搭錯線：錯誤的時間遇上你: 第三十五章：模糊界線
我地一邊傾偈，一邊行去地鐵站。
「Hailey你同查sir好熟㗎？」felix提問。
「咁佢教我中史，基本上一個星期起碼都見4日，梗係熟啦。」我無奈笑一笑。
「佢比我感覺好cool，好難親近既老師，反而佢對住你，總係成日笑。」felix嘟嘟嘴講。
「err…可能你同佢冇咩交集，佢先對你咁cool啫！」我安慰佢。
「佢對我唔只cool咁簡單，每一個cycle上中史堂，佢都叫我答問題，實係我太靚仔，引人注目！」felix整一整額前既瀏海。
「係咪你成日瞓覺，佢堂堂先叫你答問題咋？」我無奈咁講。
「Kyle同其他fd 都叫我唔好係佢個堂瞓，但永遠佢一定會嗌中我，咁我又唔識答，好彩班fd通水，先可蒙混過關。」
「我上佢堂，又唔覺得佢成日抽人問題喎。」
印象中上查利揚堂，通常佢都係用ppt同notes講書，有時係黑板抄低key words，好少叫人答問題。
「可能你地初中教法唔同啫！」
「你覺得查sir係點既老師？」felix突然用好真誠既目光望住我。
「你突然咁認真既。」我下意識迴避左felix既眼神。
「我係好奇寶寶，當然想知你點睇佢。」felix微笑咁講。
「Errrr查sir係一個對教育好有熱誠既老師，就算wts幾遲搵佢，佢都會覆我地，同埋佢會自製筆記比我地溫書，真係好難得既老師。」講到呢到，我個心就暖暖地，就好似今日查利揚指尖既溫度，輕輕柔柔帶點溫暖既感覺。
「咁Hailey，你覺得我係點既人？」Felix又問。
「Felix你今日咁多問題既？」我疑惑問佢。
「咁我都好奇你點睇我？」Felix又用真誠既眼神去打動我。
「咪我新識既好朋友，一個好鍾意遲到既朋友，同埋留堂班常客，成日唔交功課。」我捂住嘴係到笑。
「功課可以遲啲做，做人就係要及時行樂，享受人生！呢啲叫青春，青春一去不復返！況且我目標係做運動員，點解仲要努力做功課？」felix 一臉唔在乎咁講。
「如果你想做運動員，你依家係咪要訓練多啲？」我望住佢講。
「如果日日咁打波，我實憎埋籃球！」felix唔耐煩咁講。
「職業選手就係日日要練波，先可以提升實力。台上一分鐘，台下十年功呀！」我嘆左一口氣講。
「唔好傾未來啦，我地仲後生，遲啲先諗啦！反正大把時間，諗下今晚返去打咩機仲好！」Felix 伸住懶腰講。
「仲有你嫲嫲供你讀書，你讀好書，佢先可以放心，你當孝順你嫲嫲。」
Felix打住呵欠，並冇回應我所講既說話。
我只好轉換話題，避免氣氛咁尷尬。
「我頭先講笑咋，你點會冇優點！你係有義氣既朋友，如果唔係你今日幫手，查sir個選科講座進度又會慢左。」
「咁你下次係咪要請我呢位有義氣既朋友食飯先！」felix傻傻咁笑住講。
「你叫查sir請你啦，個講座同攤位佢搞既。」
「你唔係入面，我唔會幫查sir，畢竟我同佢冇咩交情。」felix聳聳肩。
「得啦，下次請你食雞蛋仔！」我地已經行到地鐵站。
由於我地6點幾先離開學校，啱啱好撞正打工仔既收工時間。
「呢班好多人，定係我地上下一班？」我同felix係月台，見到車廂剩返勁少既位置，似乎好難迫入去。
「Hailey，依家放工時間，班班都咁多人，我地衝入去先啦！」
「但係隻門就嚟閂…」
Felix拉拉我既手臂，令我企係人群入面，而佢就企近車門個邊。
「你企唔穩就捉實我啦！」felix對住我耳邊講。
雖然九龍灣離黃大仙只係兩個站，但我覺得度日如年。
車入面既空氣好侷促，同時我同felix距離好近，令我渾身唔自在。
「嗡嗡嗡…」裙袋既電話震緊，但車廂太逼，我好難伸入裙袋拎手機。
「都叫你搭下一班，搞到依家咁逼！下一班可以企入車廂入面，多啲空間可以郁動。」我抱怨咁講。
「Sorry 我只係想快啲，平時慣左趕返學。你放心啦，就算幾逼都好，我都會……你冇事呀嘛？」
頭先架車停一停，我突然重心向左移，差啲仆向隔離個人個到。
我感覺有一雙強而有力既雙手緊緊抓緊我既肩膊，我先可以企返穩。
「冇事，頭先真係唔該你。」同時我伸手捉實扶手，Felix 雙手亦離開我既膊頭。
因為felix係背向我，我唔知佢咩反應，我只可以透過佢語氣猜測。
「小意思啦，哈哈….唔該唔該….」
我抬頭一望，原來到左黃大仙。
Felix從人群中推我出去，如果唔係佢，咁擁擠既環境下，我就要留係車廂入面。
當我出到去，回頭一望，Felix跟住我出左嚟。
「你唔係仲有一個站咩？」我疑惑咁問。
「Hailey，我有啲野一定要今日同你講。」Felix 突然一臉認真講。
「你講啦！」
「我係一個好大意既人，成日書包唔記得拉鏈，有時甚至跌左野都唔知。係九月開學搭車個陣，有個女仔拍我膞頭，同我講跌左銀包，銀包入面書簿費，係嫲嫲揾落既錢，銀包真係對我好重要，而將銀包交返落我手上個女仔就係….」
「嗡嗡…」點解我手機又震，啲詐騙電話真係好煩。
「Felix你等等，又係呢啲詐騙電話！」我唔耐煩咁講。