搭錯線：錯誤的時間遇上你: 第十九章：合照（下）

我轉身一望，係查利揚。
 
「查sir你識唔識用我部相機，洗唔洗我同你講點用？」
 
「係咪㩒快門制就得？」
 
「係呀，麻煩你幫我同felix影2張相，唔該查sir。」
 
「咁你地準備，321！」
 




我同felix都比左v字手勢。
 
「下一張準備，321！」
 
我都諗唔切轉咩pose，所以keep住左v字手勢。
 
我望向旁邊既felix，佢都同我一樣，都係v字手勢。
 
我伸手後，查利揚將相機放左係我手心，以及兩張即影即有相。
 




「查sir，我地不如都影返2張相？」我鼓起勇氣問佢。
 
查利揚點點頭，然後將相機交比felix。
 
我同查利揚中間既距離，好似有一堵牆係我地中間。
 
「預備，3、2、1。」
 
延續上一張風格，我繼續比v字手勢。
 




望向旁邊既查利揚，佢只係企係到，咩pose都冇擺。
 
「預備，3、2、1。」
 
我比左臉頰心心手勢。今次我冇望過去，唔知佢有冇擺pose。
 
「查sir, Hailey我幫你地影好左。呢度有兩張相，我左手呢張係第一張，右手係第二張。你地睇下揀邊張？」
 
「Hailey你揀先。」查利揚作出lady first既手勢。
 
「咁我要第二張。」我感覺第二張應該影得我好睇啲。
 
「咁剩低第一張相比我。」查利揚從felix手中接過相。
 
畢竟即影即有相機，會隔一段時間先知影成點，所以我同查利揚好似抽盲盒咁揀相。




 
「同學，你係咪3C班？」查利揚問felix。
 
「係呀。」felix一臉疑惑咁望住查利揚。
 
「你地班中史作業啱啱改好，放左係樓下簿櫃，麻煩幫我拎上嚟，再派比同學。」
 
「好呀阿sir，我依家落去攞！」felix好似一隻狗，飛快咁跑左落去。
 
呢個時間又剩返我同查利揚。
 
一諗起頭先後台事件，我就覺得有啲尷尬。
 
「睇嚟你係呢間學校都識好多人喎！」查利揚微笑咁講。
 




「我同felix都係意外識到，當然都係朋友。你點解會經過呢層？」
 
「我就係想搵3C班同3D班既學生，同佢地講作業改好左，依家我要搵埋3D班…」
 
「查sir, Merry Christmas!」隔離有兩個低form妹妹，比左聖誕卡比查利揚。
 
「多謝！Merry Christmas！」查利揚微笑咁回應。
 
係喎，我都有聖誕卡比查利揚。
 
趁呢個時候，我係外套口袋到搵到封聖誕卡。
 
「查sir，呢封係我既聖誕卡，Merry Christmas！」
 
「多謝Hailey，Merry Christmas !」




 
「查sir你係咪要搵3D班學生？不如我幫你直接落簿櫃拎上嚟3D班房？」
 
「唔洗啦，我去搵人就得，況且啲簿好重，我搵男同學幫手就得。」
 
每一次，我目送查利揚既背影離開。