搭錯線：錯誤的時間遇上你: 第二十八章：咖哩生菜魚肉
「Felix你依家好返啲未？」katy問。
「睇條友依家咁精神，仲叫左個包嚟食，肯定冇事啦！」Kyle講。
Katy同kyle收到我個電話之後，就過左嚟小食亭個邊。
「我依家去買野食先～我睇ig有好多野食推介！」katy同我地講。
「好呀。」kyle應完katy，katy就去左買野食。
「我依家冇事啦，學kyle話齋，老虎都打死幾隻」felix充滿自信咁講。
「我依家唔會再信Felix講既野。」我對住felix無奈點點頭講。
「Hailey，你終於明白同felix做朋友既相處之道，我平時都領教唔少。」kyle講。
「領教唔少？」我問kyle。
「遲到定律。當felix話仲有5分鐘到，其他佢仲搭緊車，加多10分鐘落去係基本野。」Kyle講完，felix即刻好驚訝咁望住kyle。
「知我者，莫過於kyle也。」felix比左個like手勢比kyle。
Kyle只係點點頭，冇出聲。
「上次我同felix遲到，訓導都認得佢。」我講。
「Felix一個星期起碼遲一次到，咁你覺得訓導記唔記得佢？」kyle講。
「Kyle，我睇錯你呢個好朋友，你唔好咩都講出嚟！」Felix用力揸住kyle膊頭講。
「我地個級同訓導都知，點解唔比得hailey知？」kyle伸伸下舌頭講。
Felix狠狠睥住kyle。
「喂，felix，你做咩揸kyle膊頭揸到咁大力！佢唔舒服，我一定搵你算帳！」katy拎住好多野食，同時睥住felix。
「唔係呀，我只係….」felix好慌張想解釋。
Katy放低啲野食之後，即刻同felix講：「我要睇下kyle個膊頭有冇事！Hailey隔離有位，你坐過去！」
我好少見到咁情緒化既Katy，平時既Katy總係平易近人，笑意盈盈。
「得啦，知啦，sorry kyle。我依家表示我既歉意，我要讓個位比阿嫂。」felix講完，向kyle salute，就坐左係我旁邊。
「我買左燒賣魚蛋生菜魚肉，仲有格仔餅！」katy興奮咁同kyle講。
「咖哩魚蛋嗌左特辣，一定啱你口味！」Katy講完，餵左粒魚蛋比kyle食。
我拎左隔離既燒賣嚟食。
「Sorry Hailey，我唔記得你唔食得辣，你平時都係鍾意食魚蛋，我依家買返？」Katy企起身講。
「唔洗啦，呢間啲燒賣幾好食呀。」我邊食邊講。
我默默咁食住燒賣，felix 拎起左生菜魚肉，將啲咖哩魚蛋放落啲生菜魚肉汁到。
「屌，你咁食生菜魚肉晒野！兩樣都唔夾！」kyle皺住眉講。
「我想食辣味咖哩既生菜魚肉，剩低啲魚蛋留比Hailey食，佢唔食得辣呀嘛。」
「你平時燒賣撈飯，m＆m撈營多，今次都係felix style」kyle搖搖頭講。
「燒賣撈飯係啲燒賣鹹，撈飯啱啱好。營多太鹹，要有返啲甜野中和！」felix還擊講。
「Hailey快啲食啦，再唔食啲魚蛋好快凍！咖哩同生菜魚肉好夾，我下次都要繼續咁食先得！」felix好滋味食住講。
而Katy食緊格仔餅，太多花生醬溢出，令佢嘴臉上都沾上啲花生醬。
Kyle係袋中拎左啲紙巾，細心咁幫Katy抹乾淨嘴角周圍。
「哇，卡卡你咁sweet既！」katy甜笑咁講。
「知你一食野就容易整污糟塊臉，所以一定要有紙巾幫你抹乾淨。」kyle順便用水濕左張紙巾比Katy，因為啲醬整污糟佢隻手。
如果我同查利揚可以咁樣就好，可惜現實唔允許。
「卡卡你係到睇緊啲咩？」Katy哄過去kyle部手機睇。
下一秒Katy 失去笑容，講：「又係Betty搵你？」
「佢都係問我數學功課，我返屋企先應佢！」Kyle即刻收起手機講。
「點解班上面咁多同學唔問，佢淨係問你數學功課？」Katy板起臉講。
「因為佢話我教得仔細。」kyle好直接咁講。
「你叫佢問其他人啦！再唔係問老師囉！」katy叉住腰講。
瞬間空氣凝結，氣溫下降至零度。
呢個時候，我同felix互相對望一眼。
我地4個只係默默食緊野，冇再出聲。
隔左一陣，felix問：「你地陣間想去邊到玩？」
「頭先我地好多game都玩左，睇下你地想玩咩？」kyle咁隨和咁講。
「係呀Hailey，頭先我太肚餓，kyle佢射擊好勁，幫左好幾隻細公仔，比你睇下！」Katy興奮咁講，就袋入面搵到3隻細公仔。
「Hailey，實不相瞞，我係神射手。」felix 神氣咁講。
「聽住先聽住先。」我食住魚蛋，漫不經心咁應。
「Felix同我真係實力差唔多。」kyle認真咁講。
「陣間玩game咪知felix實力囉！哈哈！」我將一埋魚蛋塞落嘴到。
「Hailey你慢慢食啦，塞到成嘴都係魚蛋！」katy捂住嘴笑。
我只好快速吞下魚蛋。
「Hailey食完野，咁我地依家執齊野就行得，let’s go」Katy 興奮咁講。
當我執好剩低既垃圾，felix已經準備好膠袋入住佢地，然後好似投籃咁，將垃圾投入落垃圾桶。
望住felix背影，我突然諗緊，佢係咪對所有人都係咁好？