有個魔法陣圖，背景仲有個着得超暴露嘅女角。



「未被選中……你係咪講緊我…？」

我點咗入去，畫面黑咗一吓，冇反應。

冇理啦，電話啱啱冇電，我扯低眼罩，準備瞓覺。

臨瞓前，我喺心入面浮出一句：

「如果我聽日一覺醒，唔再係香港，而係去咗異世界…會唔會好啲呢？」