八年的距離: 5

暗戀嘅學生居然變咗我同事？？？

唔知係咪因為太緊張，夜晚瞓唔到，所以今朝遲咗好多起身。搞掂好晒之後就九秒九衝落樓下搭巴士。

雖然係好期待可以見到佢，但係真係好眼瞓，好唔想開會啊…

去到學校嗰陣已經就嚟夠鐘開始，會議室𥚃面已經坐滿晒人，睇嚟我應該係最遲入去嗰個…

一望入去，就已經見到琴晚凱盈同芷祈所講嘅兩位新同事。
佢哋兩個都俾我教咗4年，而且兩個都好醒好靚仔。





李俊誠，身高得173，唔算高，但眼大大，笑得又幾好睇，加上性格外向又識得講笑，有種好陽光嘅feel，所以佢都好受女仔觀迎。

另一個係王俊誠，佢身高188，五官深遂，額頭前嘅瀏海長到就嚟遮蓋隻眼，俾人一種冷漠到同冰山差唔多嘅感覺。平時內向到爆又少講嘢，但其實佢溫柔體貼又識照顧人，因此深受全校大部分男女歡迎，甚至仲被封上「高冷男神」嘅稱號。而且…我嘅暗戀對象就係佢…

喺王俊誠隔離嘅係成個會議室唯一一個空位，而空位隔離就係瘋狂示意叫我過去坐嘅Miss Wong，一睇就知係嗰兩條友為咗食花生而精心策劃出嚟嘅位。

我過去坐嗰陣見到王俊誠望住我，就對住佢笑咗一下，而佢都微微點頭回應我。我望落冷靜，其實個心已經跳得快到就嚟聽到心跳聲。一方面係覺得好尷尬，但另一方面又覺得好開心，個心情好矛盾。

會議開始之後，我一直不斷忍唔住偷望佢，而每次望佢，佢都係一副認真嘅表情，好似同以前一啲都冇變，甚至仲越嚟越靚仔。





喺會議嘅過程中，我諗咗好多嘢。

其實呢8年嚟，我一直都好清楚我哋之間係一定冇可能。但每當我想忘記佢嘅時候，都總會發生啲事令我再次諗起佢。當我以為佢畢業之後，我哋就唔會再有關係，結果佢最後都係返咗嚟教書，令我同佢再次相遇。喺呢一刻，我好肯定，我之後唔會再有機會可以放低佢。