搭錯線：錯誤的時間遇上你: 第十八章：合照（上）

「我地好多謝第一組參與，為我地帶嚟咁多既歡樂。公布完第一組既答案，接下落嚟由第二組出嚟！」男司儀講既同時，女司儀手勢示意我同查利揚返入去後台。
 
我跟隨查利揚既步伐，行入後台。
 
我好想知，7題咁多題入面，點解你偏偏答啱呢題。
 
「頭先我估唔到搭錯線對手會係你。」查利揚微笑講。
 
「我都係臨時比人捉過嚟，我都唔知原來對手係你。」我勉強拉動嘴角講。
 




為左同你有多啲互動，我只係可以上台，咁先可以多啲機會一對一見面。
 
如果我唔咁樣做，我諗你淨係望咁多個學生入面，我只會係其中一個。
 
我想短短10分鐘，你淨係會專注望我一個。
 
「雖然我地事前都唔知對方身份，但上台都玩得好開心。今日Christmas party，同朋友玩得開心啲！」
 
查利揚準備轉身離去。
 




我急步走前，擋住左查利揚既離開。
 
我地正面相視，我直盯佢對眼講：
 
「查sir，今日搭錯線真係玩得好開心。頭先聽左咁耐嘈歌，對耳都有啲攰，你點解都可以答啱一題？」
 
「因為我咁啱就係搭啱線，我都覺得好神奇。」查利揚輕輕一笑咁講。
 
「哇，聽完你咁講，我都覺得好神奇。」我努力控制嘴角向上揚。
 




「下次有機會再玩，咁我行先。」查利揚揮手，剩低我一個人留係原地。
 
原來，一切只係我諗得太多。
 
佢答啱呢題根本就冇特別意思。
 
「Hailey，你依家可以返去觀眾席。」irene拍拍我膊頭講。
 
「好呀，唔該你。」我緩緩咁離開後台。
 
我一返到觀眾席，坐低下一秒，katy即刻向我耳邊細聲咁講：「你今日好好彩，我係留下聽到佢個句表白，真係好心動。」
 
「佢話只係咁啱答中，我都係唔好諗咁多。」我低頭講。
 
「佢真係咁答你咩？」




 
「唔好自己諗太多，就照字面意思。」
 
「係咩，但係我覺得….」
 
「哈哈哈哈哈哈」周邊同學既笑聲覆蓋左我地既對話。
 
「我地睇搭錯線先，好似好好笑咁。」我同katy講。