搭錯線：錯誤的時間遇上你: 第十三章：憤怒
「Good morning class.」
「Good morning Mr. Cha. 」
「上堂我地講到國民政府時期，史稱「南京十年」…….」
查利揚係黑板上寫緊重點既時候，望住筆直既背影，我用原子筆輕輕畫過佢背影輪廓。
「嗒嗒」我㩒一㩒筆蓋，然後飛快咁轉動筆桿。
我埋頭咁抄筆記，但根本專心唔到。
我再望住查利揚，佢同大家講解緊國民政府，我唔應該再發夢。
盧正希，專心聽書啦！
「Cammy同Joyce，你地交你地部手機出嚟。」
查利揚一叫同學名，我清醒晒。
等等先，交手機？
「查Sir，我之後唔再用手機，你可唔可以唔好收機？」Cammy 向查利揚求情。
「查Sir，我地再記缺點，就有小過。」Joyce講。
「Joyce同Cammy，你地兩個上我堂，堂堂用手機，我都隻眼開隻眼閉，只不過你地考試成績有進步空間，你地應該專心上堂，暫時收機同記缺點，我覺得會係最好選擇，你地午息再嚟揾我。」
-
「叮噹叮噹叮噹叮噹」
「各位同學再見。」
「Goodbye and thank you Mr. Cha. 」
隨住查利揚離開課室，Cammy 同 Joyce 即刻講查利揚壞話。
「哇，屌佢老母，佢都無視我地咁耐，今日收乜撚機。」Cammy翻住白眼講。
「咪就係，又唔諗下自己教書悶，我地先係到用手機打發時間。Miss Chan教，我都冇咁低分，Miss Chan點解要走呀？」Joyce雙手交疊在胸前講。
「Miss Chan係到個陣，起碼會同我地講書本重點，然後叫highlight 重點，係考試範圍，同埋佢開住PPT真係教緊書。我真係唔知查利揚教咩，每堂寫野係黑板，跟住自己亂噏嘢。佢有冇留意班房有幾多人到底聽佢講書。」Cammy 一臉嗤之以鼻。
平時執完notes同筆袋，我同Katy就會離開中史班房，聽到Cammy呢番說話，我不自覺行左上前，行去Cammy同Joyce既方向。
「喂，你做咩…」katy 拉住我既手，細聲咁講。
「你唔好攔我，佢地實在太過分。」我微微抽返隻手，行到Cammy同Joyce 面前。
「Cammy，Joyce，查Sir真係堂堂教緊書，如果你有認真睇過佢勁厚既筆記，就知入面絕對有Cover 學生最緊張既考試重點。」
「盧正希，你中史全級第一，梗係講得口響。」Cammy冷笑咁講。
「我只係議事論事，同我係全級第一無關。查Sir 唔用教科書，係因為教科書出版年份有時未必Cover到我地依家要考既內容，以及出題方向。同埋我要向你9糾正返，查Sir 唔係亂噏嘢，佢透過講書，引導我地思考，對於寫議論文，係訓練緊思維，同時抄重點可以令理解內容更透徹，考試都記少左好多野。」
「盧正希，你做咩幫老師講野，科長唔同啲？」Joyce睥住我講。
「因為我要講事實，人地聽到你地咁講，真係誤會查Sir唔識教書。仲有你地比Miss Chan教個陣，成績都係墊底，邊個教有分別咩？你地只係不滿查Sir收你地手機，唔係咩？」
「你！」Joyce 手指指住我。
我無所畏懼，就係望實佢地兩個。
「Joyce，咪同盧正希嘈，我地仲要去隔離班揾男朋友借手機，小息時間淨返5分鐘。」Cammy 指鐘講。
Joyce同Cammy 黑晒面，離開班房。
「Hailey你做咩咁激動？你平時都唔會同人嘈架，況且老師不嬲係學生議論既對象。」Katy 一臉唔理解。
「咁我真心講得佢地講錯晒，將事實癲倒晒嚟講。仲有老師都係人，有邊個人會鍾意比人講壞話？你同我都唔會想自己成為是非對象啦！」我少少不滿咁講。
「你都講得啱既。」Katy 若有所思講。
我見到老師枱，有藍色保温杯，係查利揚漏低左。
「Katy你返班房先，我仲有今日收到既功課要交比查Sir，順便攞返老師枱隻杯比佢。」我急忙咁拎杯。
「喂！小息就完！」Katy大喊。
我跑落去教員室，㩒鐘叫查利揚出嚟，但叫左3次佢都冇出嚟。反而係我既班主任Miss Tsang出左嚟。
「Hailey 你揾查Sir？佢依家唔係位，我坐佢隔離位，不如我幫你放啲野落佢張枱？」
「好呀，咁麻煩Miss Tsang啦！」我將手上啲野交比Miss Tsang。
「Hailey 你真係有心，連查Sir 個保温杯都係到。」Miss Tsang笑住咁講。
「我見查Sir漏左係枱，咁啱我係科長，今日收到功課，咪順便拎埋比佢。」
「叮噹叮噹叮噹叮噹」
「你真係稱職既科長，小息完啦，快啲返上班房！」
我點點頭，迎面而嚟係查利揚。
查利揚微微一愣。
四目交投一剎那，我閃開左，然後跑返樓梯上班房。
「怦怦怦….」
我一定係跑樓梯，做緊劇烈運動，所以我個心先跳得咁快，絕對唔係因為查利揚。