每消滅一隻怪獸，我條女對波就大一個cup！: 7

喺腦海中諗好偷襲嘅路線，之後我小心翼翼咁向前行。

殊不知只係行咗十幾米，突然間喺前面，有一個升cup戰士俾隻螳螂一嘢打到飛起，跟住佢成個人向後撞落嚟我度。

我想避但避唔切，結果被撞到跌低，兼且仲俾嗰個人責住。

「Sorry Sorry，責親你添。」

嗰個人拿拿臨企返起身，再擰轉面伸手扶起我。





我望一望條友，覺得佢個樣有啲熟口面…我好似識得佢…

「咦？你係咪『朱仔』朱大志？」對方先開口問我。

「你…你係…梁sir？」

「係呀！咁耐無見，你大個仔咗咁多，爭啲唔認得你添！」

梁sir曾經係我嘅補習老師，中一中二嗰陣佢幫我補過數學，估唔到隔咗咁多年無見，今日竟然會喺呢度撞到佢。





「估唔到原來梁sir你都係升cup戰士。」

「咁梗係啦，真男人梗係要為巨乳而戰！」

梁sir係八十後，我就係九十後，喺八、九十後成長嘅年代，減肥風氣盛行，令唔少女仔追求瘦就是美，結果瘦下瘦下，瘦到連波都無埋，搞到我地呢個generation嘅女性好多都係平胸。

我再望一望其他嘅升cup戰士，發現佢地大部分都係二十尾至四十頭呢個年齡範圍。

所以某程度上，追求巨乳係屬於我地八、九十後嘅戰爭。





「係啦朱仔，點解之前我好似都無見過你咁嘅？」梁sir問我。

「因為呢次係我第一次變身。」

「哦~原來係咁~嗱，講明先呀，喺戰場上面，我地就係競爭對手，我係唔會讓你架。」

梁sir講得無錯，對我地嚟講，呢一場其實係一場爭奪戰。

邊個最快可以打敗隻怪獸，邊個先可以得到紫石。

因此在場所有升cup戰士，個個都使出渾身解數，希望自己能夠率先消滅敵人。

只不過隻大螳螂就梗係唔會企定定喺度受死。

俾人圍攻咗咁耐，佢似乎已經忍無可忍，決定出招大反擊。





佢向前烏低身，並伸長兩把手刀，跟住左右交叉快速擺動，使出割草式嘅攻擊。

當佢嘅手刀一伸長，方圓五十米內根本避無可避。

我地在場幾十個升cup戰士就好似lego積木咁，俾佢一排一排掃冧曬。

尖利嘅刀鋒加上強勁嘅衝擊力，一嘢車埋嚟，威力仲犀利過一架時速二百公里大貨車，根本擋都擋唔住。

我同梁sir被撞到飛起，喺高空中打咗幾個關斗，然後好似撻生魚咁撻落去地上嘅瓦礫堆中。

我成個人瞓咗喺度，手上把劍唔知飛咗去邊，心口嘅裝甲多咗一條刀痕，好彩嘅係無傷到入肉，仲可以繼續戰鬥。

我撥走身上嘅瓦礫碎片，慢慢企返起身。





而攤喺我身邊嘅梁sir就傷得比我重。

佢件戰鬥甲肚臍對上嘅位置裂開咗，仲有血滲緊出嚟。

只不過佢並無因為流血而退縮。

事實上，唔單止係我同梁sir，在場大部分升cup戰士都係一樣，就算俾隻怪獸打到趴街，但都照樣咬實牙關，起身再戰。