搭錯線：錯誤的時間遇上你: 第二十六章：好鵬友？

日復日既校園生活過左兩個星期，終於到aia嘉年華！
 
原本我想約埋katy一齊去，但佢話已經約左kyle，所以我地分開去，係aia個邊直接等。
 
我去到aia個到，見到katy同kyle已經到左。
 
Katy上身著淺藍色針織冷衫，下身係白色蛋糕裙，然後著左對白色毛毛短boots。而且katy頭上仲夾左個白色貓咪既毛毛髮夾，睇落成個人都好可愛。
 
而kyle同katy一樣，上身都係淺藍色針織冷衫，下身係杏色闊腳褲，加上一對白色平底鞋。
 




睇得出佢地今日係情侶裝，仲要造型係精心襯過。
 
「Hi!」我同佢地打招呼。
 
「Wow Hailey你今日都好靚喎！」katy笑住講。
 
「點夠你地兩個好睇，係人一睇都知你地兩個係情侶！」我都笑住應katy。
 
「Felix條友又遲到…我諗佢10分鐘後先到。」Kyle同我地講。
 




「唔緊要，我地等埋佢先入去。」我點點頭應kyle。
 
「Kyle我凍凍…」katy挨落kyle肩膀講。
 
「我地挨埋啲就唔凍凍...」然後kyle攬住katy。
 
雖然我見唔少家姐同男朋友拍拖既情景，但疊字我聽到都毛管凍，不禁打個冷震。
 
我wts gp到@felix。
 




「Felix你到未…我對眼就嚟閃盲😭」
 
「仲有5分鐘，就到就到！」
 
3個5分鐘過去，期間我睇住kyle同katy打情罵俏，已經無視左我。
 
我見到遠處既felix行緊過嚟，於是我行過去搵佢。。
 
「Hello Hailey！」Felix笑意盈盈咁同我打招呼。
 
「5分鐘又5分鐘，一邊食西北風，一邊食住閃光彈。」我無奈咁講。
 
「Sorry sorry，我錯我錯！」Felix雙手合實，求我原諒。
 
「好啦好啦，人到就得。」聽到felix咁認真道歉，我忍唔住笑左。




 
「遲到大王終於嚟！」kyle講。
 
「咁我地依家入場啦！」katy同我地講完，大家就一齊行入門票處排隊。
 
Katy同kyle好似糖黐豆，基本上都緊貼對方。
 
「我終於明你啱啱講既意思…」Felix對眼瞇成一條線講。
 
「你明就好，好彩今日有你係到！」我無奈咁講。
 
「有我係到？點解咁講？」Felix抓抓頭講。
 
「因為我有啲怕生，同埋同你相處好自在同舒服。」我輕鬆咁講。
 




「咁你有我呢個好鵬友，你都可以搵我玩！」Felix拍拍胸口，一臉自信咁講。
 
「好鵬友？你鄉音咁重既。」我捂住嘴笑緊。
 
「好鵬友喎？Thanks Thanks Thanks 陳展鵬，冇聽過？」
 
「我識陳展鵬，但你講個啲冇聽過。仲有好鵬友關陳展鵬咩事？」
 
「好鵬友係陳展鵬fans name，仲有thanks thanks thanks 陳展鵬講，比你睇下段片啦！」
 
Felix係youtube到搵片，然後比左一邊耳機比我。
 
「Thanks Thanks Thanks Thanks 陳展鵬！誰能代替你地位！」
 
「乜料，完全唔啱音既。哈哈哈….」我笑到合不攏嘴。




 
「Hailey，你有冇睇過陳展鵬既災難式襯衫？」
 
「梗係冇啦！」
 
Felix就係google搵左幾張相比我睇。
 
「哇，真係fashion界殺手」我笑到淚水都出埋嚟。
 
不知不覺間，我地已經排到上前面櫃台。
 
「哈哈哈哈….」我已經笑到連腰都彎埋。
 
「唔該我要4張門票。」kyle 同staff講。
 




「Felix你講左啲咩，搞到Hailey笑到條腰彎晒？我都未見過佢成到笑咁誇張！」Katy見到我咁樣，驚親左。
 
「都係講下陳展鵬啫！」felix抓抓頭講。
 
「Felix講野好搞笑，有時我都會同Hailey一樣，真係會笑死。」kyle點點頭咁講。
 
「唔係呢….啱啱felix講野….真係好好笑呢」我企返直個人，終於有返啲力氣講野。
 
「Felix條友真係好低能！」katy笑住咁講。
 
「唔該晒。」feliz對住staff講，就拎住4張門票同代幣離開。