八年的距離: 序1

你信唔信…呢個世界有一見鍾情？細個嗰陣，我都唔信㗎！

但你知啦～呢個世界就係咁奇怪，你越係唔信嘅嘢，就越容易發生。

而我…就喺F.3嗰陣，對一個人一見鍾情。

啊！唔記得咗自我介紹添。我叫王俊誠，你可以叫我阿俊或者KP，啱啱喺大學畢業準備出嚟做嘢。

而家同緊一個中學老師食飯…





「係呢阿俊，畢業喇喎，有冇諗吓去邊度做嘢啊？」

佢係Miss Chiu，喺我F.5嗰陣入行，大我幾年。係一個成日俾學生恰嘅老師，佢個樣好文靜而且對人好溫柔。雖然佢冇教過我，但我哋喺一次活動之中熟咗，呢幾年嚟都有keep住聯絡。

「應該都係去中學教中文同中史囉，不過仲未諗去邊間做…」我停咗一下，再笑住話：「好似你咁。」

Miss Chiu食咗啖意粉，聽完之後笑咗一笑。
「你係想好似我咁，定係好似『某人』咁呀？」

「吓？唔..唔知呢…」聽到呢句，唔知點解我個心突然跳得好快，又令我諗返起好多嘢。





「不如你返去母校教書啦，劉老師今年退休，學校請緊老師呀。」

返去教書？咁咪即係有機會見到佢？唔得，我同佢咁耐冇聯絡，見返佢一定Kam到仆街。

「唔好啦…見到佢實好Kam…」雖然我拒絕咗Miss Chiu，但即刻覺得好後悔。有個大好機會都唔珍惜…頂！KP你係咪戇鳩㗎！

「哈哈，你再諗吓啦，之後想做再同我講，我再幫你同校長講聲。」

夜晚，我一直碌嚟碌去，根本瞓唔着。




我應唔應該返母校？
我應唔應該搵返佢？
心入面有太多問題，而我全部都唔知答案。慢慢就瞓着咗…

我起身之後打開Whatsapp，諗咗好耐，決定send出去

－Miss Chiu，我諗好喇。我想返母校教書，琴日多謝你提議我。

－好～希望你可以順利入嚟做我嘅同事！