搭錯線：錯誤的時間遇上你: 第二十五章：冷暖（下）

「Hailey，我數十到一，數到一，我地即刻背書包衝出課室！」Felix突然一臉嚴肅咁講。
 
「下，點解？」我疑惑咁問。
 
「信我，陣間一定同你解釋。」Felix緊緊盯住個鐘講。
 
「5，4，3，2，1！走！」
 
我同felix即刻衝出班房，跑到學校門口。
 




「所以，到底點解….」我跑到上氣唔接下氣講。
 
「如果我地頭先唔跑，肯定查sir會叫住我地嚟個罰話，先再比返張紙同簿比我，一定再遲15分鐘先走，我要準時放學！」
 
「但係你唔洗拎返你本簿咩？」
 
「嘻嘻，本簿剩返幾頁，佢咪拎去！況且我仲有好多學校簿。」felix 得戚笑住咁講。
 
「今日可能我講野講得大聲，連累到你比埋查sir鬧，sorry 呀。」我一臉歉意咁講。
 




我知今日查利揚係針對我，所以先連累到felix比人鬧埋。
 
「唔緊要啦，我平時都比人鬧慣，仲有邊關你事，啲老師係咁煩，我左耳入右耳出，都唔記得佢地鬧我咩lu！」Felix講完，吹下口哨。
 
見到路上既小石，我忍唔住用腳踢左一下。
 
「Hailey，我知道呢度有間隱世雞蛋仔，有冇興趣先？」felix探頭一問。
 
「你講緊係九記雞蛋仔？」我即刻抬頭，望向felix。
 




「你估下？」felix笑起上嚟，眼睛彎彎既，睇落好似一隻好開心既大型狗狗。
 
我跟住felix行，行左九曲十八彎既路，終於都到。
 
今次真係隱世小店，我讀左5年都唔知既鋪。
 
「老闆娘，唔該要2份朱古力麻糬雞蛋仔！」felix大喊。
 
迎面而嚟既招牌係星弘雞蛋仔，唔係我平時食開個間。
 
「同你講，呢度啲朱古力比好多，麻糬都好煙韌！」felix雙眼發光咁講。
 
「靚仔靚女，2份朱古力麻糬雞蛋仔，小心熱。」姨姨比左2袋雞蛋仔比我地。
 
「唔該姨姨。」我同felix一齊講。




 
我咬左一啖雞蛋仔，麻糬真係識拉絲，而且朱古力比得好足，唔會太少。
 
我大啖大啖咁咬雞蛋仔，真係好好味。
 
「依家開心返咪好囉！」felix望住我講。
 
「乜我頭先睇落唔開心咩？仲有雞蛋仔幾錢，我比返錢你。」我側側頭問。
 
「雞蛋仔當我請你食，下次你再請返我咪得！比老師話完唔開心都正常，學校既事就放係學校，依家放左學，老師都奈我地唔何！」felix奸笑咁講。
 
Felix都講得啱，我唔應該再因為查利揚，而令身邊既人都感受到我既負能量。
 
「好，聽你講，學校既事就放係學校，依家我乜都唔理，我要開心咁食雞蛋仔！下次我再請返你食！」我牽動嘴角，流露出愉快既笑容。
 




Felix望向我冇出聲，眼睛再次瞇成一條線，嘴角掛住傻氣既笑容。
 
點解felix對我，總係充滿笑容？
-
「嗡嗡」枱上既手機傳來聲音。
 
Katy已把你加入「Aia之約」群組。
 
我見到另外兩個聯絡人，一個寫「K」，一個寫住「Felix🏀」。
 
「K」肯定係kyle，因為icon係佢幾個籃球朋友影幾合照，felix係其中一個。
 
而Felix icon係蠟筆小新做鬼臉既表情，個樣搞笑到我忍唔住笑左出嚟。

經過一番討論，我地下下個星期日去AIA玩，主要四個人夾時間，真係有難度。




-
今日第一堂就係中史堂。
 
查利揚好似睇落平時一樣，都係咁教書。
 
但我見到佢琴日略深既黑眼圈，唔通佢琴晚冇瞓好？
 
我同查利揚四目交投，唯獨佢眼神好快閃過，仲背向學生，係黑板上寫字。
 
啱啱個眼神代表咩意思？
 
不過查利揚係我一個睇唔透既人，於是我繼續抄筆記。
 
-
「Goodbye and thank you Mr.Cha.」




 
「科長，你留一留低。」查利揚望住我講。
 
科長。
 
你當我學生同科長，咁我都會當返你係老師。
 
一諗起琴日，條氣就有啲唔順。
 
我行去老師枱，冷冷咁問：「查sir，有咩事？」
 
「呢本簿比返你。」查利揚木無表情咁遞左本簿比我。
 
「咁張紙呢？」我追問。
 
「張紙放埋係本簿到。」查利揚拋低呢句，就離開左班房。
 
我見到本簿，原來Felix連名都冇寫，一打開就見到張「天下太平」既紙。
 
估唔到查利揚叫我留低，竟然唔係因為中史科，而係為左比返本簿比我。
 
我諗叫我「科長」，都係留返啲面子比我。
 
我望住本簿，會心微笑。