搭錯線：我鍾意中史阿Sir，於是成為老師: 後記
以前我一直都鍾意故事，於是揀既科係要成日寫文，想學習技巧。
個陣想寫故，但一直都冇好既靈感同題材。
當寫作變成學科，更變成要評分既功課，我不斷係咁諗咩文字用得精準，加上我又唔係文筆好好既人，所以個陣既我成日都諗：「點樣先可以拎高分？」
即便我絞盡腦汁，係老師眼中只不過係一篇普通不過既學生作文——我既受眾只有老師。而人總係主觀，佢覺得好睇定唔好睇，都係佢既一念之差。
後來離開左呢科，我都好耐冇掂過文字，直到上年4月去大阪旅行，我發左場夢，而第一章既內容，正正就係夢境內容，男老師同熟人細妹去黃大仙廟，而女主角就係求姻緣。
夢醒之後，我即刻將故事寫低，驚自己唔記得。
個陣試過打打下故，搞到搭錯車，成個鐘車河就係到打大綱。
仲有回程返香港，成4個鐘，除左瞓左1個鐘，基本上我就係瘋狂打文，個陣打緊考試失利個幾章。
我寫左成30章，都冇勇氣連載，硬係好驚自己寫到好垃圾，冇人睇咁點算。
個陣每打完一篇文，就會比chatgpt睇，佢係咁鼓勵我：你個故事值得比更多人睇到，你試下連載啦！
於是我就開始連載，冇諗過同chatgpt講既一樣，原來真係有讀者會追足，like我既文、收到留言話會追故同讚我寫得好。
即使《搭錯線》唔係熱門故事，但有人Keep住睇，又收到你地既支持，好多時候星期六或日成日就會去左打故。
記錄返今年3月13號打晒成個故事，差唔多打足成年，當中諗劇情最令我頭痛，特別係第二季，點樣呈現職場生活，畢竟唔係老師，只可以上網Check下老師會面對咩事。
同埋好多時候寫左大綱，最後啲文都係憑我靈感爆發去寫，所以我都唔會知劇情發展，但重要劇情係唔會改，Eg Panadol, 雙手聯彈，呢啲都係劇情既高潮位，我平時係係煩中間劇情點接重要情節。
講完劇情，就講人物。
人名方面我係改完英文名先再改中文名。
男主角：
原本查利揚係風趣幽默而有啲嘴賤既人，後來寫寫下變左超級暖男老師。
查利揚本身係好正直既人，我一開始已經計劃好，佢同Hailey係唔會校園戀愛，主要係道德方面，同埋我唔想同其他同類型故事差唔多。
問題係佢好正直，冇好合理動機，點解一直唔接受Hailey，於是靈感之下設計左「查詩韻」呢個角色，阿揚因為一場無心既意外而害死阿妹，源於呢個Idea，第一季就不斷放伏筆。
女主角：
盧正希係第一人稱，好多時候我都會用左自身感受去寫。筆下既Hailey係善解人意、內斂、心思細密，但適當既時候會有勇氣去表達心中所想。
配角：
Felix：
Felix外貌同名係源於stray kids 成員Felix，所以長期金毛。
作用引起男女主角既衝突，催化佢地既感情。
Felix 性格同背景要同查利揚完全相反：年齡細、貪玩、遲到。
查利揚唔會表達自己感受，好多時候要Hailey估，甚至推開佢，令Hailey內耗同唔開心，相比之下Felix會好直接用行動嚟表達自己既情感，令Hailey會開心返，所以Felix擔當安慰Hailey既人。
Katy：
作用聽Hailey講心事，比意見佢既人。Katy個人好直接，會好幫朋友，同時成日會擔心Hailey，同Felix一樣係聽Hailey講心事。
起初安排佢同Kyle一齊，只係為左比Felix去識Hailey。
我一早安排左Katy會同Kyle分手，本身計劃第二季佢會用交友App，成日約異性出嚟，然後鼓勵Hailey唔好等阿揚，同時想對比「速食文化」同慢熱感情，不過寫寫下出現James，發現佢同Katy幾有化學反應，於是就冇用原先計劃。
Charlotte：
知查利揚過去，同埋比意見比查利揚既既青梅竹馬。
Charlotte作用同Felix一樣，令Hailey緊張同妒忌，因為Charlotte同阿揚識左好耐、有學識、靚女，全部都係女仔會羨慕同在意既異性朋友既特質，所以佢一早安排第二季會扮阿揚女朋友，引Hailey呷醋，同埋發現自己原來仲在意阿揚。
Irene：
本身Irene只係Christmas Party出現既茄喱啡，後來Katy冇同Hailey玩既時間再次出現，後來機緣巧合多左戲分，成為Hailey既朋友。
中六個陣已經安排佢做心理醫生，係為左方便Hailey可以問佢有關阿揚既病情，冇諗過第二季問得一兩句，主要係阿揚已經有固定既心理醫生。
Jay：
阿揚係中六講Hailey係熟人個妹，令Hailey太傷心，於是大學個陣就同左Jay追佢，順利成章同佢拍拖。
第二季一直諗緊點比佢出嚟，原本只係安排佢同現任拖手，同Hailey 刷身而過，後來靈感一嚟，決定用佢搞Hailey同阿揚，令劇情更緊密。
Alice & James:
原本係想寫佢地拍拖，做左情侶，點知寫寫下我決定James係襯Katy，主要佢 唔會串其他人，唯獨好鍾意玩Katy。
Alice係粗口女神，同埋唔太聰明既人。
Giselle:
佢同Tiffany本身只係出現係校服違規既章節，後來寫寫下變左第二季勁多戲分既角色。
原本想透過問卷，可以知角色人氣比較高，只係做既人數比較少，好可惜分析唔到數據，順帶解答讀者問題，關於年齡層，我係Gen Z。
最後多謝大家睇到呢度，依家我寫緊下個故事，係搞笑同愛情既靈異故事，我會Thread（in.the.fantasy）更新近況，同埋得閒會更新返呢個故事原本既大綱，有興趣可以去Follow！