搭錯線：錯誤的時間遇上你: 第十四章：坦承

考完試，對完卷，好快就係Christmas Party。
 
「嗡嗡嗡…」枱上手機傳出震動聲音。
 
來電顯示係katy。
 
「喂～Hailey。聽日係Christmas Party，你諗好著咩衫未？」
 
「未呀…你諗好未呀？」
 




「咁就啱啦，今日係星期日，你依家都得閒，不如你上嚟我屋企，咁啱我屋企阿媽去左同fd打牌。」
 
「依家科技咁先進，我地wts send圖比大家睇就可以啦，況且你又知我得閒？」我已經攤係張床，同緊katy講野。
 
「我仲知你依家攤係到同我講野添。還掂你都得閒，過嚟我屋企玩啦，有好多新買零食都未開，有你平時最鍾意食既明治芒果朱古力，重要聽日我都想靚啲咁見kyle….」
 
聽到Katy笑嘻嘻咁講，突然我都醒起，平時我同查利揚都係學校見面，我自然都係著校服，成個小妹妹咁。
 
我即刻係張床彈左起身，講：「我依家就出門，你等我半個鐘！」
 




「仲成日話我為食，你一聽到明治朱古力又唔係即刻彈起身…」
 
「陣間再call你，換衫先，拜拜！」
 
咁難得有著便服機會，我點都要睇落成熟啲，要呈現成熟既一面比查利揚見到。
.
「叮噹叮噹」我已經嚟到katy屋企。
 
「半個鐘又真係到喎！」katy一邊開門比我，一邊望住牆上既鐘講。
 




「梗係啦！」我已經行去雪櫃拎緊野飲，然後行入katy間房。
 
Katy間房係典型女生房間，粉紅色牆紙，書枱係白色大衣櫃旁邊，房間角落有軟綿綿既大床。
 
我飛快咁跳到katy張床。
 
「平時床唔放野，你攤幾耐都冇問題，但今日我要放衫，所以請你落床啦。」katy作出一個請既手勢。
 
我只好落床，然後睇住katy打開佢既大衣櫃，傳來一道白色既光
 
正確嚟講唔係白色既光，而係一堆衫跌晒出嚟。
 
「你呢度係衫海。我上嚟你屋企順便幫手執衫？」我翻白眼咁講。
 
Katy奸笑，然後講：「所以我地依家玩尋寶遊戲，執好既衫放床，順便揀埋衫。」




 
蝴蝶結衫、oversized hoodle、毛衣……琳琅滿目既衣服，基本上咩類型同顏色既衫都有。
 
「Hailey Hailey 你覺得著呢件粉紅色衫，加黑色蝴蝶結，下身再加白色百摺裙，定係呢件白色貓咪oversized hoodle，再加灰色百摺裙做底？然後再著呢對黑色閃心心扣厚底皮鞋。」
 
「我覺得粉紅色蝴蝶結睇落啱你膚色多啲，睇落再白啲，同埋可愛啲。」我望一望上身衫講。
 
「好呀，聽你講，粉紅色最襯我 。咁Hailey你有冇邊件睇啱？」
 
Katy係好多衫，靚係好靚，但同我夾既衫又好似唔多？
 
好多件衫都係要扣大蝴蝶結，oversized 衫我又唔算又好啱。
 
「Hailey，我話晒都係形象指導，等我幫你搵下先！」katy係衫海中搵到一件黑色針織上衣，然後一條深紅色格仔長裙。
 




「上身好似好悶，加返個蝴蝶結先！」katy即刻係蝴蝶結堆搵。
 
「又加蝴蝶結？會唔會睇落好學生feel，我地校服本身已經有蝴蝶結。」
 
「我地本身就係學校，就係要著得青春啲，定係你想夾髮夾？」
 
「我想成熟啲…我見啲大人都唔會成日用呢啲夾。」
 
Katy搵搵下衫，停低左，講：「Hailey點解你咁想變得成熟？」
 
「成熟啲唔好咩？我想快啲大個，成為查sir咁可靠既大人。」我低頭，執住衫講。
 
「Hailey，唔通你…」katy行前，直盯我既雙眼。
 
「咩啫….咁….佢幫左我好多….同埋….同埋我震機個陣，佢都冇記我缺點……最近上中史堂，佢反而記左cammy同joyce缺點，可能有係有啲唔同呢……」唔知點解我聲音不穩，仲越講越細聲，手上執衫既動作都停左。




 
Katy瞪大雙眼，嘴巴大到可以塞一個掌頭入去。
 
隔左一陣，katy就講，「Hailey，你原來同我一樣，都有鍾意既人！雖然查sir係老師難搞啲，不過唔緊要，我會盡力幫你襯衫，吸引查sir！」
 
「點解你唔講我咁樣諗唔啱，查sir始終都係阿sir…」我垂下眼睛講。
 
Katy微微一笑講：「愛情邊有分對與錯，你地只係錯誤既時間遇上，我係你既best fd，點都會企你個邊，況且如果有查sir咁好既老師，我都會心動啦。」
 
「Katy！！！」我攬實左katy，眼角泛著淚珠。
 
我估唔到有人會無條件企我個邊，理解我，支持我。
 
「盧正希你唔好咁肉麻！我搵到啦，你聽日就著呢件衫，包查sir都望多你眼！」katy將呢件衫放落我既雙手。
 




我望一望眼前既衫，用力咁點點頭。