每消滅一隻怪獸，我條女對波就大一個cup！: 6

銀黑色嘅戰鬥甲緊貼住我嘅身體，精細嘅機械紋理勾勒出流線型嘅輪廓，冰冷嘅金屬表面散發住銳利嘅光澤，成套戰鬥甲望落型得嚟兼帶有科幻感。

唯一少少美中不足嘅係，保護頭部嘅頭盔無附帶面罩，假如有埋面罩嘅話，咁就真係似幪面超人。

由於我係第一次變身，所以變身手環投射出一個手掌咁大嘅3D立體影像，圖文並茂咁介紹「升cup戰衣」所配備嘅兩款武器。

分別有「離子炮」同「合金劍」。

離子炮隱藏喺前臂嘅位置，當伸直手臂，五指分開，咁前臂嘅裝置就會自動打開，並露出一支大口徑嘅長型槍管。





一旦瞄准目標，槍口就會自動發射出藍色嘅離子光束。

至於合金劍就係一把可以伸縮嘅長劍。

劍柄收埋喺腰後面嘅凹槽，用嘅時候揸住劍柄，用力一fing，咁把劍就會彈出嚟。

除咗介紹呢兩樣武器之外，個立體投射影像上面，仲顯示咗四條bar，代表住一啲數值，但我嚟唔切仔細咁睇，因為隻怪獸正向住我呢邊衝緊埋嚟。

佢一路進逼，一路揮動巨大嘅手刀，攻擊喺面前包圍住佢嘅升cup戰士。





我第一時間向後退，拉開距離，同時伸直手臂，手掌向下，發動隱藏喺前臂嘅離子炮，瞄準目標攻擊。

𡁻𡁻𡁻𡁻𡁻𡁻𡁻𡁻𡁻𡁻𡁻𡁻𡁻𡁻——

藍色嘅離子光束猶如凌厲嘅飛箭，直射到敵人身上。

唔好睇隻嘢身形龐大，佢嘅動作卻非常敏捷。

佢唔單止識得左閃右避，兼且仲會用手刀隔檔同埋還擊。





我同成班升cup戰士一齊猛烈圍攻，但都只係傷到佢嘅皮毛。

𡁻𡁻𡁻！𡁻𡁻𡁻！𡁻𡁻…𡁻…

射下射下，我兩支離子炮居然眨下眼就無曬彈藥。

相反，其他升cup戰士戰鬥咗咁耐，都仲係火力充足。

「啊——————」佢地一邊開火，一邊大嗌。

從一開始到依家，佢地幾乎嗌足全程，我真係唔明佢地嗌緊啲乜。

唔通嗌得大聲啲，想用氣勢震懾隻怪物？

之後，我再嘗試瞄準開火，但槍口射唔出子彈之餘，升cup戰衣嘅系統仲透過我頭上嘅頭盔發出信號，係咁話我支炮energy low。





咁係咪代表啲能量用曬，所以開唔到炮？

Energy Low！Energy Low！

既然係咁都無辦法，我唯有轉用另一樣武器。

我伸手到腰後面嘅凹槽位，抽出劍柄，隨手用力一fing，尖銳嘅長劍立即展露鋒芒。

呢把就係合金劍。

雖然把劍係用合金製成，但劍身好輕，拎上手一啲都唔重。

比起用槍炮攻擊，我其實更擅長用劍。





皆因讀中學嗰陣我玩過兩年劍擊，參加過學界比賽，兼贏過獎牌，只係後來好快就玩厭咗無繼續玩落去。

若然我keep住一路打上去嘅話，隨時有可能勁過張家朗都未定。

揸住把劍，望住隻怪，我諗緊點樣先可以埋到佢身。

同佢正面硬碰硬對撼一定無著數，最好嘅辦法應該只有從後面偷襲。

我打算利用地上嘅大型瓦礫同建築物殘骸作掩護，靜靜雞咁繞到佢背後攻擊。