搭錯線：錯誤的時間遇上你: 第一章：碰撞（上）

我叫盧正希，芳齡十六歲，現時中四學生，希望可以早日出pool，畢竟著住校服拍拖就係一種青春，理想型係一個單身暖男靚仔。我要求唔高，180身高，風趣幽默，笑起嚟好睇就得。


我心入面不停讀住呢段說話，陣間要同黃大仙講。


「Hailey，一陣我約左男朋友同埋另一個中同Charlie ，我地係黃大仙B出口等埋佢地先入廟。」


「好好好。」我敷衍咁應我家姐。






死啦，我啱啱講到邊，對象要細心，對我要好，家庭唔重要。


「屌，你唔好成個神婆咁念念有詞，好煩……」


家姐翻我白眼，我無視佢，繼續細聲讀。






「BB你到左啦！」一把甜美既少女聲音叫緊佢男朋友。


喂，頭先呢個家姐先屌佢細妹，粗魯再轉溫柔只係一線之差，好噁心！


哎死啦，讀到邊。






「喂，叫人啦！」我家姐拍拍我膊頭。


我抬頭一望，前面男人高我一個頭，gel左中分髮型，對眼尖而長，戴住黑色方框眼鏡，著住黃色Hoodle。


「我係你家姐Hazel個中學同學，我叫查利揚，你叫我Charlie。」


「我係盧正希，Hailey，我有聽家姐講過你，你地係中學朋友。」


當我想行去家姐旁邊，今日係初二，好多人好逼，根本攝唔到。






我睥住家姐同男朋友。


三人行，必有個邊緣人。


有隻手拉一拉我，原來係Charlie。


係四人行先啱。


「小心，人多。跟實我啦！」






於是我同Charlie開始傾偈。


「你今日嚟黃大仙求咩？」


「求財運。我希望中六合彩頭獎，以後唔洗返工。」佢笑笑口咁講。


「六合彩中既機率係一千萬分之一，你之後都係準時返工。」我冷笑咁應。


「咁小妹妹你嚟求咩呀？」






「求姻緣。」


「中學生不應談戀愛。請問你幾歲？」


「小妹16歲，9月都升中五啦。仲有我呢個年紀，大把同齡人都拍緊拖。」


呢個男人咩事，思想咁傳統而老套。


「你9月都升中五，先唔講其他人係咪拍拖，你淨係一年半時間，係咪應該學業為重，之後再拍拖都唔遲？」






如果佢唔係家姐個朋友，真係好撚想講粗口屌柒佢個老屎忽。


「只要我兼顧到學業同愛情就冇問題。」我笑住咁答佢。


「請問你選修讀兩科定三科？」


「兩科。地理同中史。」


「係中史呀。咁我考下你，中四應該學到清唐朝，安史之亂，你覺得係邊個要負上最大責任，點解呢？」


咩事，做咩考我中史。


雖然我覺得好疑惑，同時好唔想應佢，基於禮貌，以及咁簡單既問題，我當然回答。


「唐玄宗，佢重用佞臣楊國忠同安祿山。」


「秦朝採用咩制度瓦解諸侯勢力？」


「推恩令，分封土地比諸侯啲仔，不斷分薄土地，最後土地歸國有」


「秦朝統一左貨幣同度量衡，請問個名係?」


「我點答你，邊有人記埋呢啲名，呢啲不嬲考試前先背。」


呢個人係咪玩野？一般人個腦都唔會記得呢啲細節位。等如你問我，香港港島線有幾多個站，我都唔會答到你。


「我問既全部公開試都有考過，你都係專注學業啦！」


「上面2題我都答啱，得1題答錯。」


「小妹妹，你第二題已經答錯。推恩令係漢朝，秦朝係郡縣制。」


「Charlie 哥哥，我要澄清返，我係中史係全級第一。」我深呼吸，面帶微笑回應。


「哇，你地第一次見面就咁好傾。兩個都唔認輸咁喎。不過Hailey，查理係中史老師，佢都係職業病發作，同埋幫你溫下書都好。」


我家姐明顯聞到火藥味，出嚟做和事佬。


等等先，咩叫做我地兩個都唔認輸，明明就係佢先撩者賤！


我同佢，一啲都唔似！