搭錯線：我鍾意中史阿Sir，於是成為老師: 第一百一十七章：我願意（結局篇）

我同阿揚睇埋其他攤位之後，就返去自己既攤位。
 
開放日開始後，「辯論一分鐘」比我地想像中受歡迎，好多小學生過嚟玩。
 
「Miss Lo！」隊伍中有熟悉既臉孔，係Tiffany同Giselle，中間仲有個小弟弟。
 
「Tiffany，Giselle！」我微笑揮手打招呼。
 
「我細佬升中學，所以趁開放日過嚟參觀，呢度係玩咩？」
 




「辯論一分鐘，同幹事辯論一分鐘，能夠維持一分鐘既參與者，可以獲得小禮物。」阿揚幫我回答。
 
「喂，你平時成日串我，依家大好機會比你串人。」Tiffany對住細佬講。
 
「Giselle？」
 
Giselle望向我，我示意行去少人既地方。
 
「你屋企最近冇咩事？阿爸仲有冇過嚟揾你地？」
 




「少左好多，主要係社工揾過阿媽，令阿媽決定要堅決拒絕阿爸。」
 
「如果你有咩事，可以揾我同社工都得。讀書方面有冇咩困難？」
 
「藝術治療幫左我好多，減輕讀書壓力。Miss Lo，你真係一個好老師。」
 
「我？點解？」我立即問。
 
印象中我對學生好嚴，除左之前狂捉違規之外，平時比出好多功課比佢地，我感覺有啲學生係對我唔太友善。
 




「你睇落好嚴，雖然你係成日捉人儀容，但係睇得出你比心機教書，唔同其他老師，你可以將啲好難既文言文，講到我明，我諗你背後做左好多功夫。」Giselle 微笑講。
 
我備課個陣的確諗左好耐，點樣將抽象既文言文講得清楚，而又令學生明白，睇嚟時間真係冇白費。
 
「我想將來要同Miss Lo你一樣，做一個好老師。」Giselle 接住講。
 
「咁你要努力讀書。」
 
「當然！就算做唔到老師，我都希望成為好似你咁可靠既大人。」Giselle用住堅決既眼神講。
 
「乖女！你一定會做到！」我由衷地微笑。
 
望向遠處，Tiffany帶住佢細佬行緊過嚟。
 
「Tiffany佢地過緊嚟，我都要返攤位，遲啲上堂見！」我同Giselle揮手告別。




 
我返去攤位時，企攤位後面既阿揚問：「Giselle屋企點樣？」
 
「佢依家好好多，話藝術治療幫左佢唔少。」
 
「藝術真係可以陶冶性情。」
 
「似乎你都有啲心得。」
 
「諗緊可能趁空餘時間，讀返關於音樂課程。」
 
「音樂課程？」
 
「自從重新彈琴，生活上有咩唔開心既事，除左同你講，我都會彈琴抒發下感情。音樂可以治癒心靈，我都想用音樂幫同我有類似經歷既人，所以我諗緊讀音樂課程，或者可以做Part Time 既音樂治療師。」
 




「咁幾好呀，幫到人！我實支持你！」
 
「幾時都話你係我最強力既後盾。」阿揚摸摸我個頭講。
 
「返去攤位啦！一陣啲同事以為我地蛇王！」我拉住阿揚既手走。
 
開放日結束後，我同阿揚結伴離開學校，食完晚飯，我地一齊行觀濱。
 
我地手牽手，海邊漫步既感覺真係好舒服。
 
「正希，個邊有鋼琴。」阿揚指向前方講。
 
「睇嚟你想過下手癮！」
 
阿揚坐係鋼琴前，熟悉既旋律流入耳中，係〈One Summer's〉。




 
我企係鋼琴側邊，欣賞阿揚彈琴。
 
由阿揚唔夠膽接觸鋼琴，到今日主動話想彈琴，感覺好似過左好耐。
 
眼前阿揚投入係鋼琴人面，對比起之前彈既〈One Summer's〉，今次聽落好輕快。
 
悠揚而悅耳既琴聲完結，我同旁邊既觀眾一同拍手。
 
阿揚離開鋼琴後，我立即稱讚佢：「你今次真係彈得好好！」
 
「咁你想唔想我以後彈比你聽？」
 
「嗯！」我點點頭。
 




「就算我變左阿伯，我都會日日彈比你聽。」
 
「你每日彈同一首，唔悶咩？」
 
「只要彈比你聽，要我彈幾多次都肯。」阿揚突然從口袋中，拎起精緻既小盒。
 
阿揚打開小盒，入面有一顆閃閃發亮既鑽石戒指。
 
我驚訝得掩著嘴巴。
 
阿揚單膝下跪講：「正希，雖然我地第一次認識係老師同學生，當中既身份我地無法跨過，8年後重逢，我就知道今次一定要好好把握呢個機會，唔可以再錯過你。同你一齊之後，我真係覺得每一日都好幸福，冇諗過可以自然瞓醒，更加冇諗過依家既我，可以同阿媽傾到偈。
正希，我地已經錯過左好多時間，以後每分每秒，我都想同你度過，嫁比我？」
 
聽到呢番說話，令我熱淚盈眶。
 
「嗯！我願意！」我伸出手。
 
阿揚為我既帶上戒指，然後深深吻在我的唇辮上。
 
以前我同阿揚一直搭錯線，兜兜轉轉下，終於可以搭啱線。