搭錯線：錯誤的時間遇上你: 第九章：珍寶珠男孩

時間轉逝，眨眼間就到12月，迎嚟第一次期末考試。
 
呢段時間，我有唔識就whatsapp問查利揚，其餘時間都自己操pp，當然我都有溫埋其他科目，唔只溫中史。
 
.
「嘟嘟嘟，考試完畢，請同學立刻停筆，依家老師會過嚟收卷，請保持安靜，直到考試結束。」
 
呼，我放下心頭大石，今次中史好多都識，點都唔會再啱啱好合格。
 
「考試結束，同學依家可以離開試場。」




 
「喂，Hailey今次你識唔識做？」我地行出去禮堂之後，Katy問我。
 
「今次識做呀？你識唔識？」我問返Katy 。
 
「今次唔太識，等我食返粒糖定下驚先。」講完呢句，Katy係書包拎左粒珍寶珠出嚟，撕開包裝紙。
 
「叮啷！」我見到katy粒珍寶珠跌左落地下。
 
珍寶珠碎左。




 
「喂！你！」Katy望住整跌佢珍寶珠，著住冷衫既男生講。
 
男生轉過身，目測有180以上，黝黑皮膚，典型運動陽光男生。
 
我準備為呢位男生默哀1分鐘。
 
點解我會咁講呢？
 
事關katy係一個超級食貨。




 
我記得中一個陣，有個男仔叫james，佢問
 
katy最新款既朱古力薯片好唔好食。
 
然後katy話：「幾好食。」
 
katy冇話比james食，啱啱好James就拎左最後一塊薯片。
 
「屌你老母，我有話過比你條蛋散食咩？」Katy鬧james。
 
「食你幾塊薯片，洗唔洗問候我家母？」james鬧返Katy。
 
「我唔理，你食左就食左，搞到我冇得食，你聽日買返一袋朱古力薯片比我呀！」katy繼續狙擊james。
 




James起初冇理katy，直到katy煩左佢一個星期之後，james就買返一模一樣既朱古力薯片比katy。
 
自此之後，冇人敢再惹katy，對佢（同零食）都好恭敬。
 
「唔好意思呀，係咪士多啤梨味珍寶珠，我賠返比你呀？」陽光男生有啲驚慌咁講。
 
佢見katy冇反應，於是好慌張係銀包比左20蚊塞左落katy手心，講：「sorry，我趕住考試先撞到你，就嚟遲到，呢度20蚊，應該夠你買幾粒珍寶珠嚟食。」
 
然後陽光男生跑樓梯走左。
 
Katy仍然呆左，企左係原地。
 
我用手向katy眼前撥左兩下，katy終於回神。
 
「喂，katy你搞咩呀！」我疑惑咁問。




 
「Hailey，我心臟怦怦咁跳。」
 
「下？」
 
「啱啱我遇到理想型。Hailey，呢啲係咪叫一見鍾情？」
 
「一見鍾情？鍾海淇小姐，佢整跌你既珍寶珠喎！」
 
「佢好charm....呢20蚊我唔捨得用，入面仲有佢既溫度。」katy甜笑咁講。
 
「依家你握個20蚊咁實，呢20蚊梗係暖啦....」我扶扶額頭講。
 
「Hailey，你知唔知佢係咩年級，我好肯定佢唔係我地個級。」
 




「我地依家中五，中六好少返學，就嚟考dse，我推測佢應該係中四或者中三？」
 
「年齡唔係問題，陽光型男就係我既理想型！Hailey，你會同我一齊搵佢出嚟㗎可？」Katy貶貶眼，誠懇望住我講。
 
「好好好，我地之後一齊搵。」我受唔住katy炙熱既眼神。