毒撚都可以召喚老婆？幻想同步異世界: 第十一章：挑戰

第十一章：挑戰
 
我望住手機畫面上閃爍住嘅提示——
 
我輕輕喺畫面點選「接受任務」，腦海彷彿有一層透明界面浮現，一切都開始變得正式。
 
【召喚任務已開啟：擊殺指定魔物以取得素材】
【剩餘時間：6日23小時】
 
今次，唔再係玩。


 
呢場獵殺，唔止將會決定我可唔可以召喚到下一個夥伴，更加重要嘅係我哋可唔可以反擊哥布林嘅追殺
 
榮子依舊喺屋入面靜養，雖然佢已經可以落床慢慢行動，但距離完全康復，仲有一段距離。魔力依然不足，身體仲有幾道細小傷口。佢自己都知道，如果硬要出戰，只會變成我嘅負擔。
 
「今次……唔好意思主人，依家嘅我相信只係會拖你後腿我相信你，不過你都要小心」
 
榮子望住我，眼神堅定。呢一句話，就好似一把無形之劍，插入我心入面。
 
我咬實牙根，轉身離開。


 
呢次，我要一個人挑戰野豬王。
 
＊＊＊
 
根據AI提供嘅地圖，野豬王活動嘅區域喺森林南端偏僻地帶，一個接近河谷嘅天然盆地。視野開揚但地形複雜，好啱放陷阱。
 
我用咗成個晏晝時間考察附近地形、記低路線、檢查風向，再喺適合位置埋下三個陷阱——
 
第一個係樹蔓網，會喺野豬衝擊時自動彈起包圍；


第二個係火屬性陷阱，用鍛造功能整合咗松脂同硝石，一中陷阱就會爆炸，令到野豬王成為燒豬王；
第三個就係落石陷阱，純物理殺傷，爆頭收場。
 
設完陷阱，我冇即刻出擊，而係再一次打開手機，用「鍛造」功能。
 
我望住手上舊嗰把手槍，只有五發子彈，上次喺哥布林嘅戰鬥五粒子彈已經打完，依家嘅我亦都冇咁多錢去買子彈，所以呢把手槍就同廢鐵一樣。我諗起榮子望住我嗰陣笑容——佢咁信我，我又點可以貿貿然咁送頭
 
我點開手機App，打開鍛造介面，打算完成我腦海浮現武器設計圖。
 
「我要一把可以用魔力觸發嘅遠距離火力武器……仲要夠火力。」
 
AI冇多講廢話，直接幫我整合咗一個藍圖：「命名：魔導手槍。」
 
用之前收集嘅金屬、魔石碎片，再加埋手槍零件進行升級融合。我坐喺貨櫃屋外嘅石頭上，腦海同App同步思考，十幾分鐘後，金屬合成、魔力灌注完成，一把漆黑、槍身刻有魔法陣花紋、彈膛能以魔力自動充能嘅新武器就咁誕生咗。
 


我雙手拎住佢，向着遠處嘅樹發射咗一發，棵樹即刻打錯咗一個洞，呢一刻心入面泛起一絲安心。
 
魔導手槍——我第一件真正屬於自己、親手打造出嚟嘅戰鬥主武器。
 
＊＊＊
 
翌日清晨，我再次喺異世界起身，陽光微微穿透森林霧氣，我背上箭袋、腰插匕首、手持魔導手槍，一個人潛行入盆地。
 
我深呼吸，蹲伏草叢，靜靜等佢出現。
 
地面開始震，沉重腳步聲由遠而近。
 
「嚟啦。」我自言自語，我知道我今次討伐嘅目標已經出現，手指已經搭住魔導手槍。
 
野豬王現身。


 
佢體型足足係普通野豬三倍，鼻上戴住骨制飾物，背部有明顯硬甲，紅色雙眼閃住野性光芒。佢鼻一拱，聞到我氣味，馬上發出咆哮聲。
 
「中陷阱啦肥豬……！」
 
第一陷阱發動！粗藤蔓一瞬彈起捆住佢後腳，佢狂吼亂掙，但我已經瞄準咗腋下位置——啪！
 
魔導手槍第一發魔力彈擊中野豬王側腹，爆出一陣黑色火花。野豬王受創激怒，更加發狂撲向我！
 
 
同我計算嘅一樣野豬王中咗我早前設置嘅第二陷阱——火屬性陷阱隨即爆炸，煙霧瀰漫，野豬王亂竄，我趁機滾入岩石後方，抽出一早收藏喺度嘅弓箭射擊，雖然命中，但對佢嚟講幾乎冇乜傷害。
 
「好堅硬嘅皮……」
 
我咬緊牙，迅速跑向第三陷阱位置。


 
野豬王跟住我衝埋嚟——

轟！
 
落石陷阱發動，幾十公斤重嘅石頭從上方掉落，雖然冇正中頭部，但打中咗佢右膊位置，加上之前嘅攻擊所帶嚟嘅傷害,野豬王痛叫一聲跪咗落地。頓時喪失咗活動能力。
 
我立即衝前，用魔導手槍連開三發，集中攻擊佢已經破損嘅右側傷口，傷口擴大鮮血飛濺。
 
野豬王怒吼最後一聲，爆起全身魔力，衝咗埋嚟！
 
「吓——！」
 
我嚇到腳軟，避得慢，右膊被佢側撞中，成個人飛咗出去，痛得五臟六腑都移位。
 


好彩之前打造嘅防具有效冇造成致命傷,好痛，真係好痛。
 
呢一刻，呢個痛楚令我深深感明白到真係唔係發夢，我第一次咁真實感受到——呢個世界係可以死㗎。
 
我望住對方搖搖欲墜但仍然向我埋嚟，腦海空白，只係剩下一句聲音：
 
「如果我死咗，榮子會點……」
 
我怒吼一聲，撐起身體，攞起我手上面嘅輔咗風魔法嘅匕首入掉向野豬王張開嘅嘴——
 
「去死啦！！」
 
啪！！
 
匕首嘅風匕高速嘅震動，貫穿野豬王嘅頭
 
野豬王巨體轟然倒地，地面震動。
 
我全身癱瘓，跪喺地上氣喘吁吁，成個人好似就快散晒。
 
AI呢時候出聲：「擊殺確認。目標『野豬王』已討伐。」
 
下一秒，手機畫面彈出新提示：
 
等級提升上 20 Level
【獲得新技能：暴食】
效果：可透過吞食被討伐生物之血肉，獲得其能力。
 
我愣咗愣：「痴線……仲要食佢？」
 
AI冷冷提醒：「暴食技能可能與你既有技能產生排斥，存在不可預測副作用。請慎用。」
 
我苦笑一聲：「依家唔係慎唔慎用嘅問題，而係……我唔太好野味，重要佢個頭俾我打到血肉矇糊喎」
 
我搖搖晃晃咁起身，拖住半傷嘅身體，走近野豬王屍體。確認佢完全冇晒氣息之後，我慢慢蹲低，伸手喺佢胸膛附近翻查。
突然，指尖觸到一樣冰涼又光滑嘅物體。

我捧起佢——一枚晶瑩剔透，散發微光嘅結晶，手機即時彈出提示：

【原石（召喚用素材）】

用途：可作為召喚儀式之媒介。

「終於……搵到你喇。」

我望住呢粒原石，心裡泛起一陣奇妙嘅預感。呢粒嘢，會為我帶嚟下一個改變命運嘅人。

我收好原石，再望一眼倒下嘅野豬王屍體，然後慢慢從腰間抽出嗰把匕首

我拎住匕首，喺野豬王身體上劃出一道切口，取出一塊肉，雖然有啲猶豫，但最終我咬咗落去。

下一刻，腦入面電光火石閃過無數資訊，一陣頭暈目眩……

【暴食技能，正式發動】
 
（第十一章 完）