搭錯線：錯誤的時間遇上你: 第十章：記缺點，留堂？

我同katy分開行，各自返屋企。
 
我未見過katy失晒魂既樣，唔通呢個就係沉船？
 
Anyway，今日識做中史卷好開心，頭先因為katy講野，未能即時whatsapp查理揚，依家搵佢報喜先！
 
「查sir，今日份卷我識做。」
 
「識做咪好，代表你有溫熟書。其他科考成點？」
 




「其他科都識，不過就係冇中史科咁得心應手。希望今次中史科會有好成績！」
 
「聽你咁講，睇嚟我可以期待科長份卷！」
 
「咁你拭目以待，今次我一定有頭三名，絕對唔會好似mid term啱啱好合格！」我自信咁笑住覆查理揚。
 
「👍👍」
 
搞錯呀，淨係應emoji咁hea，我撅撅嘴咁講。
 




後來我發現，從來只有我已讀查利揚。
 
現今社會，好多人都唔鍾意被人已讀，包括我在內。
 
2018年，當時social media仲未有like功能，包括whatsapp同ig，你唔會知道對方幾時睇左message。你可能以為對方會覆你，點知佢已讀左你，睇完個種既無聲無息，就會產生期待落差。
 
而查利揚唔同，就算我send sticker做對話結尾，佢都會send返sticker or emoji比我，令我覺得好安心。
.
「今次中史第一名係盧正希。」查理揚派卷比我個陣，我見到佢嘴角微微向上揚。
 




睇嚟佢對於我係第一名幾開心喎。見到呢個畫面，我都會心微笑。
 
「多謝查sir，我會繼續努力。」我接過佢份卷咁講。
 
我見到卷上分數，85分！仲高分過我上年比Miss Chan教既分數，個陣先係70幾分。
 
「Hailey，恭喜你重返第一名。我又被你打敗啦！」Katy行過嚟同我講。
 
「Katy 你bio同chem唔係都中上成績咩？你精英班，科科都好，我淨係得中史好過你。」我笑住講。
 
「你中史差唔多次次都第一，唔係好多人都做到㗎！」katy伸手，示意我貼向佢耳邊。
 
「我頭先見到珍寶珠男仔拎住籃球，行入三樓樓層！佢應該係Form 3。」
 
「咁你諗住點做？」




 
「午息通常籃球社班男仔會打波，我地今日不如留係學校食？」
 
我點點頭。
 
Katy平時嫌學校飯難食，高中可以出街食飯，佢冇一次係留校食飯。
 
對於佢咁挑嘴既食貨，留校食飯簡直令我驚訝。
.
「你食完飯未呀？」Katy 狼吞虎嚥用10分鐘就食晒飯。
 
「Katy，我地12點半放飯，依家先12:40分，唔洗咁急啦。」
 
「我有啲心急呀嘛，平時都有其他女仔會睇籃球隊打波，我地當然要早啲去霸位，如果唔係我驚冇位。」
 




「我差幾啖先食完，定係你去左揾位先？我陣間過嚟揾你，小心啲用手機唔好比老師捉到。」我小心提醒Katy，畢竟我地學校比帶手機，但係就唔準學校用，除左老師允許下，一般係唔比開手機。如果比老師發現，係要記1個缺點，然後留堂。
 
「好，我陣間打比你，你記得較震機！」Katy急步咁行走左。
 
愛情既魔力真係咁大，可以令一個人心急，更加可以犧牲本身鍾意既事？
 
我一邊食住飯，一邊係到沉思。
 
「Hi，Hailey.」
 
我抬頭一望，係查利揚。
 
「查Sir你過嚟小賣部買飯食？」我問。
 
「係呀，啱啱先做完野，今日算早。」




 
「嗡—嗡—嗡—」我手機震緊。
 
Katy呢個時候先打電話比我，點算好。
 
以我平時做法會跑去廁所聽，但依家同緊查利揚講野，點行得開。
 
仆街，我聽到訓導老師把聲，佢同緊校隊既人講緊野，準備經小賣部上樓梯。
 
「嗡—嗡—嗡—」Katy你唔好再打過嚟！我心中吶喊。
 
訓導老師距離我越嚟越近，我既心都跳得越嚟越快。
 
隔離仲有查利揚呢位老師係到。
 




到底我會比邊位老師罰留堂？