搭錯線：錯誤的時間遇上你: 第十七章：搭錯線（下）——今日係我地拍拖既第一日
我見到查利揚提問緊，唔知佢問緊邊題。
我見到答案紙其中一個答案係「今日係我地拍拖第一日」，於是我就大嗌：「今日係我地拍拖第一日！」
唔知點解，我見到男司儀係咁笑，我再望向台下，啲人笑到前俯後仰，到底發生咩事？
屌，我唔撚知，繼續答啦！
無論查利揚講咩，我都只係見到佢個嘴型。
我決定，亂答！
「下跪！」
「I’m fine thank you and you?」
「我錯啦！」
「噴殺蟲水！」
「對唔住，我地已經盡左力。」
「救命呀！」
我見到女司儀舉手，示意角色調轉。
依家我係提問者，而我同查利揚交換左紙，我睇到問題。
我順住次序問都得，反正查利揚都聽唔到。
「見到小強會點做？」
「手術失敗，醫生會講？」
「被人綁架你會嗌？」
我一直問，直到見到呢句，我個心突然停左下。
「有人同你表白，你會應？」
佢點會同我表白….
我讀完呢句之後，我見到司儀個樣好驚訝，再望落台，啲人個表情都係同司儀一樣。
我再望查利揚，又係呢個普通不過既微笑。
唔緊要，陣間完左自然知發生咩事，因為根據過往係台下睇既經驗，完左個熒幕就會show返頭先提問者同回答者既搭錯線，網上之後亦都有live重溫。
依家既我，只可以繼續問落去。
「清代求見皇帝，大臣會？」
「比阿媽發現0分測驗卷，你會？」
「當外國人同你say hi，你會？」
女司儀再度舉手，我同查利揚都除低耳筒。
本身想同查利揚多啲接觸，但搭錯線呢個遊戲，好似雞同鴨講，根本冇可能有多啲互動。
「好啦，依家公布兩輪搭錯線結果，依家我地首先講第一輪，即係查利揚老師係提問者，而盧正希同學係回答者，結果如下：」
- 見到小強會點做？
答案： 今日係我地拍拖第一日 - 手術失敗，醫生會講？
答案： 下跪 - 被人綁架你會嗌？
答案： I'm fine thank you and you? - 有人同你表白，你會應？
答案： 我錯啦 - 清代求見皇帝，大臣會？
答案： 噴殺蟲水 - 比阿媽發現0分測驗卷，你會？
答案： 對唔住，我地已經盡左力 - 當外國人同你say hi，你會？
答案： 救命呀！
第一題，我答左啲咩？
我瞪大雙眼再望多次，確認自己冇睇錯。
見到小強會點做？
答案： 今日係我地拍拖第一日
？？？？？？？？？？？？？？
怪唔知我個陣第一條答完，司儀都係到笑。
我臉如死灰，好想快啲落台。
「第一輪搭錯線，好可惜盧正希同學係獲得0分。依家我地睇埋第二輪搭錯線結果。」
- 見到小強會點做？
- 我錯啦
- 手術失敗，醫生會講？
- I’m fine thank you and you?
- 被人綁架你會嗌？
- 下跪
- 有人同你表白，你會應？
- 今日係我地拍拖第一日
- 清代求見皇帝，大臣會？
- 救命！
- 比阿媽發現0分測驗卷，你會？
- 噴殺蟲水
- 當外國人同你say hi，你會？
- 對唔住，我地已經盡左力
「查sir第4條啱左，獲得1分。」司儀講。
我對眼停留左係第四條題目，冇郁過。
有人同你表白，你會應？
答案： 今日係我地拍拖第一日
當時查利揚真係咁答？
我望望查利揚，佢保持微笑咁睇住題目。
隔左幾秒，查利揚側過頭望向我，嘴角勾起一個禮貌既微笑，但下一秒佢又望向返題目。
又係呢個教科書公式笑容，好似係我得望得佢太耐，而禮貌回應。
好多時候，我見佢對其他學生，都係呢個笑容。
我好想知，呢一刻，查利揚係諗緊咩？