搭錯線：錯誤的時間遇上你: 第二十三章：冷暖（上）

「唔該我要個雪菜肉絲米，凍檸茶少甜少冰，」Felix 同落單姐姐講。
 
「同埋一個煉奶西多士，西多多煉奶，凍奶茶。阿仔，識到女朋友喎！」姐姐笑住講。
 
「佢唔係我女朋友。」Felix雙耳紅通通，抓抓頭講。
 
「你平時趕唔切返學就會嚟茶記食早餐？」我疑惑咁問。
 
「你又知既？呢間煉奶西多好好食㗎，我次次嚟呢度都叫。」Felix笑住咁講。
 




「其實你住邊？點解你睇落成日都遲？」
 
Felix唔會住大西北、離島掛？
 
「我住樂富。」
 
「我住黃大仙，你都係差我一個站咋喎！」
 
「我每日較完鬧鐘，諗住瞓多陣，熄左個鬧鐘，結果一起身，剩返半個鐘。況且我返到去都係瞓，瞓醒就去食飯，食完就打波，跟住瞓到放學鐘響。」
 




姐姐拎左雪菜肉絲同西多士過嚟。
 
「老師唔會叫醒你咩？」
 
「起初佢地都有叫，後來都放棄…佢地都知我成績差。」Felix搽住西多士講。
 
「你個份西多士咁多煉奶？你唔怕甜咩？」
 
「食甜野令人開心，朝早一食甜野，就可以成日都開心。嫲嫲教我『民以食為天』，最重要當然係食飽，所以依我更加要盡情咁食！」felix將一大啖西多士塞入口，津津有味食緊。
 




「睇嚟你同你嫲嫲關係幾好。」我食住雪菜肉絲米講。
 
「係呀，我同嫲嫲相依為命，我細個個陣，父母已經唔係到。嫲嫲一直好辛苦咁養大我，我大個做到運動員，一定要買大屋比佢！」
 
「你真係錫你嫲嫲，你一定可以做到出色既運動員！」
 
「Hailey你夢想係咩？」
 
「唔知呢？我都冇諗過。」
 
「Hailey，到時最多我成名，你嚟做我經理人。」
 
「好呀，未來老細。」我忍唔住笑左出嚟。
 
望住眼前睇落稚氣既Felix，好開心食住西多士，好難想像佢係一個破碎家庭長大。




-
我同Felix一返到學校，已經9點半。
 
我地一入校門，就見到訓導主任係校務處。
 
訓導主任行左過嚟，好似準備鬧人。
 
Felix有啲慌張，即刻擺擺手講：「阿Sir，我冇食早餐，我今日純粹遲起床，跟住就牙都冇刷就跑返嚟！」
 
「李軒宇，又係你。下學期第一日你就遲到，肯定食埋早餐先返嚟﹗你當阿Sir係傻仔！隔離好生面口，叫咩名？」
 
「我係5B班既盧正希。」我細細聲咁講。
 
「你地2個放學要去留堂班，依家快啲上班房，下堂就開始。」
 




「知道阿Sir。」Felix拉住我鞠䩑之後，我地就分開走前後樓梯。
訓導話下一堂就開始，第二堂就係中史堂。
 
我背住書包，衝忙咁跑樓梯。
 
查Sir應該唔會咁快到既，頭先同Felix傾得太開心，早知食野個陣睇下時間啦。
 
一到中史班房，見到查利揚已經到左，開緊ppt。
 
我叩叩門，然後放低書包。
 
「Katy，今堂借你份筆記睇，我份筆記放左係locker，依家唔方便攞。」
 
「好呀。不過Hailey 你平時好少遲到，今日做咩遲大到？」
 




「因為今日遲左出門，咁啱見到felix，咪食埋早餐先返，學校附近間茶記幾好……」
 
「盧正希，鍾海淇，依家係上堂時間，麻煩你地安靜。」查利揚板住臉講。
 
我個心抽動左一下，點解查利揚同聖誕節個陣，感覺好似唔同左。
 
「盧正希，你本筆記呢？」查利揚皺住眉頭講。
 
「係locker。」我低頭講。
「上堂時間遲入班房，筆記唔拎，仲同朋友傾偈，你地仲有一年就考公開試，唔該你地上心啲。盧正希，你依家出去拎筆記啦！」查利揚經過我面前，去㩒投影幕部機。
 
成堂中史堂，查利揚一係望向其他人，一係望向筆記，唯獨冇望向我。
 
依家既佢，好似一座冰山，生人勿近。
 




聖誕節既事，彷彿聖誕老人聽到我既願望，送左呢個美好既夢。
 
夢醒，發現現實卻係冷冰冰。