八年的距離: 4

你有冇試過…愛上一個細過自己好多嘅人？

我叫戴希妍，大學畢業之後就去咗一間band 1中學度教書。時間過得好快，一轉眼就教咗差唔多8年，但點都估唔到，平時一向公私分明嘅我，居然喺啱啱入職嗰年，鍾意咗一個細我8年嘅F.3學生…其實我哋已經冇聯絡好耐，但係我依然會間唔中諗起佢…

「唉… 聽日要返去開會…好唔想返工啊！！！」今日，我約咗同我好frd嘅兩個中文科同事出去食飯。講起聽日大家都要返工，突然就覺得好絕望…

「係喎…今年會有兩個舊生返嚟教書，唔知係邊個呢。」

佢係黃芷祈，除咗教中文之外仲係訓導老師，嚴肅嘅外表令好多學生都好驚佢，不過其實平時係一個好慈祥而且鍾意講八卦嘅人。





「聽講一個教History，另一個教中文同中史，兩個都係啱啱大學畢業…」

而佢叫吳凱盈，係我大學嘅師姐，為人和善，深受學生歡迎。同樣地，都好鍾意講八卦。

「咁啫係希妍啱啱入嚟嗰屆…教中文…」黃芷祈諗咗一下。

「咦？唔會係『佢』呀嘛！？」佢哋兩個突然勁大反應咁講，嚇到我成個彈起咗。

『佢』，就係嗰個我由8年前鍾意到而家嘅學生，不過鑑於職業道德，我同佢從來都冇越過界。





「痴線，點會啊…」佢喎，要教書都唔會想返嚟見到我啦…

「聽日咪知囉～係嘅話就好笑喇。」

「乖乖地返工啦，你哋唔會有花生食㗎。」望住佢哋個八卦樣，都唔知講咩好…

返到屋企之後，我突然喺度諗…唔知佢會唔會真係入嚟教呢？到時我應該點做？

當佢透明？好似普通同事咁同佢相處？
其實我根本冇可能當佢唔存在或者係普通人…




點算…如果聽日真係見到佢嘅話點算…
雖然一定冇可能，但心𥚃面一直喺度幻想緊同佢一齊教書嘅情境。

夜晚十二點幾，我哋三個嘅whatsapp group彈咗條message出嚟。

－wong paper k：收到風，嗰兩個新仔我哋都識

－hoi ying：係邊個！！

－wong paper k：$50解鎖付費內容～

－我：講啦～

－wong paper k：真係我哋頭先諗嗰個…





－hoi ying：睇嚟之後有得食花生了～

－我：咩都睇唔到…

吓…真㗎？我係咪發緊夢？唔得，聽日一定要早啲起身梳好個頭，襯好啲衫！