搭錯線：錯誤的時間遇上你: 第二十九章：只想和你做朋友

「啱啱你地玩左咩game贏公仔？」Felix問kyle。
 
「飛鏢王、投籃王，仲有將圈圈扔入公仔嗰個迷你圈圈有獎。」kyle答。
 
「好，我依家就去玩投籃王！身為一個籃球隊隊員，呢個game一定要玩！」felix充滿鬥志咁講。
 
我地嚟到投籃王前面，挑戰者要將籃球投入籃內，入1-2有獎，4球會有特獎。
 
籃球籃離我地好遠，對於一般人嚟講一定有難度。
 




我地啱啱好搵左個位係冇人排隊。
 
Felix緊皺眉頭，全神貫注咁望住眼前既籃球籃。
 
呢個咁認真既Felix，完全唔似平時既felix。
 
「噹！」第一球中左。
 
Felix繼續凝視眼前既籃球籃，準備投第2球。
 




「碰！碰！」連續兩球都入籃。
 
眼前felix額頭冒出汗珠，一顆又一顆滑過側臉。
 
「咚！」籃球彈中板面，並沿住板面滑落嚟。
 
Felix 眼神呆滯，瞳孔失去剛才既閃爍。
 
「恭喜你，你可以揀呢行既公仔。」職員對住felix講。
 




只見felix由目光由最上面特獎個行，望向下面細獎個行。
 
Felix勾起嘴角，問我：「Hailey，你想要邊隻公仔？我唔儲公仔，哈哈！」
 
既然佢咁講，我見到眼前有隻熟悉既character。
 
「咁就揀最右邊嗰隻米奇老鼠。」我指住米奇講。
 
「我想要右邊隻米奇，唔該。」職員遞左米奇比felix，felix再將佢交到我手上。
 
「多謝。其實你贏左3球已經好勁，唔洗灰心喎！」我安慰felix講。
 
「我第一round就已經贏左細獎，下個game就得了？」felix笑住講。
 
「我個陣同你一樣，都係差1球。」kyle補充。




 
「咪就係囉，贏到公仔已經好叻！」katy拉住kyle隻手講。
 
「katy兜圈讚kyle….」felix 望住katy搖搖頭講。
 
「明顯啦，卡卡係最勁既投籃手！」katy一臉自豪咁望住kyle講。
 
「隔離有擲飛鏢，今次我一定可以大顯身手！」felix望住旁邊既攤位講。
 
「要唔要嚟場比賽？鬥多。」kyle突然投下戰帖。
 
「好呀！」felix即刻認下戰帖。
 
就係咁樣，我同katy係旁邊睇住佢地比賽。
 




「我就話kyle一定贏，頭先佢中左3個啤牌飛鏢，只要今次唔失手，絕對可以中晒4個！」katy有信心咁講。
 
「佢地都係籃球隊選手，點都唔會差既。」我應katy。
 
「你唔支持下felix？話晒佢啱啱都係想贏公仔比你？」katy降低聲量，係我耳邊講。
 
「咁佢話佢唔鍾意公仔呀嘛」我都降低聲量，對住katy耳邊講。
 
「我覺得felix對你有好感，我見佢成日都望住你。」
 
「邊有呀？」
 
「天下間唔係得一個男人既，你可以試下有冇Feel先。如果你真係對佢冇意思，就好快啲同佢講清楚，唔好晒佢時間。依家到佢地，我地專心睇比賽啦！」katy對住kyle單貶眼。
 
Felix望向我，我用口型同佢講左聲加油。




 
Felix笑得好開朗，雙眼都瞇起嚟，好似一隻獲得主人讚賞既大狗狗。
 
「啪！」
「啪！」
Felix同kyle都中左。
旁邊既katy高興得手舞足蹈。
 
「啪！」
「噗！」
Kyle 失手。
Felix再次命中。
 
「啪！」
「啪！」




兩個人都中左。
 
「啪！」
「噗！」
Kyle支鏢飛過啤牌，跌左落嚟，而felix又中左。
 
「噹噹噹！」攤位響起鐘聲。
 
「靚仔，你揀隻公仔啦！」Staff同felix講
 
我望一望，巨大既白色熊吸引左我既目光。
 
Felix就講：「我想要白色熊，唔該。」
 
職員將白色熊交到felix手中。
 
Felix再將白色熊交比我。
 
「我終於贏到大獎！」felix笑得好開心咁講。
 
我望向旁邊既katy，kyle送左隻mini pooh比katy，katy笑咪咪咁攬住kyle。
 
我微微一笑，講：「多謝你呀，隻熊我好鍾意。」
 
眼前既felix只係傻笑咁望住我。
 
我不知所措咁拎住左白熊，整個身體都僵硬左。
 
雖然呢隻白色熊好得意，如果係查利揚送，我會唔會再開心啲？
 
我會唔會同katy一樣，就算查利揚拎到細獎，贏到細公仔，一樣咁開心？
 
明明Felix都對我好，點解就係同查利揚個種感覺唔同？
 
萬一，felix真係鍾意我，我會唔會少一個好朋友？